Home » coruna » Recent Articles:

O Goberno local iniciará nas vindeiras semanas as obras de reurbanización da rúa Juan XXIII, “o primeiro paso para avanzar na revitalización do mercado de San Agustín e a súa contorna”

Julio 20, 2017 coruna No Comments

Os concelleiros de Emprego e Economía Social, Alberto Lema, e de Rexeneración Urbana e Dereito á Vivenda, Xiao Varela, así como a concelleira de Participación e Innovación Democrática, Claudia Delso, mantiveron na tarde deste venres un encontro con representantes das asociacións de praceiras e de vendedoras de San Agustín, así como con outros colectivos da zona, para darlles a coñecer os plans do Goberno municipal para a revitalización deste mercado e da súa contorna. Dentro deles, a primeira medida, que comezará de forma inminente, pasa pola reurbanización da rúa Juan XXIII, que comezará nas próximas semanas e que servirá para renovar as beirarrúas, que pasarán a ser de pedra, en continuidade coa contorna da igrexa de San Jorge, e que servirá tamén para igualar a altura do firme co das beirarrúas no cruzamento con Pío XII, no lateral do mercado, de cara a mellorar a visibilidade nese punto e facela máis transitable.

Esta actuación –que saíu a concurso por un importe de 98.367,25 euros e ten un prazo de execución previsto de en torno a mes e medio– supón, como indicou o responsable municipal de Rexeneración Urbana, a primeira fase dun plan que continuará no último trimestre deste ano na rúa Marqués de Pontejos, que deixará de estar aberta ao tráfico xeral para acoller unicamente residentes e vehículos de carga e descarga, “de cara a converterse nun traxecto máis cómodo para o tránsito cara ao mercado e reforzar o seu uso por parte da veciñanza”. Xa no 2018, o Goberno local ten previsto actuar na parte contigua ao frontal do edificio do mercado, que pasará a ser de plataforma única, para gañar continuidade coa praza do Humor. Tal e como adiantaron esta tarde os concelleiros e a concelleira durante a xuntanza cos colectivos vinculados ao mercado, a intención do Goberno local, xa a medio prazo, é poder conectar esta zona con Panadeiras a través dun inmoble propiedade do Arzobispado situado na rúa Pío XII. “Isto permitiría, tamén, ter conexión co aparcadoiro do Papagaio para que tamén a veciñanza e persoas usuarias desta zona poidan facer uso del”, sinala Varela, quen recorda que a posibilidade desta conexión está recollida no Pepri, e quen indica que o Concello xa iniciou as conversas co Arzobispado de cara a poder facerse co edificio.

“Todo este plan, que comezamos agora pero que se acometerá en distintas fases, ten como obxectivo final a revitalización da zona, facilitando que as persoas poidan achegarse ao mercado e á súa contorna, gañar afluencia para este ámbito e comodidade para os veciños e veciñas”, pon de relevo o concelleiro Alberto Lema, quen se remite á remodelación do Campo da Leña como “a senda a seguir”. “Hoxe ninguén nega que a actuación que se desenvolveu alí foi positiva e contribuíu a poñer en valor a este espazo, tanto desde o punto de vista do uso do espazo público, como comercial e tamén residencial”, observa. Como fai notar, o encontro deste venres serviu tamén para recoller as impresións e opinións dos colectivos que, como ocorre coas praceiras e vendedoras do mercado de San Agustín, desenvolven a súa actividade nesta zona.

O Concello abordará “de forma inminente” actuacións na Rolda de Monte Alto e na rúa Marola dentro do proceso do Camiño do Vixía, destinado a mellorar a calidade do espazo público do barrio

