Home » coruna » Recent Articles:

A Concellería de Medio Ambiente pon en marcha o servizo especial de recollida de residuos de hostalería e comercio para o Nadal

diciembre 10, 2017 coruna No Comments

A Concellería de Medio Ambiente vén de iniciar a campaña especial de limpeza de Nadal, coa que o Concello reforzará o servizo de recollida de residuos tanto na zona centro da cidade como nos distritos comerciais. Deste xeito, ata o vindeiro 8 de xaneiro –e con excepción do día 25 de decembro e o 1 de xaneiro– haberá servizos especiais que inclúen a recollida de residuos orgánicos e inorgánicos da hostalería nas zonas de maior concentración de locais, como é o centro da cidade, e un refozo na recollida do papel e cartón do comercio que abrangue a zona centro, San Andrés e Juan Flórez, a zona dos Mallos e Ángel Senra, a rúa Barcelona, e a contorna de Catro Camiños e A Gaiteira. Como fai notar a concelleira desta área, María García, con esta inciativa, o goberno local “dá continuidade ás políticas para a mellora da xestión de residuos que impulsou desde a súa chegada a María Pita, de cara a mellorar as taxas de recuperación e, tamén, da calidade do espazo público”. Segundo indica, o traballo co comercio e a hostalería resulta “especialmente relevante, en tanto a que son, xunto cos polígonos, os grandes produtores de residuos, e xeradores do 30% dos que se producen nunha cidade”. “De aí a importancia de mellorar a xestión desta porcentaxe, porque posibilita un incremento substancial da recuperación de materiais de refugallo”, incide.

No caso do dispositivo da zona de maior concentración hostaleira da zona centro, as medidas supoñen duplicar a recollida e tamén a contenerización, dado o incremento da actividade do sector polo período festivo, no ámbito comprendido entre Juana de Vega e a rúa Troncoso. Dese xeito, á recollida diaria nocturna do lixo orgánico e inorgánico sumase unha segunda quenda, que se recolle entre as 15.00 e as 17.00 horas tamén a diario, que se realiza mediante un reforzo de contedores portátiles, que se retiran cada xornada a partir das 17.00 horas. A esta medida súmase a campaña de recollida selectiva de vidro porta a porta , que terá lugar os luns, mércores, venres e domingos, agás nos festivos, de 10.00 a 14.00 horas.

En canto á recollida de papel e cartón procedente do comercio porta a porta , a medida supón duplicar o servizo, que pasa a ser diario nas principais zonas comerciais –o horario ordinario contempla a recollida en días alternos– para dar cobertura ao aumento do material de embalaxe que os negocios xestionan nestas datas. O reforzo realizarase, como xa ocorre co servizo habitual, en horario de mañá e non estará operativo domingos e festivos.

Como pon de relevo a responsable de Medio Ambiente, estes operativos especiais consolidan as accións de reforzo que se iniciaron xa no ano 2015, e que abranguen, tanto o período de Nadal como o verán.

O Concello repavimenta e renova o saneamento da rúa Almirante Mourelle, que tamén verá mellorada a súa accesibilidade

diciembre 9, 2017 coruna No Comments

O Concello da Coruña está a acometer unha obra de mellora da rúa Almirante Mourelle, en concreto, no treito entre a intersección coa rúa Manuel Deschamps e o inicio do Campo da Burra, que foi visitado polo alcalde da Coruña, Xulio Ferreiro e polo concelleiro de Rexeneración Urbana, Xiao Varela. Como explica o responsable desta área, con esta actuación, “o goberno local dá resposta a unha vella demanda da cidadanía da zona, que solicitaba unha renovación en condicións, a través dunha actuación de alto impacto”. A actuación ten un custo estimado de 40.000 euros e servirá para renovar o saneamento e mellorar a calzada e a beirarrúa, para facela máis accesible, ademais de incluír pequenas intervencións que permitan reforzara seguridade viaria nese punto.

