Home » Ayuntamiento » Recent Articles:

O Concello inicia o proceso de resolución do contrato de mantemento dos xardíns históricos da cidade tras cometer a empresa concesionaria dúas infraccións moi graves

mayo 29, 2018 Ayuntamiento Comentarios desactivados en O Concello inicia o proceso de resolución do contrato de mantemento dos xardíns históricos da cidade tras cometer a empresa concesionaria dúas infraccións moi graves

​O Goberno local iniciou o proceso para resolver o contrato da empresa concesionaria do mantemento dos parques e xardíns históricos da cidade debido á comisión de dúas infraccións de carácter moi grave. A Concellería de Medio Ambiente remitiu hoxe a comunicación á empresa IMESAPI, adxudicataria do contrato de conservación e mantemento de Parques e Xardíns no seu lote 4 relativo ás áreas históricas da cidade, que ten 15 días para formular as alegación e presentar a documentación e xustificacións que considere para a defensa dos seus intereses.

O Concello propuxo a resolución do contrato tras constatar deficiencias na prestación do coidado dos xardíns máis antigos da cidade, precisamente os que albergan as especies con maior valor natural e con máis relevancia histórica e patrimonial. Estas deficiencias concretáronse en dúas infraccións graves. A primeira delas, por incumprir en reiteradas ocasións a orde dada dende a Xefatura da Sección de Xardíns no referente ao control de pragas que poden afectar a especies de árbores de extraordinario valor histórico e natura​l destes espazos verdes, unha cuestión, como indica o departamento, de “de extrema gravidade” polo risco que pode supoñer para os exemplares. Ademais, o persoal técnico da Concellería detectou, e así o manifestou en dous informes, “a deficiente prestación” no servizo e “deixamento na conservación e mantemento” en sete xardíns históricos da cidade –Méndez Núñez, San Carlos, Campo da Leña e praza das Atochas, Obelisco, praza da Fariña, praza do Libro e cemiterio de San Amaro–, que presentan mal estado de conservación, falta de poda en árbores e arbustos, mal estado do céspede ou falta de limpeza da vexetación adventicia, entre outras, como se constatou en base ás inspeccións realizadas. Estas deficiencias, que “afectan practicamente a todo o ámbito territorial do contrato”, son a causa da imposición dunha segunda infracción grave.

O Goberno local advertiu e xa sancionou á concesionaria en ocasións anteriores por moitas das deficiencias que volven recoller os últimos informes –unha leve de 800 euros e outra moi grave de 6.001 euros– sen que a imposición destas penalizacións significasen un cambio de actitude por parte da empresa nin un intento por corrixir as deficiencias detectadas. Debido a esta experiencia, o Goberno local decidiu iniciar o proceso para resolver o contrato, acolléndose así á penalización máis alta estipulada nos pregos do contrato.

A Concellería de Participación recibe 25 solicitudes de subvención para actividades e gastos xerais das entidades veciñais

mayo 26, 2018 Ayuntamiento Comentarios desactivados en A Concellería de Participación recibe 25 solicitudes de subvención para actividades e gastos xerais das entidades veciñais

A Concellería de Participación e Innovación Democrática vén de pechar o prazo de recepción de solicitudes de subvención para apoiar o mantemento e as actividades das asociacións veciñais do municipio. A terceira convocatoria do programa ​Barrios en movemento!, ​ao que o Concello destina 40.000 euros, conta con dúas liñas de axuda destinadas, por unha banda, á posta en marcha de programas, proxectos ou actividades de interese cívico, social ou cultural que favorezan a participación cidadá e que teñan un carácter complementario respecto dos programas municipais, así como para cubrir gastos xerais de funcionamento das asociacións que non dispoñen dun local propio nin municipal en réxime de cesión gratuíta.

