Home » coruna » Recent Articles:

A Xunta de goberno local dá luz verde ao novo prego de condicións que rexen o arrendamento como establecemento hoteleiro do espazo municipal no que se asenta o NH Atlántico

mayo 19, 2018 coruna No Comments

​A Xunta de goberno local aprobou este venres os pregos de condicións que rexerán o novo contrato de arrendamento do inmoble municipal situado nos xardíns de Méndez Núñez e no que na actualidade se asenta o Hotel NH Atlántico. A intención do executivo municipal é adxudicar o novo contrato mediante a fórmula de poxa por procedemento aberto, toda vez que o próximo agosto remata a concesión vixente, xusto cando se cumpren 50 anos do período máximo de explotación que aparece recollido no contrato. Os pregos, que esta xornada foron ratificados pola xunta de goberno, especifican que o inmoble deberá destinarse a uso hoteleiro respectando os termos e condicións sinalados no mesmo, tendo o novo contrato de arrendamento, neste caso, unha duración improrrogable de 20 anos, a máxima que permite a lexislación actual.

A valoración das distintas propostas de licitación basearase na oferta económica máis vantaxosa e establecerase un prezo mínimo de adxudicación, que poderá ser logo mellorado á alza nas distintas ofertas e que se establece en 1.007.761 euros ao ano (sen IVE). “Un prezo dentro das condicións de mercado”, comentou este venres o alcalde da Coruña, Xulio Ferreiro, rematada á Xunta de goberno local, á vez que recordou que a sociedade Parisiana SA, que na actualidade ostenta esta concesión administrativa, aboa “pouco máis de 2.500 euros ao ano pola ocupación dun edificio público destas características”.

… Leer más

Medio Ambiente amplía o programa de xestión das colonias felinas da cidade ao incorporar a colaboración de novas entidades animalistas, “o que favorece a aposta polo benestar animal e a aplicación de políticas de sacrificio cero”

mayo 18, 2018 coruna No Comments

​A concelleira de Medio Ambiente, María García, asinou esta semana, no Pazo de María Pita, dous convenios coa representante da Asociación Felinos Felices, Covadonga Fernández, co obxectivo de establecer o marco de colaboración para a xestión das colonias felinas na zona da Falperra e de Santa Margarita. A incorporación da entidade animalista dá continuidade ao proceso iniciado no 2016 polo goberno local a través dun proxecto piloto no Barrio das Flores, e que se renovou e ampliou o pasado mes de febreiro a través da sinatura de convenios con Gatuchinhos, CoruñaGatuna, Micos e Nós e Gatocán para a xestión das colonias que se atopan tanto no Barrio das Flores como en Oza, Cidade Escolar, Os Rosales-Visma e Monte Alto.

A responsable municipal saudou a incorporación dunha nova entidade colaboradora a un proxecto “que aposta tanto polo benestar animal como pola salubridade pública”, xa que o plan de acción propón o “saneamento, esterilización e devolución” dos animais pertencentes ás colonias de Falperra e Santa Margarita, así como a distribución controlada da súa alimentación, co obxectivo de reducir o número de exemplares e minimizar os riscos sanitarios tanto dos animais como da veciñanza. “O desenvolvemento deste tipo de colonias CES –captura, esterilización e solta– constitúe, a medio e longo prazo, un método menos custoso para a administración local que incide na aposta polas políticas do sacrificio cero na Coruña, á vez que se controla a salubridade dos exemplares e a limpeza da zona, o que redunda, igualmente, na mellora da saúde pública”, apunta García.

