Home » coruna » Recent Articles:

O goberno local proporá ao Consello Consultivo que chegue até o final e examine outras tres adquisicións máis de inmobles para dar garantías ás políticas públicas de vivenda

septiembre 13, 2018 coruna Comentarios desactivados en O goberno local proporá ao Consello Consultivo que chegue até o final e examine outras tres adquisicións máis de inmobles para dar garantías ás políticas públicas de vivenda

O concelleiro de Rexeneración Urbana e Dereito á Vivenda, Xiao Varela, trasladou este mércores a intención do goberno local de “chegar até o final” no que respecta á revisión do Concurso Público de Adquisición de Vivenda posto en marcha pola administración local e que tiña como obxectivo aumentar o parque público de inmobles destinado a ofrecer alternativas habitacionais dignas á veciñanza en situación de vulnerabilidade. Así, á vista da doutrina dos ditames do Consello Consultivo respecto das dúas propostas de resolución trasladadas polo executivo municipal sobre dúas das vivendas adquiridas (en concreto, as ubicadas nas rúas Joaquín Martín Martínez e Santander), o goberno local tomou a determinación de enviar outras tres propostas ao órgano consultivo referidas a outros tres inmobles comprados polo Concello no marco do citado concurso. Segundo indicou Varela, “este procedemento é necesario para dar garantías xurídicas ás políticas públicas de vivenda, unha prioridade para o grupo de goberno”.

Segundo explicou á prensa, nunha comparecencia pública, o Consultivo remitiu no día de onte ao Concello os dous ditames solicitados polo goberno local, que elevou a este órgano dúas propostas de resolución, elaboradas previo informe da Asesoría Xurídica municipal, en relación á revisión de oficio das autorizacións para a adquisición de dúas vivendas dentro do concurso público de adquisición: unha ubicada en Joaquín Martín Martínez e outra na rúa Santander. As citadas resolucións aprecian deficiencias no desenvolvemento do concurso de compra de vivenda. “Como recordaredes, foi a Asesoría Xurídica municipal a que elaborou, no primeiro cuadrimestre do ano, un informe que eu mesmo lle solicitei e no que se analizaba, de forma pormenorizada, o expediente do concurso. Ese informe xa apreciaba unha certa indefinición nas bases do procedemento, algo que motivou a decisión do goberno local de iniciar a revisión de oficio da compra da vivenda da rúa Joaquín Martín Martínez. Ademais, e en atención a unha solicitude do Pleno, tamén se remitiu a nosa proposta de revisión da compra doutro inmoble, neste caso na rúa Santander”, recordou Varela. “O Consello Consultivo tamén aprecia deficiencias no desenvolvemento do concurso de compra de vivenda. É certo que foi mellorable, e parece probado que existiron erros humanos na comisión técnica. Erros que poñen en cuestión varias das adquisicións”, manifestou.

En concreto, o órgano consultivo estima, como xa propugnaba o Concello na súa proposta de resolución, que o acto administrativo no caso da vivenda da rúa Joaquín Martín Martínez é nulo. Neste caso, estima que o inmoble en cuestión incumpre o parámetro de altura esixido ás vivendas, polo que o acto de adquisición adoece dun requisito esencial que determina a súa nulidade. “Este ditame pronúnciase no mesmo sentido da Asesoría Xurídica Municipal, que xa propuña a nulidade desta adquisición ante os posibles erros detectados no procedemento”, explicou.

Pola contra, a proposta de resolución remitida dende o Concello para a compra do piso da rúa Santander propugnaba a desestimación da nulidade da autorización da compra, en base aos informes tanto da Asesoría Xurídica como do propio servizo de rehabilitación e vivenda. Non obstante, neste caso, o órgano consultivo ditamina que tamén procede a nulidade, xa que considera que o inmoble en cuestión incumpre un requisito esencial das bases, no relativo ao que debían ser vivendas exteriores “entendendo por tales as que dispoñan de, polo menos, dúas pezas principais con ocos de luz á vía pública”. No caso da rúa Santander, o piso tiña dous ocos, pero só un deles daba á vía pública.

… Leer más

O xurado destaca a harmonía dos viños e tapas no Concurso de Maridaxe Picadillo

septiembre 13, 2018 coruna Comentarios desactivados en O xurado destaca a harmonía dos viños e tapas no Concurso de Maridaxe Picadillo

A harmonía entre viños e tapas foi o eixe principal destacado polo xurado na categoría de maridaxe no Concurso de Tapas Picadillo. As doce persoas especialistas percorreron os 18 establecementos participantes nesta categoría desta XV edición e as catro zonas nas que se estrutura o certame ofreceron ao xurado as 22 tapas de produtos tradicionais e creativos en combinación con viños da D.O Ribeira Sacra.