Julio 20, 2017 coruna No Comments

O concelleiro de Rexeneración Urbana, Xiao Varela, e o de Mobilidade Sostible, Daniel Díaz Grandío, xunto coa concelleira de Participación e Innovación Democrática, Claudia Delso, presentaron este mércores as actuacións que o Concello iniciará de forma inminente nas rúas da Marola e Rolda de Monte Alto, dentro do proxecto do Camiño do Vixía, unha proposta impulsada polo Goberno local e dirixida a mellorar a habitabilidade de espazos públicos no barrio de Monte Alto. O responsable de Rexeneración Urbana indicou que, debido a alta densidade do barrio, o Executivo municipal tomou a determinación de intentar xerar unha senda de prioridade peonil que vertebre o barrio e poida compaxinarse co tráfico rodado, discorra pola maior extensión posible do barrio, empregue as pendentes naturais de terreo e conecte entre si a maior cantidade posible de equipamentos públicos. “O que pretendemos é que esta senda conecte da maneira máis natural posible os equipamentos que vertebran o barrio como é o caso do Campo da Leña, o cárcere provincial e o propio punto do Vixía situado entre os equipamentos escolares do barrio”, dixo o edil, quen engadiu que en todo o proceso “ademais, nos apoiamos na memoria histórico e nos elementos patrimoniais aínda existentes no barrio”.

O proceso, que comezará a abordarse de forma inminente coas primeiras actuacións anunciadas en Rolda de Monte Alto e na Marola, vén referendado ademais por un proceso de participación cidadá do que deu conta a concelleira Claudia Delso. “Iniciamos todo este procedemento como un proceso participativo máis, enmarcado dentro das actuacións que levamos a cabo en A Porta Aberta, en novembro de 2016. Entre diversas actuacións desenvolvimos tres foros de debate e distintas charlas e obradoiros, especialmente coa comunidade educativa do barrio, que participou de forma moi activa”, comentou a responsable municipal, quen tamén destacou outras actuacións como “un paseo crítico e outras accións coas que se foi realizando un mapeo no barrio onde se detectaron os puntos que presentan maior problemática e onde se visibilizan os principais problemas de mobilidade”. Ademais destes encontros onde se interactuou coa veciñanza do barrio en xeral, de forma individualizada, pero tamén con colectivos organizados escolares, veciñais e xuvenís, leváronse a cabo, de xeito paralelo, encontros sectoriais que complementaron a información recollida ao longo de todo o proceso. “En total, participaron ao redor de 200 persoas”, comentou Delso. … Leer más

Xustiza Social presenta o programa ‘Non Pases Por Un Mal Trago’, destinado “a informar, formar e facer reflexionar” a menores que recibiron sancións por consumo de alcol

Julio 19, 2017 coruna No Comments

A concelleira de Xustiza Social e Coidados, Silvia Cameán, presentou en rolda de prensa o programa municipal Non Pases Por Un Mal Trago , que se desenvolve en colaboración coa entidade social sen ánimo de lucro Adafad (Asociación de Axuda a Familiares de Drogopendentes) e que ten como obxectivo “educar, formar e facer reflexionar a menores que foron sancionados por consumo de alcol”. En concreto, na rolda de prensa na que estivo acompaña da de María José Lamas, directora de Adafad, a representante municipal indicou que o programa está dirixido a todos e todas aquelas menores ás que o Concello impuxo unha sanción por consumo de bebidas alcólicas. Este programa dá a posibilidade aos e ás rapazas sancionadas de substituír a multa pola realización dun programa formativo, impartido por Adafad, sobre os problemas derivados do consumo de alcol. “O obxectivo fundamental deste programa é que os e as menores de idade teñan toda a información sobre as consecuencias nocivas do consumo e do abuso do alcol”, destacou Cameán. “Esta iniciativa vai en consonancia coa liña de actuación deste Goberno. Cremos que a loita real e efectiva contra as adicións non se pode combater mediante multas e sancións, senón dende a educación. Non queremos criminalizar aos rapaces e as rapazas, queremos que reflexionen, que se dean conta do que implica o alcol e, sobre todo, queremos darlles alternativas”, indicou a edil, quen recordou as diversas actividades dirixidas á mocidade postas en marcha polo Goberno local. “Este Goberno non aposta pola mera prohibición, senón pola formación e a concienciación como o mellor antídoto contra comportamentos nocivos”, dixo Cameán que indicou que, en moitas ocasións, as sancións “acaban por ser un ‘castigo’ para as nais e pais máis que un sistema efectivo para a concienciación dos e das fillas”. “Cremos que esta medida vai ser un gran avance na consecución do obxectivo de concienciar aos e ás menores de idade sobre o consumo de alcol”, insistiu.

