Home » coruna » Recent Articles:

O Goberno local dará luz verde a un novo contrato do servizo de axuda a domicilio que supón 5.628 horas máis de atención ao mes e que beneficia a 112 veciños e veciñas

Junio 16, 2017 coruna No Comments

A Concellería de Xustiza Social, dirixida por Silvia Cameán, levará á Xunta de Goberno local que se celebrará este venres a adxudicación dun novo contrato de Servizo de Atención a Domicilio (SAD IV) que suporá un aumento de 5.628 horas ao mes de atención á veciñanza en situación de dependencia. Segundo destacou a responsable municipal “este novo contrato servirá para dar cobertura a 112 veciños e veciñas máis da cidade”. En conxunto, os programas municipais en vigor de axuda a domicilio dan servizo a 1.164 persoas. As solicitantes que poden acollerse a este servizo municipal serán tanto as que teñen un grado de dependencia recoñecida polo Goberno autonómico (usuarias do denominado servizo de SAD Dependencia), como as que non o teñen recoñecido (SAD básico). O servizo que vén de adxudicarse mediante concurso ten unha vixencia de dous anos prorrogables por dous máis e un orzamento que supera o millón de euros.

“Mentres que os executivos do PP levan anos recortando en materia de dependencia en distintas institucións, dende o Goberno municipal da Coruña estamos dando cumprimento a un dos nosos principais compromisos programáticos, que pasa por incrementar a cobertura no Servizo de Axuda do Fogar”, destacou a titular de Xustiza Social. “Aplicamos un incremento do investimento dun millón de euros anuais máis, que permitirán maior atención ás persoas en situación de dependencia, así como outorgarán un maior respiro a aquelas persoas que se encargan diariamente do seu coidado, principalmente mulleres”, explicou.

“Para nós é fundamental ampliar e garantir os servizos que teñen que ver co coidado daquela parte da veciñanza que se atopa nunha situación de maior vulnerabilidade”, comentou Cameán, quen indicou que, do mesmo xeito, “tamén é preciso, e así o estamos a facer, garantir que as persoas que desenvolven un servizo tan importante o estean a facer con seguridade laboral”.

María García chama á corresponsabilidade cidadá sobre a xestión de residuos na praia durante o San Xoán “para acadar unha celebración máis sustentable”

Junio 15, 2017 coruna No Comments

A concelleira de Medio Ambiente, María García, participou no Mercado Municipal da Praza de Lugo na actividade Peixería 2050, unha nova iniciativa de enmarcada na campaña de concienciación ambiental Móllate!, que ten como obxectivo sensibilizar á cidadanía, en especial á xente moza, sobre a xestión de residuos na festa de San Xoán para acadar así unha celebración máis sustentable. O programa, posto en marcha polo Goberno municipal o ano pasado, “supón que por vez primeira o Concello da Coruña pon o foco de atención neste eido da festa, un evento do que a veciñanza se sente especialmente orgullosa, pero que tamén provoca un grande impacto no medio sobre o que se debe traballar”, lembrou a edil, quen sinalou que esta campaña “se realiza cun dos grupos de poboación máis activos no San Xoán, como é a mocidade, a que tamén está especialmente sensibilizada co tema dos residuos que rematan no mar”. “Móllate! desenvólvese durante todo o ano nos distintos centros escolares da cidade, co obxectivo que as e os estudantes da Coruña se corresponsabilicen e lideren este proceso de sensibilización de cara ao resto da veciñanza, mentres contan co apoio do seu Concello”, explicou a edil.

O eixo central da campaña nesta edición parte das conclusións do estudo A nova economía dos plásticos presentado no Foro Económico Mundial de Davos, “que sinala que, de seguir a este ritmo, no ano 2050 habería no mar máis masa de plástico que peixe”, explicou García, “polo que o alumnado decidiu levar a cabo esta mañá unha acción de sensibilización nun enclave especial, como é o mercado municipal con venta de sardiña de cara ao San Xoán”. Así, as e os estudantes instalaron nun dos postos baleiros unha peixería do ano 2050, na que substituíron os peixes por sardiñas de plástico, para chamar a atención da veciñanza “sobre o necesario cambio de hábitos, tanto nesta festa, como na vida en xeral, para favorecer un futuro máis sustentable”, sinalou a edil.