A proposta de colaboración, ao igual que nos convenios asinados para as colonias do Barrio das Flores, contempla obrigas por parte tanto da administración local como da entidade animalista. Así, o Concello dota de ferramentas e recursos á asociación, como gaiolas de captura e recuperación, casetas-comedor coa súa sinalización e útiles de limpeza para as mesmas, ademais de asumir os gastos dos tratamentos sanitarios dos animais, á vez que achega ás persoas membro unha certificación ou acreditación para levar a cabo o labor. Pola súa banda, a entidade comprométese a designar ao persoal voluntario que se responsabilizará do control da colonia, procurando a axeitada xestión da mesma. As obrigas contemplan a realización dun censo que inclúa os exemplares, novas incorporacións e o estado xeral dos animais, ademais da captura dos mesmos e traslado ao centro veterinario para a súa esterilización e saneamento. As persoas voluntarias tamén serán responsables de devolver os exemplares á colonia e desparasitalos periodicamente, á vez de coidar do estado das casetas-comedor e asegurarse que non se distribúe alimentación fóra dos espazos ou horarios habilitados para a mesma.

“O obxectivo deste tipo de iniciativas para tamén por fomentar o coidado do espazo público e da fauna urbana desde a corresponsabilidade. Traballar en común coas entidades animalistas da cidade favorece o seu empoderamento ao dotalas de recursos necesarios para desenvolver un labor que levan anos desenvolvendo”, explica a concelleira de Medio Ambiente, quen engade que, ao xerar normativa en canto aos horarios e zonas da distribución alimentaria, “favorece tamén o coidado e limpeza viaria”.

A Coruña acollerá este mes de maio a Copa de Europa de Judo e o XXX Trofeo Miguelito, “torneos que referendan o progresivo aumento da práctica deste deporte na cidade”

mayo 17, 2018 coruna No Comments

O concelleiro de Culturas, Deporte e Coñecemento, José Manuel Sande, presentou as dúas competicións deportivas de judo que a cidade da Coruña acollerá nos vindeiros días, como son a Copa de Europa junior e o Trofeo Miguelito, “nun mes de intensa actividade judoka” –apuntou o edil–, tras a celebración, a fin de semana pasada, do torneo do Colexio Liceo La Paz. “Esta serie de competicións dan conta da eclosión e continuidade afortunada que ten a práctica do judo na nosa cidade, un deporte que se atopa nun progresivo crecemento e que conta cunha importante vertente formativa ”, explicou Sande, que estivo acompañado polo presidente da Federación Galega de Judo, Mario Muzas, así como do vicepresidente da entidade e máximo responsable do comité organizador do torneo coruñés, Eduardo Galán.

Así, esta mesma fin de semana, o Coliseum será a sede da Copa de Europa de Judo XX Gran Premio Internacional Teresa Herrera, unha cita que reunirá a 385 deportistas da categoría junior procedentes de 25 estados diferentes. 149 mozas e 236 mozos de Alemania, Andorra, Arxentina, Bélxica, Croacia, España, Finlandia, Francia, Irlanda, Israel, Italia, Luxemburgo, Moldavia, Mónaco, Montenegro, Mozambique, Noruega, Polonia, Portugal, Reino Unido, República Checa, Romanía, Rusia, Taxikistán e Xeorxia participarán na competición, que contará con 42 deportistas de Galicia, dos e das cales 18 son da Coruña. Tal e como destacou Mario Muzas, trátase dunha edición “exitosa” polo alto número de países e deportistas presentes, “e que supón un novo récord de participación nesta Copa”, que forma parte co circuíto mundial IJF Ranking. Na primeira xornada do torneo, que se desenvolverá de xeito ininterrompido entre as 10.00 e as 17.00 horas, tal e como sinala o regulamento comunitario, terán lugar os combates das catro categorías de menor peso, mentres que na segunda, o domingo 20, en horario de 10.00 a 14.30 horas, farán o propio as catro de maior peso.

De cara á fin de semana seguinte, o domingo 27 de maio, o Coliseum acollerá a trixésima edición do Trofeo Feminino e Masculino Miguelito, unha competición especial que, como salientou Sande, “acredita a vertente formativa do judo”, e na que participarán máis de 3.300 nenas e nenos. Co gallo desta celebración, o Concello da Coruña vén de editar un conto, en formato cómic, en colaboración coa Federación Galega de Judo dirixido a fomentar a práctica deste deporte entre as nenas e nenos da cidade. Ademais, estrearase unha canción, ​Miguelito​, composta especialmente por Klaus Martínez Veiga para celebrar o trixésimo aniversario do torneo. Tal e como destacou Eduardo Galán, ambas propostas “pretenden reforzar e incidir nos valores positivos do judo, non só polos beneficios que reporta como práctica deportiva senón como ferramenta educativa”.