Cada hora que o menor adique a este programa formativo de substitución de multas equivale a 20 euros de sanción, sen que o rapaz ou rapaza poida, en ningún caso, superar as 300 horas. As actividades (charlas individuais e colectivas) desenvolveránse na propia sede de Adafaf (Rosalía de Castro, 13-1oD). Cameán explicou que os e as menores sancionadas por cometer infraccións reguladas na Lei 11/2010 do 17 de decembro de prevención do consumo de bebidas alcohólicas poderán solicitar participar neste programa coa autorización dos seus representantes legais a partir xa deste momento.

A participación nestes cursos poderá solicitarse no prazo de dez días a partir do día seguinte á recepción da notificación de imposición de multa. De cara a fomentar que os e as menores de idades sancionadas poidan acceder a este programa, o Concello decidiu que a comunicación de imposición de multa vaia acompañada por un formulario para solicitar a participación en Non Pases por Un Mal Trago. O mesmo tamén pode descargarse na web municipal de servizos sociais, no apartado de documentación. Posteriormente, a solicitude poderá presentarse en calquera das sedes do rexistro municipal de entrada de documentos. Unha vez presentada a solicitude, o Concello enviará unha notificación de aceptación. A partir de aí o ou a solicitante terá un prazo de dez días para acudir a Adafad.

Pola súa banda, a directora de Adafad explicou que, segundo os últimos estudos entre o estudantado galego, o alcol segue a ser a substancia psicoactiva máis estendida. “O programa do que estamos a falar traballa a psicoeducación preventiva. Queremos diminuír o consumo de alcol, pero facendo que a xuventude sexa consciente do risco e tendo ademais ferramentas para afrontar estas situacións”, comentou.

A Coruña, Santiago, Ferrol, Barcelona, Madrid, Zaragoza, Valladolid, Cádiz, Valencia, Huesca e Terrassa sitúanse en contra das emendas presentadas por PDeCAT e C’s ao proxecto de Lei de Contratación Pública, que atacan á autonomía dos municipios

Julio 19, 2017 coruna No Comments

Os concellos da Coruña, Santiago, Ferrol, Barcelona, Madrid, Zaragoza, Cádiz, Valencia, Huesca e Terrassa denunciaron que varias emendas presentadas polo Partit Demòcrata Europeu Català (PDeCAT) e Cidadáns (C’s) ao proxecto de Lei de Contratación Pública atentan contra a autonomía local dos concellos. En concreto, poñen impedimentos aos diferentes procesos de municipalización que se están levando a cabo. As emendas presentadas por estes dous partidos propoñen a modificación de varias normativas, como a Lei de Bases do Réxime Local e o texto refundido das disposicións legais vixentes en materia de Réxime Local, aprobado por Real Decreto Lexislativo 781/1986 do 18 de abril coa intención de:

– Facer preceptivo nos procesos de remunicipalización un informe do órgano competente en materia da defensa da competencia. Este informe sería de obrigatorio cumprimento en caso de monopolio do servizo.

– Só se poderían facer estas internalizacións no caso de que non existisen limitacións ou restricións de tipo orzamentario en relación ao incremento do número de empregados públicos ou da masa salarial.

– Facer que fose necesario modificar a relación de postos de traballo da empresa/administración que subroga, que os lugares que se creasen fosen de carácter indefinido e que a súa cobertura convocásese con carácter previo á finalización dos contratos.

– Que, ou ben o Ministerio de Facenda ou ben as CCAA, debesen visar as remunicipalizacións.

– Que esta norma tivese carácter retroactivo.