A día de hoxe, e segundo o planeamento vixente, as actuacións neste treito deben limitarse a obras de renovación e mantemento, por estar integrada esta parte de Almirante Mourelle dentro do ámbito do Parque do Observatorio. Con todo, e segundo indica Varela, “é posible abordar moitas actuacións necesarias, que se terían que ter realizado hai xa anos”. Así, neste momento estase a proceder á renovación da rede de saneamento e recollida de pluviais da rúa, debido ao mal estado de conservación que presentaba. Unha vez rematada a intervención no subsolo executarase o novo pavimento da calzada, que pasará a ser de formigón, “un material máis resistente e duradeiro, e que permite mellorar a carga do tráfico no terreo”, incide o edil. Como avanza, a obra, que se prolongará as vindeiras semanas, incluirá tamén accións de estabilización do muro que salva a diferencia de altura entre a Rúa Almirante Mourelle e o Camiño do Pinar, así como a instalación dunha varanda en substitución da antiga varanda tubular e da reixa que a viña reforzando durante os últimos anos.

O concelleiro salienta que a actuación que terá “unha repercusión máis palpable na rúa” é a renovación e ampliación do treito de beirarrúa de Manuel Deschamps que conecta o final do Camiño do Pinar e Almirante Mourelle. A nova beirarrúa será, segundo expón, completamente accesible, con 3,15 metros de anchura. En paralelo, o Concello ten previsto dotar este treito de sinalización, de cara a reforzar a seguridade da rúa.

A Coruña celebrará entre os días 5 e 18 de febreiro as III Xornadas Lacónicas , dedicadas ao lacón con grelos

diciembre 9, 2017 coruna No Comments

O Concello abre ata o vindeiro día 21 o prazo de inscrición para os establecementos interesados en participar na terceira edición da s Lacónicas, as xornadas gastronómicas do lacón con grelos que impulsa a área de Turismo, que dirixe o concelleiro de Emprego e Economía Social, Alberto Lema, e que no 2018 celebraranse entre os días 5 e 18 de febreiro. O seu obxectivo, segundo indica o edil, é potenciar a cidade como destino gastronómico durante o Entroido coruñés a través do menú característico e popular da época, a laconada, dentro da aposta pola gastronomía como unha das liñas estratéxicas en materia turística.

Tal e como se recolle nas bases, poderán participar nestas xornadas “establecementos de hostalería da cidade que, pola súa traxectoria profesional e proposta gastronómica, encaixen na temática das xornadas”. Cada un dos locais participará cun único menú,que deberá ser elaborado, principalmente, con produtos galegos, e composto dun primeiro prato tradicional, que será sopa ou similar, un prato principal, composto por unha laconada, e sobremesa, que incluirá filloas e/ ou orellas, ademais de bebida (auga, refrescos ou adega de denominación galega) e café. O prezo dos menús debe oscilar entre os 15 e os 30 euros (IVE incluído).

Poderán participar nas Lacónicas un máximo de 30 establecementos. As bases de participación, que é gratuíta, poden consultarse na páxina web www.turismocoruna.com , onde tamén está dispoñible o formulario de inscrición. Esta deberá enviarse á dirección xornadaslaconicas@gmail.com antes das 14.00 horas do día 21 deste mes. Aqueles establecementos interesados poden dirixirse tamén aos teléfonos 639 155 247 ou no 636 447 574 para recibir máis información.

Medio Ambiente apoia a posta en marcha do proxecto ‘Non somos de plástico’, dirixido á sensibilizar á cidadanía sobre a problemática ambiental derivada do uso deste material

diciembre 9, 2017 coruna No Comments

A Concellería de Medio Ambiente, a través da convocatoria Cultura Ambiental, apoia a posta en marcha do proxecto Non somos de plástico, unha iniciativa promovida pola Asociación veciñal do Castrillón-Urbanización Soto-IAR, e que ten como finalidade concienciar á cidadanía sobre a necesidade de redución de uso deste material. A edil María García salienta que esta proposta de autoxestión cidadá “entronca coa liña de traballo que está a seguir o Concello, a través da diversificación de actividades de sensibilización dirixidas a todo o espectro da poboación, e en especial á mocidade, tal e como se fixo a través da campaña de concienciación Móllate!, pero tamén aquelas accións postas en marcha para acadar eventos máis sustentables,comonacelebracióndasfestasdacidade”.

