Home » coruna » Recent Articles:

A Concellería de Igualdade inicia a Escola de Empoderamento Feminista “para fomentar a toma de conciencia persoal das mulleres” cunha conversa aberta coa pensadora e profesora Silvia Federici

marzo 20, 2018 coruna No Comments

A concelleira de Igualdade e Diversidade, Rocío Fraga, presentou a Escola de Empoderamento Feminista, un programa municipal “con vocación de estabilidade” que nace para ofrecer un recurso de formación para a cidadanía e busca unha participación máis activa das mulleres, así como a creación de redes, a mellora da incidencia política para a igualdade e a inclusión das diversidades nos diferentes ámbitos da vida. “Trátase dunha iniciativa que entronca coa prevención das violencias machistas (en tódalas súas dimensións) e que está vinculada ao traballo de reforzo do empoderamento feminista, esa toma de conciencia persoal de sentirnos as mulleres obxectos de dereitos, de capacidades e de intereses propios”, indicou Fraga.

O calendario de actividades previstas presentarase o vindeiro 3 de abril nun acto de apertura que consistirá nunha conversa aberta coa activista, pensadora feminista e profesora na Universidade de Hofstra de Nova York Silvia Federici que leva por título A nova caza de bruxas, coidados e comúns. Desafíos nas loitas feministas do século XXI e na que tamén participará a profesora do Centro de Estudios de Xénero e Feministas da Universidade da Coruña, Antía Pérez Caramés, como condutora da conversa. A edil mostrou a súa satisfacción por poder contar neste primeiro acto “cunha das persoas máis importantes en pensamento crítico feminista” e que “traballou e traballa moito a importancia de poñer o foco nos traballos reproductivos e na necesidade de que a sociedade, e as feministas, se autoorganicen, como pasou aquí o 8 de marzo”. O acto rematará coa poesía e a música de AldaoLado, o dúo conformado por Lucía Aldao e María Lado.

… Leer más

O Concello celebra con actividades para todos os públicos os Días dos Bosques e da Auga, ademais da Hora do Planeta, “efemérides directamente relacionadas coas liñas de acción destinadas a mellorar o espazo urbano”

marzo 20, 2018 coruna No Comments

O Concello da Coruña, a través da súa área de Medio Ambiente, levará a cabo esta semana actividades que prestan especial atención aos e as máis pequenas con motivo da celebración do Día dos Bosques, o Día da Auga e a Hora do Planeta, efemérides todas elas moi relacionadas coa liña política de defensa e promoción ambiental do executivo municipal. “Estes días D teñen que ver con tres liñas de accións que temos moi presentes na nosa axenda urbana e que pasan por conseguir unha cidade máis sostible”, indica a concelleira de Medio Ambiente, María García, quen, ao fío, recorda os proxectos que está a levar a cabo o goberno local co Plan de Expansión de Arborado, que busca aumentar un 10% este ano os espazos verdes da cidade coa plantación de 1.500 novas árbores e que ten vocación “de continuidade nos vindeiros exercicios”, así como o plan de Vertido Cero, obxectivo que se conseguirá en breve e que trata de evitar calquera tipo de vertedura incontrolada á ría do Burgo por parte do Concello da Coruña. A responsable municipal tamén fai fincapé nos traballos transversais que se están a levar a cabo dende diferentes áreas do goberno para contrarrestar os efectos do cambio climático. “Estamos a falar do maior desafío da humanidade, non só de carácter ambiental senón tamén económico. Con ese obxectivo, o goberno local reactivou neste mandato a Oficina do Cambio Climático, que trata de analizar e aunar todas as accións neste eido”, apunta, á vez que lembra tamén actuacións que se implementarán de xeito inminente, como a mellora da eficiencia enerxética en distintos barrios da cidade como os Rosais, Cidade Escolar, Labañou e Peruleiro por un valor conxunto de máis de 1,5 millóns de euros.

As actividades do Día dos Bosques terán lugar o vindeiro mércores, 21 de marzo, e consistirán nunha plantación de árbores no Paseo das Pontes. Neste caso entre as 10.00 e as 13.00 horas terá lugar unha actividade adicada a alumnos e alumnas do Centro de Educación Especial Nosa Señora de Lourdes Aspronaga, que comezará cunha charla conmemorativa da xornada e continuará coa colaboración dos e das rapazas na plantación da árbore no Paseo das Pontes. … Leer más

A Deputación da Coruña mostra a unanimidade de todos os grupos políticos para recuperar o Pazo de Meirás para patrimonio público

marzo 18, 2018 coruna No Comments

A Deputación da Coruña fixo gala da unanimidade de todos os grupos presentes na súa corporación para presentar a moción que irá ao vindeiro pleno do día 23 de marzo. O texto mostra a unión das vontades para a recuperación do Pazo de Meirás para patrimonio público.