Para obter máis información sobre a competición así como das publicacións especiais desta edición, pódese visitar o web ​http://www.fgjudo.com/​.

Sons de hai máis de 2.000 anos inundarán este xoves o Teatro Colón

mayo 16, 2018 coruna No Comments

Este xoves 17 de maio ás 20:00h, a área de Cultura da Deputación da Coruña programa no Teatro Colón “Os sons esquecidos”, un espectáculo do multinstrumentista Abraham Cupeiro, no que se mestura unha orquestra moderna con instrumentos de épocas antigas.

Este concerto propón ao espectador unha viaxe no tempo a través da música, unha procura das fontes orixinais para fundilas co contemporáneo, creando un discurso novo e sorprendente que xa foi gravado en 2016 coa Real Filharmonía de Galicia para a discográfica Warner Classics.

Este xoves poderemos escoitar máis dunha decena de instrumentos pouco convencionais, algúns deles construídos ou atopados polo mesmo Abraham Cupeiro. O elemento central é o karnix, unha trompeta de guerra celta de 3 metros de lonxitude que evoca o son das sirenas, os delfíns e o mar. … Leer más

A Concellería de Xustiza Social convoca unha liña de subvencións de 100.000 euros para as entidades sociais que realicen proxectos de inclusión

mayo 16, 2018 coruna No Comments

​A Concellería de Xustiza Social e Coidados convoca subvencións para que as entidades sociais sen ánimo de lucro da cidade realicen actividades ou proxectos de interese social no presente ano. A Xunta do Goberno local tratará na súa vindeira reunión a aprobación da convocatoria, que destina 100.000 euros en total a estas actividades, cun límite de 8.000 euros por proxecto que suporá un máximo do 80% do custe total da iniciativa. A concelleira de Xustiza Social e Coidados, Silvia Cameán, indica que esta liña de axudas teñen como finalidade “a posta en marcha de actividades ou o reforzo das xa existentes, así como a colaboración e o impulso das entidades que traballan por unha cidade máis igualitaria e máis xusta a través de iniciativas de promoción e reinserción social”.

A convocatoria permite que cada entidade poda solicitar subvencións para un máximo de tres proxectos, que deberán ir acompañados cadanseu da súa memoria explicativa, así como de un orzamentos de ingresos e gastos, entre outra documentación. O prazo de presentación das solicitudes é dun mes dende o día seguinte á publicación das bases da convocatoria no Boletín Oficial da Provincia. Tal e como indica a concelleira, na valoración das iniciativas teranse en conta criterios referidos á entidade, que terán un peso do 15%, e ao proxecto, que valerán o 85% restante. Deste xeito, terase en conta o contido e a calidade da memoria, a transversalidade de xénero no proxecto e a súa tipoloxía, aspecto no que se primarán as iniciativas de inclusión social para a cobertura de necesidades básicas por riba doutras actividades enfocadas á difusión ou sensibilización, entre outras. Tamén se puntuará segundo o perfil das persoas beneficiarias do proxecto, a súa complementariedade cos traballos dos servizos municipais, a súa duración e o uso de lingua galega e inclusiva. A convocatoria especifica que serán gastos subvencionables as contratacións necesarias para o desenvolvemento do proxecto, cos límites indicados nas bases, así como outros custes de funcionamento da entidade, directos ou indirectos, que estean directamente relacionados ou sexan necesarios para levar a cabo a iniciativa.

Por outra parte, a Xunta de Goberno local tamén abordará a proposta de prórroga do servizo de lecer comunitario e animación sociocultural nos centros cívicos municipais, que, tal e como contempla o contrato asinado coa empresa concesionaria, pode estenderse por un ano máis, prazo que comezará no mes de xullo.

ENCUESTA SEMANAL

¿Te gusta la nueva web?

Cargando ... Cargando ...