A concelleira Claudia Delso explica que este ano o número de solicitudes recibidas de entidades veciñais inscritas no Rexistro Municipal de Asociacións Coruñesas (REMAC) é o mesmo que na pasada edición, 25, aínda que subliñou “o acceso a estas axudas, por vez primeira, de algunhas entidades veciñais que non participaron nas anteriores edicións”. “É importante que estas liñas de axuda contribúan a dinamizar o tecido asociativo veciñal, apoien ás asociacións recentemente constituídas e posibiliten que aquelas outras menos activas poidan reactivarse”, apunta a edil, quen salienta o incremento do número de tramitacións realizadas a través da sede electrónica municipal, feito que vinculou co recente convenio de colaboración asinado entre o Concello e a Federación de Asociacións Veciñais da Coruña e a Área Metropolitana e que ten como obxectivo facilitar a información e a participación do tecido asociativo da cidade. “As entidades contaron nesta ocasión co acompañamento da Federación, que se comprometeu á prestación de apoio para á participación en programas municipais e de asesoramento para a realización de trámites administrativos, entre outras cuestións”, sinalou. Nas vindeiras datas, a área que dirixe Claudia Delso procederá a examinar as solicitudes recibidas e requirir a documentación necesaria para, posteriormente, convocar á comisión de valoración e ditar a resolución provisional.

Para máis información sobre estas e outras liñas de traballo da Concellería, pódese consultar o web municipal ​www.coruna.gal/participacion

O Concello asina un convenio de colaboración con Mulleres Colleiteiras para favorecer a contratación dunha persoa responsable da xestión da cooperativa

mayo 7, 2018 Ayuntamiento No Comments

​A concelleira de Igualdade e Diversidade, Rocío Fraga, e a presidenta de Mulleres Colleiteiras Sociedade Cooperativa Galega, Violeta Romero Gabarri, asinaron o convenio que establece o marco de colaboración entre a administración local e a entidade social coa finalidade de outorgar unha subvención de carácter nominativo para a contratación dunha persoa responsable da xestión da cooperativa, que se dedica á reciclaxe de aceite doméstico e que está formada por mulleres que se atopaban en situación de vulnerabilidade. Como expón a responsable municipal, a medida favorecerá a creación dun posto de traballo remunerado a xornada completa que permitirá a Mulleres Colleiteras desenvolver a súa actividade que, considera, “de interese social para o conxunto da comunidade”. “Estamos a falar dunha entidade que, a través do traballo das persoas que a integran, produce en comúns bens e servizos para terceiros, á vez que mellora a súa calidade e condición de vida”, apunta a concelleira, quen destaca que este novo convenio “afonda no compromiso do executivo coruñés polo incremento do emprego feminino así como por acompañar e favorecer a posta en marcha de proxectos de economía social na cidade”.

Así, a través do acordo subscrito, o Concello achegará 25.000 euros para a contratación dunha persoa encargada da cooperativa que, actualmente, é a responsable da recollida e xestión dos residuos domésticos derivados do uso de aceites vexetais nos contedores habilitados para tal fin no termo municipal. Actualmente A Coruña conta con 42 depósitos especiais –que chegarán até 62 no presente exercicio, algúns deles por proposta veciñal dos Orzamentos Participativos– que están situados ao carón de centros cívicos, mercados municipais e outros equipamentos de uso habitual por parte da veciñanza. Desde a súa posta en marcha en xullo de 2016, na cidade cuadriplicouse o aceite recollido, pasando dos 1.100 litros até os 4.400 recollidos no pasado 2017.

… Leer más

A Concellería de Medio Ambiente sortea o 4 de maio as parcelas das ecohortas na Agra do Orzán, Eirís e Novo Mesoiro, para as que foron admitidas 290 solicitudes

abril 25, 2018 Ayuntamiento No Comments

​A Concellería de Medio Ambiente realizará o sorteo das parcelas das ecohortas da Agra do Orzán, Eirís e Novo Mesoiro o próximo 4 de maio, venres, no Kiosko Alfonso ás 17.30 horas, despois de publicar a lista final de solicitudes admitidas, unha vez resoltas as alegacións e revisada a documentación aportada polas persoas e entidades solicitantes. En total, sortéanse 218 parcelas entre as 290 solicitudes aceptadas, xa que foron excluídas nesta punto da adxudicación 34 persoas e unha entidade por non presentar a documentación acreditativa ou por non cumprir cos requisitos da convocatoria. A cesión do terreo para o cultivo ecolóxico será de dous anos, que se poderá prorrogar un máis, sen chegar a exceder os tres.

