Home » coruna » Recent Articles:

O Concello completa as obras de mellora da área de xogos da praza Isaac Díaz Pardo, “para convertela no grande espazo de inclusión no barrio de Elviña”

diciembre 7, 2017 coruna No Comments

O Concello da Coruña vén de completar a renovación, ampliación e mellora da zona de xogos infantil situada na praza Isaac Díaz Pardo. Tal e como destaca o concelleiro de Rexeneración Urbana e Dereito á Vivenda, Xiao Varela, a obra seguiu os criterios de deseño para as áreas infantís do goberno local, e que xa puxo en práctica en espazos como a zona de xogos na Praza de Tolerancia. “Os criterios poñen énfase na naturalización dos ambientes, elementos e materiais dos xogos”, explica Varela, “e poñen en valor o espazo de xogo como unha ferramenta de inclusividade, ademais de prestar maior atención ás persoas coidadoras”. Deste xeito, a nova área de xogos de Elviña “converterase no grande espazo de xogo do polígono e atenderá tamén a necesaria conquista do espazo público por parte da veciñanza de todas as idades”, segundo sinala o concelleiro.

A área de xogos licitouse por 230.793,92 euros, e conta con financiamento da Deputación da Coruña, ademais de municipal. Sobre o proxecto inicial para a zona que tiña a anterior corporación, “o goberno actual revisou en profundidade a proposta baixo os criterios de deseño nos que se están a traballar desde Rexeneración Urbana, o que permitiu, entre outras cuestións, ampliar o número de prazas para persoas usuarias, adaptar a posición dos xogos e manter en pé un castiñeiro”, expón o responsable de Rexeneración Urbana. Deste xeito, o novo espazo presentará, en total, dúas áreas de xogo diferenciadas, unha infantil e outra para nenas e nenos de máis idade, cada unha delas coa súa respectiva duna de area –de dous metros e medio de alto para os de maior idade, e de metro e medio para as e os máis cativos–. A zona, á que xa se pode acceder, conta con varias estruturas de xogo, entre os que se inclúen oito postos de randeeiras, castelos, rocódromos, tirolinas, tobogáns e unha estrutura piramidal de redes para escalada. Ademais, o espazo conta cunha ampla superficie con asentos na zona centro, para facilitar o labor das persoas coidadoras para que poidan visualizar as entradas e saídas dos máis cativos e cativas en todo momento.

O goberno local impulsa unha modificación do PXOM que excluirá San Vicente de Elviña do ámbito do Ofimático “para protexer o núcleo e darlle seguridade xurídica ao polígono”

diciembre 6, 2017 coruna No Comments

O concelleiro de Rexeneración Urbana e Dereito á Vivenda, Xiao Varela, avanzou este martes os pasos que dará o Concello para seguir avanzando na urbanización do Parque Ofimático, “para poder resolver os problemas que afectan tanto a pequenos como a grandes propietarios e a Xestur, e dar fin ao drama urbanístico que supuxo o desenvolvemento deste polígono, sempre desde a perspectiva de poder facer habitable o barrio”. Para iso, e segundo anunciou, o goberno local impulsará unha modificación puntual do Plan Xeral de Ordenación Municipal (PXOM) coa finalidade de excluír do ámbito a totalidade dos terreos situados entre a avenida de Alfonso Molina e a Universidade e o núcleo de Elviña, na marxe dereita da avenida. “Estamos a punto de dar un paso importante”, subliñou o responsable municipal, que indicou que este cambio do PXOM ten como “finalidade clara” poder concluír a zona residencial do Ofimático, e, ao mesmo tempo, excluír e desafectar a parte do núcleo de San Vicente de Elviña afectada polo plan do Ofimático. “Este goberno reinvindicou desde o inicio a posta en valor e protección dos núcleos rurubanos, como é o de Elviña, que quedará excluído do plan parcial do Ofimático unha vez se complete o proceso de modificación, sen que isto afecte ás obras de urbanización na zona residencial do polígono”, fixo notar Varela, que considerou ademais necesario “dotar de seguridade xurídica o sector”, e dar solución a cuestións que están sometidas a procedementos xudiciais –dous contenciosos, que se atopan suspendidos neste momento, e que se suman a un terceiro, recentemente desestimado polo Tribunal Superior de Xustiza de Galicia–relativos a o proxecto de urbanización do barrio.