Estas emendas, que se poden consultar no seguinte link, https://goo.gl/UiT5Kz , buscan engadir burocracia aos procesos de municipalización. Ao mesmo tempo, provocan que os procesos queden en mans dos organismos competentes en materia da defensa da competencia, especialmente nos casos de monopolio do servizo. Quedarán tamén supeditados ao visado doutras administracións. E a incorporación dos traballadores e traballadoras subrogados farase tendo un impacto na taxa de reposición e, por tanto, consumindo oferta pública, xa de seu limitada polas sucesivas Leis Xerais de Orzamentos do Estado.

As emendas que presentan estes dous partidos políticos buscan paralizar os procesos de internalizacións, xa que nas Leis de Orzamentos contemplan sempre limitacións no incremento dos persoais e na masa salarial. Tamén pretenden obrigar a convocar como indefinidas prazas de cobertura temporal. Este redactado establece o carácter retroactivo das medidas, isto significa que se obrigaría a refacer (e previsiblemente anular) procesos de internalización xa finalizados. En definitiva, estas emendas pretenden baleirar de contido a autonomía local, quedando os municipios como delegacións administrativas sen capacidade de decisión en mans do estado central ou, como moito, da comunidade autonómica. Tamén subordinan os dereitos das traballadoras e traballadores, a aplicación da lexislación laboral e o respecto aos dereitos da cidadanía para acceder a servizos públicos de calidade. Por este motivo, os concellos de Barcelona, Madrid, A Coruña, Santiago, Zaragoza, Cádiz, València, Huesca, Ferrol e Terrassa piden que estas emendas sexan retiradas para manter a autonomía municipal.

Esta nova reivindicación da autonomía local ten lugar despois de que o pasado 17 de maio os concellos de Madrid, Barcelona, Valencia, Zaragoza, Valladolid, A Coruña e Terrassa xa presentasen unha declaración municipalista para denunciar as ameazas que supoñía á autonomía local e o financiamento local do entón proxecto dos orzamentos xerais do Estado para 2017. Nese momento, concellos de distinto signo político acudiron ao Congreso para facer oír a súa voz e reclamar ás forzas parlamentarias que protexesen a autonomía local.

O Concello abre o prazo de inscrición para participar na XI Carreira Popular Coruña10, que se celebrará o domingo 8 de outubro no Paseo Marítimo

Julio 18, 2017 coruna No Comments

A Concellería de Culturas, Deporte e Coñecemento abre o prazo de inscrición para participar na décima edición de Coruña10, a carreira popular de maior traxectoria das organizadas polo Concello coruñés. A proba, que se celebrará o próximo 8 de outubro, reforzará o carácter integrador e inclusivo promovido desde a pasada tempada pola área que dirixe José Manuel Sande, e facilitará, de novo, a participación de atletas en cadeira de rodas. O circuíto, homologado pola Real Federación Española de Atletismo, ten un perfil practicamente chairo, que transcorrerá pola calzada do tráfico rodado, sen utilizar ningunha zona peonil, e partirá, como nas dúas anteriores edicións, da avenida da Habana ás 10.00 horas. As e os deportistas populares percorrerán, desde xeito, 10.000 metros polo Paseo Marítimo da enseada do Orzán, achegándose dun extremo a outro do mesmo, entre as rotondas do Millennium e Torre de Hércules. A meta situarase, de novo, fronte o Pazo dos Deportes de Riazor.

En Coruña10, proba na que poderán participar persoas maiores de 18 anos, estableceranse as seguintes categorías: Junior (atletas do ano 1998-1999), Promesa (1995, 1996 e 1997), Senior (desde 1994), catro modalidades de veteranos en función da idade e, por último, a de persoas discapacitadas que disputen a proba en cadeira de rodas (nadas ou nados en 1999 e anos anteriores). Haberá recoñecementos para as primeiras persoas clasificadas de cada categoría, así como para as e os primeiros atletas locais e de Galicia, nunha cerimonia que terá lugar desde as 13.00 horas. A organización, ademais, premiará a todas aquelas persoas que superen o récord da proba, sendo este de 28:09 na categoría absoluta masculina, e 31:40 na feminina. … Leer más

ENCUESTA SEMANAL

¿Te gusta la nueva web?

Cargando ... Cargando ...