Entre a serie de actividades organizadas pola entidade veciñal, atópase un concurso de vídeo dirixido á mocidade que ten, como finalidade, sensibilizar á poboación xuvenil en relación “ao problema ambiental do plástico”. Ao concurso pode presentarse o alumnado de educación secundaria ou bacharelato da cidade e, co obxectivo de fomentar a participación, deberán facelo a través de grupos conformados por entre 3 e 5 integrantes. As propostas audiovisuais, que terán unha duración máxima de 5 minutos, poderán ser gravadas desde calquera tipo de dispositivo móbil ou medio audiovisual, en formato horizontal, e deberá evidenciar esta problemática ambiental, a necesidade da redución do seu uso ou a súa reutilización. Tal e como sinala a asociación veciñal, haberá premios para os tres mellores traballos que, posteriormente, se divulgarán a través de redes sociais e outros medios. O prazo de presentación de propostas –que se deben enviar ao correo asociacion_iar@hotmail.com– rematará o vindeiro luns 11.

O proxect o Non somos plástico tamén procurará chegar a diferentes públicos, e celebrará así unha mesa redonda o vindeiro xoves, 14 de decembro, ás 19.00 horas, no salón de actos do centro cívico do Castrillón, na que se abordarán cuestións en relación ao uso de plásticos e alternativas ao mesmo, así como o consumo consciente e responsable. Contará coa participación de representantes de diversas entidades relacionadas co medio ambiente e o consumo responsable. A entrada á charla é libre.

O goberno local presenta o programa de reforzo educativo ‘Poténciate’, “que nace para favorecer a inclusión social e diminuír o fracaso escolar”

diciembre 8, 2017 coruna No Comments

O Concello da Coruña conta, desde o presente curso escolar, cun novo programa educativo de reforzo escolar. A edil de Xustiza Social e Coidados, Silvia Cameán, presentou esta mañá a primeira convocatoria de Poténciate, unha iniciativa dirixida ao alumnado coruñés “que abrangue diferentes accións de reforzo educativo para diminuír o fracaso escolar e favorecer a inclusión social na Coruña”. “O goberno municipal quere unha escola pública que recoñeza o dereito a aprender en igualdade de oportunidades, e por iso aposta en programas de prevención, porque se queremos xerar igualdade de oportunidades e de acceso ás mesmas debemos ter ferramentas que detecten os posibles problemas con antelación”, sinalou a responsable municipal.

Poténciate, que se desenvolverá durante o segundo e o terceiro trimestre do curso escolar, ordinariamente, entre as 16.00 e as 18.00 horas, está dirixido a todos os centros públicos do termo municipal que imparten educación infantil, primaria, especial e secundaria. As accións que se desenvolverán nos centros educativos abranguen actividades de apoio específico nas tarefas escolares; así como outras relacionadas coa orientación, titoría e as técnicas de estudo; propostas para a adquisición e mellora de habilidades sociais, ou para fomentar o lecer saudable entre o alumnado; e prestará atención específica ás familias. “Este goberno entende que os programas de reforzo, orientación e apoio deben estenderse a todos os centros públicos e incorporar novos perfís profesionais para cubrir as necesidades da veciñanza”, expuxo a concelleira. Así, o persoal que participará no programa Poténciate será do ámbito da pedagoxía, psicopedagoxía, logopedia, educación social, traballo social, maxisterio –tamén aquelas persoas que posúan o Mestrado Universitario en Profesorado de Secundaria– e técnicas e técnicos superiores dos ámbitos educativo, sociocultural e deportivo, “ademais do persoal auxiliar que se precise”, apuntou a edil, quen destacou que o goberno local destinará 120.000 euros para poñer en marcha esta iniciativa.

… Leer más

ENCUESTA SEMANAL

¿Te gusta la nueva web?

Cargando ... Cargando ...