O concelleiro de Rexeneración Urbana deu conta hoxe desta folla de ruta do goberno local na comisión de seguimento do Ofimático –na que están presentes representantes de Xestur e das principais promotoras–, que tamén prevé unha modificación do proxecto de urbanización, para retirar, por unha banda, aquelas actuacións que xa se fixeron ou están a punto de finalizarse e, por outra, para establecer unha serie de fases que permitan acometer o que resta de urbanización de forma ordenada. “Consideramos necesario rematar a urbanización da zona residencial do polígono e por iso introducirase un plan de etapas realistas no desenvolvemento futuro, que foi unha demanda histórica e un dos problemas que tivemos no anterior contrato”, sinalou Varela, indicando que o groso dos traballos que faltan na parte residencial teñen que ver coas zonas verdes e co mobiliario e coa execución do vial a carón de Matogrande, “que é o que permitirá dar condición de soar ás tres parcelas que faltan por tela”. … Leer más

O Concello subscribe un convenio marco estable de colaboración coa Universidade “para afondar, en común, no desenvolvemento social, cultural e económico da Coruña”

diciembre 6, 2017 coruna No Comments

O alcalde, Xulio Ferreiro, e o reitor da Universidade da Coruña, Julio Abalde, asinaron o convenio que senta as bases do marco estable de colaboración entre ambas as dúas institucións de cara á cooperación nos campos de interese común, como poden ser o científico, técnico e cultural. O acordo, que o rexedor rubricou no Pazo de María Pita, permitirá estreitar as relacións mutuas, axuntar esforzos e establecer normas amplas de actuación comúns, que canalicen dentro do acordo os contactos e colaboracións a desenvolver entre a administración local, a UDC e os organismos ou empresas dependentes de ambos. Tal e como destaca Ferreiro, a medida “referenda a aposta polo traballo en común que estamos a realizar desde ambas as dúas institucións co obxectivo de favorecer o desenvolvemento social, cultural e económico da Coruña”. “Coidar e ampliar a cooperación e a colaboración cunha das entidades públicas máis relevantes da cidade é sen dúbida unha prioridade para este goberno, como vén demostrando ao longo destes dous anos. Hoxe damos un novo paso para referendar o noso compromiso coa educación e cunha institución de servizo público que promove a investigación, a innovación e o coñecemento da ciencia e da cultura, así como da súa difusión”, defende o alcalde.

O desenvolvemento do convenio marco de colaboración favorecerá a elaboración de estudos técnicos ou a formación permanente do persoal de ambas entidades, e materializarase en programas e/ou proxectos de actuación promovidos por servizos, organismos ou empresas dependentes tanto do Concello como da Universidade. Así, o acordo contempla a execución de proxectos e programas de investigación, a prestación recíproca de servizos técnicos, infraestruturas e asesoramento mutuo, cooperación en programas de formación permanente do cadro de persoal investigador, técnico ou mesmo do alumnado; a organización e execución de actividades comúns relacionadas coa promoción social da investigación e o desenvolvemento tecnolóxico; a innovación social, a igualdade e a diversidade; a sustentabilidade, o medio ambiente e a loita e adaptación o cambio climático; e, en xeral, os estudos e actividades que redunden no desenvolvemento económico e social da Coruña

… Leer más

O programa ‘A Pé de Barrio’ inicia esta semana as actuacións de limpeza e coidado do espazo público no Portiño, San Pedro de Visma e Os Rosales, despois de realizar máis de 4.578 intervencións na cidade

diciembre 6, 2017 coruna No Comments

O programa municipal de coidado intensivo do espazo público A pé de barrio inicia esta semana as súas actuacións no Distrito 2 da cidade, o que suporá a limpeza integral de máis de 20 rúas dos barrios do Portiño, San Pedro de Visma e Os Rosales. Así, desde este luns e até o vindeiro 19 de decembro, o programa de intervencións e mellora do espazo público posto en marcha polo goberno local acometerá, ademais da limpeza intensiva viaria, diversas actuacións de rexeneración urbana, tales como a eliminación de fochancas nas calzadas, pavimentado e substitución de baldosas rotas, reposición do alumeado público ou a reparación e repintado do mobiliario público así como da sinalización vertical e horizontal, entre outras. Segundo destaca a concelleira de Medio Ambiente, María García, este plan “é unha iniciativa baseada na transversalidade”, e na que a área que dirixe, ademais de Rexeneración Urbana e Mobilidade Sostible, “coordinan e optimizan os seus servizos nun reparto equitativo dos recursos municipais entre todos os barrios da cidade”. “A Pé de Barrio é o programa de limpeza máis intensiva que existiu nunca na Coruña, e que chegará, ao longo dun ano, a todas as rúas dosdezdistritosdomunicipio”,aseverouaedil.