A Deputación instará ao Estado a exercitar as acción administrativas e xudiciais oportunas para os efectos da recuperación do Pazo de Meirás para o Patrimonio Público; trasladará á Xunta, Parlamento de Galicia, goberno do Estado, Cortes do Estado, grupos parlamentarios e todas as institucións e organismos que corresponder o informe histórico-xurídico e procurará a socialización do seu contido. Estes son os puntos principais da moción que entrará na orde do día do pleno do vindeiro venres 23 de marzo e que contará, segundo se anunciou hoxe en roda de prensa, co apoio de todos os grupos con representación na corporación, é dicir, PSOE e BNG, membros do goberno, ademais do Partido Popular, Marea Atlántica, Compostela Aberta e Alternativa dos Veciños. … Leer más

O alcalde reivindica a posición da Coruña como “cidade da cultura” na presentación dos XXII Premios de Teatro María Casares

marzo 17, 2018 coruna No Comments

O alcalde da Coruña, Xulio Ferreiro, participou na presentación da 22 a edición dos premios do teatro galego María Casares, cuxa gala se celebrará o vindeiro mércores, 21 de marzo, no Teatro Rosalía de Castro e que estará marcada polo 40° aniversario do teatro profesional en Galicia. O rexedor salientou que dita iniciativa, que ten lugar dúas semanas despois da celebración dos Premios Mestre Mateo da Academia Galega do Audiovisual, “revalida a idea da Coruña como unha verdadeira cidade da Cultura e referenda a aposta do goberno local polo recoñecemento do patrimonio cultural, así como no acompañamento ás creadoras e aos creadores locais”. Neste sentido, Ferreiro destacou o traballo do executivo coruñés “a prol dun novo modelo de políticas culturais, que fan fincapé na descentralización, pegagoxía e visibilización ás e aos artistas con vinculación á cidade”.

“O goberno local entende A Coruña como unha cidade ilustrada, da memoria e, por riba de todas as cousas, comprometida coa causa das mulleres”, afirmou o alcalde, quen reivindicou “que foron, son e serán imprescindibles para a transformación da nosa sociedade, tamén desde a cultura, como María Casares”. “É unha honra que estes premios recoñezan a figura da nosa veciña, actriz galega no exilio e que destacou sobre as táboas de Europa”, apuntou o primeiro edil coruñés, quen lembrou o compromiso do Concello coa recuperación e a restitución da memoria da figura de Casares con actividades arredor do Día Mundial do Teatro en colaboración coa Asociación de Actores e Actrices de Galicia, “pero tamén de mulleres e homes que fixeron da Coruña unha cidade máis libre e máis xusta”.

O alcalde, que reivindicou o papel fundamental da muller para o desenvolvemento profesional das artes escénicas, “en especial das actrices, directoras, escenógrafas, guionistas, produtoras, músicas, responsables de vestiario, maquillaxe, das operarias da tremoia ou das asistentes como público”, convidou á cidadanía á gozar dunha gala “eminentemente feminina” e a apoiar ao sector “enchendo os nosos teatros cada día”.

… Leer más

O Concello inicia o procedemento de recuperación dos terreos de dominio público da Comandancia de Obras coa fin de “iniciar a obra que permitirá converter o espazo nun novo equipamento municipal destinado á mocidade da cidade e de toda a área”

marzo 17, 2018 coruna No Comments

O Concello iniciará a vindeira semana o procedemento para recuperar a posesión da parcela de titularidade municipal e dominio público das Naves do Metrosidero coa fin de acometer as obras previstas e converter o espazo nun novo equipamento municipal destinado á mocidade da cidade e da área metropolitana. Este procedemento será aprobado o vindeiro luns en Xunta de Goberno Local e deriva da incorporación ao patrimonio municipal, o pasado xaneiro, duns 90.000 metros cadrados de solo no ámbito da Maestranza, correspondentes con 17 parcelas incluídas no convenio urbanístico que o Concello da Coruña firmou en 1984 coa, entón, Xerencia de Infraestruturas do Ministerio de Defensa. A principio de ano, o executivo local aprobou o acordo de cesión, por parte de Defensa, dos citados terreos á administración local, entre os que se atopan os situados na Comandancia de Obras e, até ese intre, titularidade do Instituto de Vivenda, Infraestruturas e Equipamento da Defensa (INVIED).

Na Xunta de Goberno Local que se celebrará este luns está previsto aprobar a incoación do procedemento de recuperación da parcela e notificar ese acordo ás persoas que actualmente están a desenvolver actividades na mesma. Unha vez sexan informadas, terán un prazo de 10 días para presentar alegacións ou os documentos que estimen oportunos. A potestade de recuperación posesoria non é facultativa xa que, segundo a legalidade vixente, o seu exercicio é obrigatorio; aínda máis cando se trata da execución dunha obra que ten como destino a posta en marcha dunha dotación pública conforme ao planeamento urbanístico e que non pode levarse a cabo sen ter a plena dispoñibilidade do ben.

… Leer más

ENCUESTA SEMANAL

¿Te gusta la nueva web?

Cargando ... Cargando ...