Home » coruna » Currently Reading:

A Deputación da Coruña visibiliza a endometriose na conmemoración do día da saúde feminina

junio 2, 2018 coruna No Comments

Unhas 60.000 galegas padecen a enfemidade mais o déficit de atención e recursos é unha das demandas das asociacións de afectadas. A área de Igualdade e Servizos Sociais centrou na endometriose a conmemoración do día da saúde feminina.

A área de Igualdade da Deputación da Coruña organizou nesta tarde do venres na sede da Fundación Paideia unha xornada divulgativa sobre a enfermidade da Endometriose, co obxectivo de incrementar a súa visibilidade e contribuir a sensibilizar á sociedade sobre unha doenza que afecta a máis de 60.000 mulleres en Galiza.

Co obxectivo de dar a coñecer a Endometriose, apuntar cales poden ser os seus primeiros síntomas e aclarar todas aquelas dúbidas existentes arredor da doenza, a área de Igualdade da Deputación da Coruña desenvolveu unha xornada en que se reivindicou a necesidade de incrementar a cantidade de campañas informativas e o número de centros especializados no tratamento desta enfermidade.

No transcurso da sesión, a responsable da área de Benestar Social e Igualdadeda Deputación da Coruña, Ánxela Franco, subliñou que este tipo de encontros “son imprescindíveis” para dar a coñecer unha enfermidade que “en moitas ocasións pasa desapercibida até o momento no que é diagnosticada”, e aproveitou a súa intervención para instar a todas as administracións públicas a “colaborar e apoiar o desenvolvemento de proxectos de investigación que contribúan a dar coa súa orixe e atopar algún tratamento global” co que combater a endometriose.

Baixo a coordinación de Cristina Bajo e Cristina Cotelo, a xornada divulgativa botou a andar coa exposición da xinecóloga do Chuac, Beatriz Alvar, quen desde o punto de vista médico realizou un achegamento á doenza, analizando desde a detección dos seus síntomas iniciais, até as solucións e axudas existentes na actualidade para mitigar parte dos seus efectos.

De seguido, a representante da Asociación de Mulleres con Endometriose ‘querENDO’, María González Rumbo, xunto coa activista e creadora da campaña ‘Viva Valente Vitoriosa’, Marta Gallo, participaron nunha mesa redonda en que se abordaron as principais eivas e como afecta á vida cotiá das mulleres esta enfermidade.

Durante a charla, María González Rumbo fixo especial fincapé nas “erradas diagnoses iniciais” dos síntomas da endometriose, e asegurou que “en moitas ocasións estos non se enfocan ben e tenden a ser normalizados, ao considerarse como dores propias da menstruación, infeccións ou trastornos da dor pélvica, entre outros”. Así, cualificou a enfermidade como unha “epidemia invisible”, en alusión ao descoñecemento xeralizado que teñen moitas persoas que padecen  endometriose.

Sobre este particular, González Rumbo salientou que estamos “ante unha enfermidade que conta cun retraso medio na súa diagnose de 8 anos”, unha demora que, como apuntou, deixa patente “a necesidade de crear unidades especializadas e de atención multidisciplinar”, que analicen a enfermidade dende diferentes ángulos pois, segundo a súa evolución, esta pode chegar a afectar a diferentes órganos.

Co ánimo de atopar solucións e ampliar o coñecemento sobre a endometriose, a representante da asociación querENDO apuntou tamén que “o asociacionismo é unha cuestión fundamental para as mulleres” e afirmou que “dende a sororidade, a escoita e o compartir experiencias” pódense identificar algún dos síntomas relacionados coa enfermidade.

Nesta mesma liña, Marta Gallo, incidíu en que “un dos principais problemas que temos en Galicia é o escaso número de centros especializados existentes”, lamentando que, soamente as cidades da Coruña, Vigo e Ourense, contan con unidades de atención específica para esta enfermidade.

“A cantidade de centros especializados en Galiza é insuficiente e nin sequera abondan para atender ás 9.000 mulleres que se atopan na fase máis avanzada da enfermidade”, explicou.

Pola súa parte, a coordinadora da xornada, Cristina Bajo, puxo o foco “na escasa visibilidade e na falla de campañas de informativas“ sobre unha enfermidade que padecen 1 de cada 10 mulleres, sinalando que “existe unha grande cantidade de mulleres que padecen endometriose e non o saben”.

Ademais, Cristina Bajo lamentou que “non se estean a tomar as medidas necesarias para abordar unha enfermidade común que afecta en Galiza a máis de 60.000 mulleres”, unha situación, puntualizou “que dá lugar a un modelo de violencia xinecolóxica sobre as mulleres”, expondo as dúbidas sobre se existiría o mesmo desinterese sobre a doenza de padecela os homes.

A xornada rematou coa actuación da artista Mina Clown, quen por medio da empatía e do humor amosou as diferentes realidades que viven as mulleres que sofren Endometriose e puxo de manifesto que se poden superar as barreiras dunha enfermidade que, actualmente, segue a ser unha grande descoñecida para a sociedade.

A Endometriose é unha enfermidade común que deriva do crecemento do texido endiometriósico fóra do útero, concentrándose en áreas da cavidade pélvica, como os ovarios, os ligamentos uterinos, a vexiga urinaria ou o intestino. Na actualidade, estímase que 1 de cada 10 mulleres en idade fértil padecen está doenza, unha estatística que situaría o número de doentes en Galicia por enriba dos 60.000 casos.

Comment on this Article:

ENCUESTA SEMANAL

¿Te gusta la nueva web?

Cargando ... Cargando ...