Deste xeito, até o día 19 traballarase na retirada de herbas nas rúas e beirarrúas, a sega e a escarda de alcorques nas zonas axardinadas do Distrito 2, e outras actuacións de coidado de parques e xardóns, e que inclúen novas plantacións de arborado en Emilio González López, no Parque de Catro Ventos ou a reposición de exemplares na Praza Elíptica. Ademais, continuarase coa reparación do mobiliario no Portiño ou nos Rosales, “que se unen ás melloras realizadas nos últimos meses na zona, como foi a reparación de vallas ou a mellora de macizos arbustivos no Monte de San Pedro”, salientou a responsable municipal. Estas semanas desenvolveranse tamén actuacións de reparación e substitución de contedores e papeleiras, control de pragas, revisión da rede eléctrica ou actuacións de saneamento e resolución de incidencias recollidas estas semanas no Distrito, “e que se complementarán coas achegas que recibamos hoxe cidadanía”, expresou García, que se reunirá esta tarde coa veciñanza da zona para presentar os traballos que se realizarán estes días, e recoller as súas demandas de cara a incorporalas nos plans de acción.
… Leer más

O Pleno dá luz verde, de forma definitiva, á primeira ordenanza contra incendios da Coruña e introduce medidas que facilitan o acceso da cidadanía ao viveiro empresarial do Papagaio

diciembre 5, 2017 coruna No Comments

O Pleno municipal aprobou de forma definitiva este luns, en sesión ordinaria, a primeira ordenanza contra incendios do Concello da Coruña, que ten como obxectivo “manter o nivel de seguridade da cidadanía potenciando a prevención e a autoprotección”. “Trátase non só de garantir unha resposta rápida, senón tamén de evitar que se produzan incendios e limitar os seus efectos cando sucedan”, indicou a concelleira de Igualdade e Diversidade, Rocío Fraga, que ten as competencias de Seguridade Cidadá. “O servizo de bombeiros da Coruña sempre destacou polo seu esforzo á hora de protexer a habitantes e visitantes da cidade. Apostamos pola prevención pero, para iso, debemos complementar e adaptar as necesidades da nosa cidade á normativa que existe a nivel estatal”, explicou a edil, que salientou que o documento aprobado esta tarde “non só é a primeira ordenanza de protección contra incendios do Concello da Coruña, senón que tamén é a primeira en toda a comunidade autónoma”. “Dende o máis estrito respecto á lexislación vixente, esta ordenanza configúrase evitando duplicidades, ampliando esixencias e adaptándose ás peculiaridades da Coruña”, comentou Fraga, que apuntou que o texto se elaborou “recollendo as achegas formuladas dende distintos ámbitos e sectores relacionados coa seguridade”. A iniciativa foi aprobada cos votos a favor do grupo de goberno e o BNG, así como a abstención de PSOE e PP.

A responsable de Seguridade Cidadá recordou que a nova ordenanza conta cunha serie de especificacións no que atinxe ao ámbito da edificación, xa que regula aspectos non contemplados na normativa actual, establecendo tratamentos especiais para inmobles de grande altura e de ocio, relativos, sobre todo, a medidas de accesibilidade. “Entre outras novidades, a ordenanza permitirá que o servizo de extinción de incendios poida informar con carácter preceptivo sobre aqueles edificios ou establecementos que pola súa actividade (por exemplo, que vendan produtos inflamables) poidan presentar algún tipo de risco específico, de cara a que se tomen as medidas de seguridade que se crean convenientes”, explicou a concelleira. “Esta ordenanza tamén regula as especificidades de espectáculos públicos e actividades recreativas onde pode existir un risco maior de incendios, así como establece a creación dun catálogo de plans de autoprotección e emerxencia para unha serie de edificios de especiais singularidades, como o caso de garderías, colexios, centros de maiores e lugares onde se levan a cabo espectáculos públicos”, dixo. A ordenanza tamén garante que os eventos ou actividades que se desenvolvan na cidade e que xeren unha aglomeración de persoas conten cun número mínimo de bombeiros co fin de dar unha resposta o máis áxil posible no caso de ser necesario.

… Leer más

ENCUESTA SEMANAL

¿Te gusta la nueva web?

Cargando ... Cargando ...