Durante toda a mañá, xornalistas, sumilleres e recoñecidos hostaleiros e hostaleiras de distintos puntos de Galicia, así como, representantes da D.O Ribeira Sacra realizaron as tres rutas gastronómicas partindo do Alia Die para, posteriormente, continuar por distintos establecementos da cidade. O coordinador dos xurados, o sumiller Luís Paadin, subliñou que o máis destacado nas avaliacións foi a “harmonía e a conxunción entre as tapas o e viño escollido, e que sexa o viño o que faga máis grande a tapa e que lle aporte riqueza”. O sumiller destacou, neste sentido, o progresivo traballo dos e das profesionais á hora de acadar este maridaxe entre as tapas e os caldos “algo que se supera cada ano”. … Leer más

A Deputación da Coruña destina case medio millón de euros a actividades de asociacións de cultura tradicional

septiembre 13, 2018 coruna Comentarios desactivados en A Deputación da Coruña destina case medio millón de euros a actividades de asociacións de cultura tradicional

Case medio millón de euros é a cantidade que a área de Cultura da Deputación da Coruña achega a corais polifónicas, bandas de música populares e entidades de música e baile tradicional e formacións musicais de grande formato para o desenvolvemento do seu programa de actividades. A través da liña de axudas en concorrencia competitiva adxudica un total de 475.169, 60 € a 104 entidades.

Máis de cen entidades que traballan no ámbito da cultura tradicional e popular son as beneficiarias da liña de axudas ás que a Deputación da Coruña destina na súa adxudicación provisional un total de 475.169,60 €. A esta cantidade que ten como obxectivo apoiar o programa de actividades das asociacións sumarase en breve a resolución da liña que ten como obxecto contribuír a afortalar os investimentos necesarios para o seu funcionamento. … Leer más

Susana Seivane estrea o seu novo disco “Fa” no X “Lúas de Outono”

septiembre 12, 2018 coruna Comentarios desactivados en Susana Seivane estrea o seu novo disco “Fa” no X “Lúas de Outono”

“Lúas de Outono”, a homenaxe a Manuel María que cada ano se celebra na Coruña, chega a súa décima edición coa estrea de “Fa”,  novo disco de Susana Seivane que será protagonista do espectáculo que terá lugar o vindeiro día 19 de setembro no Teatro Rosalía de Castro da Coruña. A entrada será gratuíta até completar o aforo.

A Deputación da Coruña acolleu este martes a presentación da 10ª edición de “Lúas de Outono”, a homenaxe anual a Manuel María na cidade da Coruña en que pasou os seu últimos anos e que, nesta nova edición, terá lugar o vindeiro  mércores día 19 de setembro ás 20.30 horas nun acto en que se presentará o novo disco “Fa” de Susana Seivane. … Leer más

O Concello abre o prazo de inscrición para o uso dos locais de ensaio no vindeiro semestre

septiembre 12, 2018 coruna Comentarios desactivados en O Concello abre o prazo de inscrición para o uso dos locais de ensaio no vindeiro semestre

A Concello inicia o xoves 13 de setembro o período para que os grupos da cidade soliciten o uso das salas de ensaio municipais durante o vindeiro semestre. O prazo ordinario de inscrición remata o 28 de setembro. As condicións para poder optar a unha das 48 prazas semanais de ensaio, que se ofertan de maneira gratuíta, son que cando menos a metade do grupo sexa menor de 30 anos e que un mínimo do 50% das persoas integrantes estea empadroado na cidade ou cursando estudos nun centro escolar no municipio. As bases da convocatoria, así como a documentación requirida para solicitar unha praza, pódense consultar na web ​locaisdensaio.blogspot.com​, onde está tamén dispoñible o formulario de solicitude para a súa descarga. Os locais de ensaio enmárcanse dentro das políticas dirixidas á mocidade implementadas pola Concellería de Participación e Innovación Democrática “nas que se traballa para ofrecer alternativas de ocio e a xeración de hábitos positivos”, indica a súa responsable, Claudia Delso, quen salienta a creación de espazos como o de dinamización da mocidade na Sagrada Familia, a organización de festivais de cultura urbana, os campamentos de verán ou o programa Nocturnia, entre as actividades dirixidas a este colectivo.

Os locais de ensaio municipais están dotados con toda a infraestrutura necesaria para os grupos, que, ademais de ter un espazo para tocar, dispoñen dun estudio de gravación, un departamento de deseño gráfico e audiovisual para definir a súa imaxe e diversos eventos onde mostrar en directo o seu traballo. Nos últimos tempos, algúns dos grupos usuarios deste servizo teñen avanzado co seu proxecto musical publicando videoclips, editando os seus primeiros discos ou dando concertos, mesmo algúns en eventos como os festivais Portamérica ou Noroeste Estrella Galicia. Grupos como Samarúas, Dequenvessendo, Sala 5, Proyecto Moucho, Theta Waves ou Wondermind comezan a ser uns habituais nos seus correspondentes circuítos musicais, algúns chegando a mostrar a súa música en lugares como Madrid, Ermua ou Toledo.