Home » coruna » Recent Articles:

Culturas colabora coa posta en marcha da segunda edición de ‘Libros a monte’, que apela á memoria da cidade “a través da visibilización das mulleres libertarias”

marzo 14, 2018 coruna No Comments

O concelleiro de Culturas, Deporte e Coñecemento, José Manuel Sande, participou na presentación dunha nova edición do proxecto Libros a monte, iniciativa posta en marcha o pasado verán pola plataforma feminista A Sega e que ten como obxectivo fomentar a cultura do libro e visibilizar a creación feita por mulleres. A xornada, que terá lugar este domingo 18 na Fundación Luis Seoane, renderá homenaxe ás Mulleres libres e libertarias da Coruña a través de numerosas charlas, obradoiros, proxeccións e espectáculos dirixidos a todos os públicos que se desenvolverán, ao longo de todo o día, desde as 11.30 horas. Tal e como avanzou o concelleiro, o evento “referenda a aposta do goberno local polo sector”, a través dun programa “versátil e variado que apelará á memoria da cidade e a súa propia imaxe libertaria, cunha significación que, desafortunadamente, non existe noutras cidades”.

A presentación contou coa participación das impulsoras da xornada e membros de A Sega, Emma Pedreira e Paula Gómez del Valle. Pedreira avanzou que a intención deste evento monográfico é “rescatar a memoria dunha cidade en feminino, que hai 100 anos iniciou unha revolta e onde a semana pasada demostrou unha vontade feminista de xeito abrumador”, á vez que se visibilizan figuras históricas coruñesas como María Casares, Chelo Rodríguez ou La Corales. Así, a primeira das actividades, que terá lugar entre as 11.00 e as 11.30 horas, será un roteiro virtual polas casas de acollida anarquistas do barrio das Atochas, “mulleres que loitaron contra o franquismo e pola liberdade”, apuntou Pedreira. A continuación, presentarase Arte+muller+Galicia , documental de Rosaio Sarmiento, e comezará unha dupla programación dirixida, por unha banda, ao público adulto –que inclúe a presentación do poemario O único lugar onde ficar inmóbil, de Arancha Nogueira ou a publicación Mulleres Bravas da nosa historia– , e, por outra, ás nenas e nenos, con contacontos de Mercedes Queixas e Saleta Fernández.

… Leer más

O Concello recibe 320 solicitudes para a concesión dunha parcela nas ecohortas urbanas de Novo Mesoiro, Agra do Orzán e Eirís

marzo 14, 2018 coruna No Comments

A Concellería de Medio Ambiente recibiu un total de 320 solicitudes para facer uso das parcelas das ecohortas urbanas situadas nos barrios de Novo Mesoiro, Agra do Orzán e Eirís, tras o peche onte, 12 de marzo, do prazo dispoñible para facer a petición. Estas tres novas áreas de hortas urbanas contan con 217 parcelas, unha parte delas reservadas para persoas xubiladas ou maiores de 65 anos, veciños e veciñas receptoras de rendas sociais e para asociacións sen ánimo de lucro e centros públicos de ensino dos distritos ou áreas colindantes. A concesión será por dous anos, pero pode prolongarse ate os tres, e está libre de abonar taxas.

Tras o peche do prazo de petición e a revisión das solicitudes, publicarase en 15 días a relación provisional de persoas admitidas e excluídas para o que se terá en conta se a solicitude se axusta aos termos da convocatoria, se cumpre os requisitos e se os datos aportados son correctos. A continuación, abrirase un periodo de 10 días para reclamacións. Unha comisión integrada por persoal do Servizo de Medio Ambiente será a encargada de puntuar, segundo os criterios que se especifican nas bases, as solicitudes que superen este primeiro paso. As peticións que non obteñan máis de 10 puntos quedarán excluídas da convocatoria, mentres que o resto se incluirán no sorteo de adxudicación.

A construción das tres novas áreas de ecohortas, así como o seu deseño e a selección das ubicacións, formaron parte de procesos participativos. O proxecto incide no fomento da agricultura ecolóxica, polo que as persoas que reciban o terreo deberán cultivalo empregando técnicas ecolóxicas, obxectivo para o que contarán con programas de formación vinculados á xestión de hortas, produción ecolóxica e compostaxe comunitaria.

Toda a información sobre o proceso de adxudicación das parcelas destas tres ecohortas pode atoparse na páxina web http://www.ecohortas.coruna.gal

O goberno local inicia hoxe as obras de construción do carril bici na avenida Salgado Torres, “que conlevarán a mellora da seguridade peonil no túnel e na súa contorna”

marzo 14, 2018 coruna No Comments

O Concello da Coruña iniciará hoxe, mércores 14, as actuacións vinculadas á construción do carril bici na avenida Salgado Torres, especificamente, na contorna e no interior do propio túnel situado entre a rúa Ramón y Cajal e a glorieta de desvío á rúa Xeral Rubín. Serán traballos de execución dos itinerarios específicos ciclistas e peonís, aos que o Concello destinará 146.318,25 euros e que, ademais, estarán acompañados da mellora dos servizos da infraestrutura. O proxecto do goberno local suporá a disposición do carril-bici en ambos sentidos na avenida, que contará con novas beirarrúas nas beiravías que transcorren entre a glorieta de Xeral Rubín e a boca do túnel. O edil de Rexeneración Urbana e Dereito á Vivenda, Xiao Varela, destaca, en relación a este traxecto, que é de “uso habitual para peóns” e apunta que non fora acondicionado para o tránsito a pé “nos case 49 anos que leva aberta a vía”. “Durante máis de catro décadas a veciñanza tivo que compartir, practicamente, espazo co tráfico rodado nunha calzada que non garantía a súa seguridade”, censura o edil, quen salienta que as obras tamén conlevarán a modernización da rede de pluviais e semafórica da zona, “o que tamén atende unha demanda cidadá reclamada desde hai moito tempo”. Así, o goberno local procederá a construción dun paso de peóns semaforizado que cruzará Salgado Torres nas proximidades da glorieta construída no ano 2015, “unha medida que favorecerá e garantirá a seguridade peonil”, asevera.