Aínda estamos a tempo de evitar que as sardiñas que merquen os teus fillos e fillas sexan coma estas , foi unha das mensaxes que as rapazas e rapaces empregaron nesta acción de sensibilización, na que explicaron ás usuarias e usuarios dos mercados datos como os anos que unha botella de plástico que acaba no mar tarda en desintegrarse –500 aproximadamente–. “Facemos un chamado á corresponsabilidade cidadá para evitar que cheguen máis residuos ao mar”, sinalou García. “Coidar a praia e recoller todo o lixo este ano é máis importante aínda, se cabe, xa que coas mareas vivas todas as botellas, plásticos e bolsas que non se baixen á praia e non se recollan acabarán irremediablemente no mar”, aseverou.

O Concello abre unha convocatoria de 40.000 euros para que entidades sen ánimo de lucro da cidade realicen actividades que promovan a cultura ambiental e a autoxestión

Junio 15, 2017 coruna No Comments

A concelleira de Medio Ambiente, María García, presentou as liñas xerais da segunda convocatoria de subvencións do Concello da Coruña destinada a entidades sen ánimo de lucro co obxectivo de que desenvolvan actividades que promovan a cultura ambiental. “Esta iniciativa tamén servirá para fomentar o empoderamento da autoxestión cidadá”, indicou a responsable municipal que destacou “o ilusionante dun proxecto que se basea en apoiar iniciativas que son presentadas polos colectivos cidadáns e que buscan a defensa e a conservación do medio ambiente”. Dotada cun orzamento de 40.000 euros, que poderá ampliarse en base á calidade proxectos presentados, García destacou que a iniciativa “entronca coa idea que dende o principio defendemos e que pasa por entender o coidado do medio ambiente como unha tarefa colectiva e compartida”.

De cara a canalizar esforzos e centrarse nesta convocatorias en políticas ambientais consideradas neste momento como prioritarias, a convocatoria de subvencións céntrase en dous tipos de proxectos: por un lado, todo o que ten que ver coa xestión de residuos e a economía circular, e polo outro os que teñen que ver coa recuperación e conservación da natureza urbana. “Cremos que estas dúas liñas de actuacións inflúen directamente na loita contra o cambio climático. Os proxectos que se presenten serán compatibles por tanto coas accións que estamos desenvolvendo dende o propio Goberno local”, subliñou a concelleira García. “Convidamos ás entidades a que as iniciativas presenten diferentes formatos, dende charlas nos barrios, até vídeos virais, campañas, excursións ou marchas”, destacou.

O proceso para o reparto de subvencións levarase a cabo mediante un proceso de concorrencia competitiva, con criterios obxectivos. “A aposta dende o Goberno local é que as entidades poidan concorrer en situación de igualdade entre todas elas en procesos onde se prime a calidade dos proxectos e que sexan transparentes e obxectivos. Este tema non era prioritario para outros Gobernos, pero si para nós”, salientou a concelleira.

Bases

Para poder presentarse a estas convocatorias será necesario que as asociacións (ambientalistas, culturais ou veciñais) non teñan ánimo de lucro e estean constituídas dentro do municipio. As bases da convocatoria publicaranse a partir do día 19 de xuño no BOP. A partir desa data as entidades terán un mes para presentar os seus proxectos.

Mobilidade inicia hoxe o operativo de sinalización das terrazas das 34 rúas da zona centro afectadas pola regulación específica que garante o dereito á accesibilidade

Junio 14, 2017 coruna No Comments

A Concellería de Mobilidade Sostible, dirixida por Daniel Díaz Grandío, inicia hoxe, mércores 14 de xuño, as tarefas de sinalización das terrazas de hostalería de 34 rúas da zona centro da cidade de alta concentración hostaleira e afectadas pola ordenación singular aprobada pola Xunta de Goberno local o pasado 2 de xuño. As actuación de marcaxe –que se acometen logo da recente adxudicación do contrato do servizo de inventario, cartografía e sinalización das terrazas– iniciaránse nas rúas Troncoso e Rego de Auga, e a previsión é que estean culminadas nun período de 15 días.