As persoas e entidades adxudicatarias disporán de 10 días hábiles, dende a data do sorteo, para presentar nas oficinas da Concellería de Medio Ambiente o documento de aceptación da parcela asinado e acompañado dunha fotocopia do seu DNI. Este paso é fundamental para poder acceder a súa adxudicación, xa que se non se cumprimenta entenderase que a persoa ou entidade renuncia á parcela outorgada. As persoas que quedaron fóra do sorteo, no que se elixirá unha letra a partir da cal se asignan as parcelas por orde alfabética, conformarán a lista de espera. Entre as parcelas outorgadas atópanse dúas concibidas con fins educativos na ecohorta da Agra do Orzán, que xestionarán SOS Racismo Coruña e a Anpa do Colexio Cid, así como unha da Asociación de Veciños Uxío Carré que se atopa no Parque de Eirís. Estas entidades e todas as persoas que reciban unha parcela recibirán formación en agricultura ecolóxica, así como asesoramento e acompañamento legal e formativo para a constitución das comunidades de persoas usuarias, boas prácticas a aplicar nestes terreos municipais e guías sobre o asociacionismo.

Nas tres ecohortas obxecto desta convocatoria -nas que se reservaron cotas para persoas xubiladas ou maiores de 65 anos, veciños e veciñas receptoras de rendas sociais e para asociacións sen ánimo de lucro e centros públicos de ensino dos distritos ou áreas colindantes- hai 218 parcelas e 24 mesas de cultivo destinadas a persoas con mobilidade reducida. A máis grande é a da Agra do Orzán, que ten 112 parcelas e 10 mesas de cultivo, seguida da do Parque de Eirís, onde se prepararon 77 parcelas e 10 mesas, e Novo Mesoiro, que está dividida en 29 áreas e catro mesas.

O centro municipal de empresas Accede Papagaio acolle un encontro participativo ‘Dillo ti’ o próximo sábado 21 de abril

abril 20, 2018 Ayuntamiento No Comments

O alcalde e o resto de concelleiras e concelleiros do grupo de Goberno participarán este sábado día 21 de abril nun novo encontro participativo ​Dillo ti​, que se celebrará no centro municipal de empresas Accede Papagaio e comezará as 12.00 horas. O Goberno local puxo en marcha este programa de xuntanzas abertas entre a veciñanza e o executivo coruñés, que se celebran de xeito mensual en distintos barrios do termo municipal, co obxectivo que a cidadanía sexa partícipe da acción de Goberno. A finalidade desta nova canle de participación cidadá é crear espazos de encontro para facilitar que as veciñas e veciños trasladen, de xeito directo e sen intermediación, as súas demandas e vontades ao executivo municipal.

Tras visitar os barrios dos Castros, Palavea, Monte Alto, Os Mallos, Agra do Orzán, Novo Mesoiro, Monelos, Cidade Vella, Os Rosales, O Castrillón, Sagrada Familia, Peixería, A Silva, Feáns, Adormideras, Labañou, Eirís, Santa Margarida, ​Elviña e Nostián, a nova xuntanza terá lugar na rúa Hospital, 19, baixo e terá dunha duración aproximada de 90 minutos. Durante o encontro haberá un servizo de tradución á linguaxe de signos e outro de conciliación con obradoiros infantís co obxectivo de facilitar que ás persoas con nenas ou nenos ao cargo poidan asistir. ​Todas e todos os menores da cidade que teñan interese en asistir a este taller, poderán facelo ata completar o número de prazas dispoñibles. Para participar neste espazo non será necesarioinscribirse, senón unicamente acudir ao centro veciñal no horario de celebración do encontro.page1image1634848

Toda a información destas xuntanzas está dispoñible na web municipal, no enlacewww.coruna.es/conversascoalcalde​, así como nos vídeo resumos de cada unha delas, que se poden ver na canle oficial do Concello na plataforma Vimeo ​www.vimeo.com/concellocoruna​.

ENCUESTA SEMANAL

¿Te gusta la nueva web?

Cargando ... Cargando ...