Durante estas actuacións, o Concello tamén procederá á renovación e mellora da eficiencia do alumeado do interior do túnel, nunha intervención na que investirá un total de 166.115,96 euros. A nova iluminación contará cun novo tipo de luminarias e diferente posición e orientación dos proxectores, atendendo ás necesidades da mobilidade ciclista e peonil, “favorecendo tamén a sensación de seguridade destes dous colectivos de persoas usuarias”, segundo apunta o concelleiro. “A nova solución de disposición considera o trazado do carril bici polo interior do túnel, entendendo a centralidade que agora adoitarán peóns e ciclistas na gradación lumínica destes espazos”, expón Varela.

Co gallo destas actuacións en Salgado Torres, que se iniciarán mañá, cortarase totalmente o tráfico do túnel no tubo de sentido de entrada á cidade. Habilitarase un paso a través da mediana para o desvío dese tráfico polo tubo do túnel habitualmente empregado polo sentido de saída. Deste xeito, utilizarase un carril do tubo para cada sentido de circulación, quedando o outro despexado para o desenvolvemento dos traballos. Iso suporá tamén o corte do tránsito peonil e o de estacionamento no sentido entrada á cidade –no lateral da Estación de Autobuses–. Unha vez que rematen as obras no tubo adoitarase o mesmo procedemento de desvío para poder inicialas no seu xemelgo. Os traballos teñen unha duración prevista de, aproximadamente, un mes.

O Concello incorpora dous novos vehículos para a Policía Local e Protección Civil que reforzan a atención en accidentes e eventos

marzo 13, 2018 coruna No Comments

Os corpos da Policía Local e de Protección Civil contan, con dous novos vehículos na súa frota. A concelleira de Igualdade e Diversidade, Rocío Fraga, presentou esta mañá os novos furgóns que se incorporan ao parque móbil municipal e que servirán para reforzar a atención en accidentes e eventos multitudinarios, así como mellorar as condicións de traballo do persoal.

O primeiro dos vehículos é un furgón Mercedes Sprinter para o equipo de Atestados de tráfico da Policía Local. Entre as prestacións do novo vehículo, no que o Concello vén de investir 65.500 euros e que facilitará o traballo dos membros do departamento no seu interior, inclúe distintos sistemas de control e seguridade, e unha zona de traballo que permitirá a colocación dunha mesa desplegable, butacas, unha mesa de traballo anclada ao piso, papeleiras e armarios. “Fíxose a demanda do personal, que deseñou o interior para que cumpra coas súas necesidades, con todo accesible e nunha cabina”, explicou. Todo o mobiliario será de tablero MDF, hidrófugo e anti-poros, que presenta unha alta durabilidade e resistencia. Ademais, os cristais das ventás laterais serán tintados –de xeito que permitirán a visión cara ao exterior desde a zona da oficina– e o vehículo incluirá diversas fontes de iluminación e megafonía. … Leer más

REPSOL COLABORA CON PADRE RUBINOS PARA EQUIPAR AOS PARTICIPANTES DO FESTIVAL INTERCENTROS

marzo 13, 2018 coruna No Comments

A Refinería de Repsol na Coruña colabora coa Real Institución Benéfico Social Padre Rubinos para equipar aos máis de 1.000 alumnos coruñeses que participaran o vindeiro venres no Festival Intercentros. Para esta colaboración, enmarcada dentro do centenario de Padre Rubinos, Repsol destina 3.000 euros á produción dun total de 1.100 camisetas que lucirán os participantes nas súas actuacións.

Esta mañá, a subdirectora de Persoas e Organización da Refinería de Repsol na Coruña, Dácil Suárez, foi a encargada de entregar o equipamento aos membros de Xunta Directiva do Festival, Andrés Lacián e Sol Álvarez. O acto de entrega tamén contou coa presenza da secretaria de Padre Rubinos, Mar García, e representantes da Cociña Económica, xa que o Festival Intercentros, destina este ano a súa recadación a ambas as entidades benéficas.

Durante a entrega, Dácil Suárez destacou a satisfacción de Repsol por realizar esta colaboración: “Para nós é unha honra e un pracer poder colaborar, en primeiro lugar, cunha entidade benéfica tan sumamente solvente e ben considerada como é Padre Rubinos, pero aínda o é máis facelo a través dun festival como o Intercentros, que se apoia no enorme talento e solidariedade dos nosos novos estudantes. O feito de que esta colaboración reverta tamén noutra gran institución benéfica como é a Cociña Económica non fai senón engadir máis valor a este pequeno granito de area”.

Festival Intercentros

O Festival Intercentros celébrase desde hai 16 anos na cidade e congrega a máis de mil estudantes que demostran o seu talento artístico por unha boa causa. Este ano a celebración terá lugar o venres, 16 de marzo no Coliseum a partir das 17:00 horas, e a integridade das entradas recadadas irá destinada ás entidades benéficas Padre Rubinos e Cociña Económica.

ENCUESTA SEMANAL

¿Te gusta la nueva web?

Cargando ... Cargando ...