“Mañá iniciamos de forma efectiva un proceso no que levamos moito tempo traballando e que é fundamental para regular o ordenamento do espazo público”, explicou o concelleiro Díaz Grandío. “Aplicar o ordenamento singular das terrazas das rúas peonís situadas no ámbito do plan de especial protección de Cidade Vella e Pescadería e adxudicar o contrato de sinalización posibilitan que este verán as rúas da zona centro da cidade con ampla concentración hostaleira teñan o seu espazo regularizado, permitindo, en calquera caso, garantir o dereito da cidadanía á accesibilidade e á asistencia sanitaria de urxencia”, destacou o edil, que supervisará na xornada de mañá o inicio das actuacións que serán levadas a cabo nun proceso no que se manterá informados e informadas en todo momento aos e ás hostaleiras.

Ademais de Capitán Troncoso e Rego de Auga, as rúas nas que se procederá á marcaxe do espazo das terrazas en base á aplicación do ordenamento singular aprobado en Xunta de Goberno son Alameda, Arévalo, Travesías das Hortas, Estrela, Mantelería, Olmos, Galera, Arco, Boquete de San Andrés, Álvaro Cebreiro, Travesía da Mariña, Agar, Luchana, Fama, Real, Torreiro, Travesía da Estreita de San Andrés, Travesía de Cordonería, Barreira, San Nicolás, Bailén, San Agustín, Florida, Franxa, Ángel, Oliva, Trompeta, Marqués de Cerralbo, Travesía de Porta de Aires, rúa Real e caleixón da Estacada.

Ordenamento singular

Segundo a aplicación do ordenamento singular, nas rúas peonís cun ancho de vía superior aos 6 metros deixarase un itinerario peonil mínimo e libre de obstáculos de 3 metros, sendo a ocupación máxima do ancho de vía permitida de menos do 50%. Por outro lado, nas rúas cun ancho de entre 2,5 e 6 metros deixarase un itinerario peonil libre de obstáculos de 2,5 metros, de forma que se permita o paso de vehículos de emerxencia e outros autorizados. Nas rúas peonís cun ancho de entre 1,80 metros e 2,5 metros deixarase un itinerario peonil libre de obstáculos de 1,80 metros, non sendo posible instalar terrazas nas rúas peonís con ancho inferior aos 1,80 metros.

Con todo, este ordenamento ampliará o abano de posibilidades para o emprazamento das terrazas de cara a facilitar que non só poidan ampliar o seu espazo á area colindante na que se atopan, senón tamén ás zonas enfrontadas, no caso de que conten coa autorización dos ou das propietarias. En canto ao mobiliario autorizado, a dimensión dos parasoles non poderá superar o espazo autorizado mentres, no que atinxe aos toldos, só se permitirá a colocación daqueles que conten con licenza urbanística e, igualmente, sen saír do espazo acoutado.

O alcalde destaca a aposta do Goberno local “polo tecido creativo” e a proxección da Coruña “como cidade de música” a través do XXXI Festival Noroeste Estrella Galicia, no que participarán máis de 100 artistas

Junio 13, 2017 coruna No Comments

O alcalde da Coruña, Xulio Ferreiro, presentou a 31a edición do Festival Noroeste Estrella Galicia, a cita musical que se celebrará entre os días 8 e 13 de agosto en distintos espazos da cidade. “O Noroeste é sen dúbida o festival urbano máis importante do Estado e que ten as prazas e as rúas da Coruña como escenario”, afirmou o rexedor, quen lembrou que se trata dunha cita na que participarán máis de 100 artistas, e que contará con Kaiser Chiefs e The Jesus and Mary Chain como principais cabezas do cartel, que xa conta coa confirmación de bandas como Surfin’ Bichos, Eladio y los Seres Queridos, Rosalía & Refree ou Los Mambo Jambo, “e que se ampliará nas próximas datas”. “Este festival é unha aposta pola música, pola cultura e pola proxección estatal e internacional da Coruña como unha cidade de vangarda”, destacou Ferreiro, quen aseverou que o evento “é unha cita única para vir e e gozar da música da cidade”. “O festival leva tres anos medrando en días, artistas e horas de música ao vivo, o que demostra a aposta esencial deste Goberno pola cultura como mascarón de proa na proxección de cidade, e que afonda na idea da Coruña como cidade da música”, sinalou o rexedor, quen engadiu: “Estamos a consolidar un evento que está a ter repercusión en todo o Estado, cada verán atrae novos visitantes e xa é unha cita imprescindible para moitas persoas que se achegan á nosa cidade”.

Así, do día 8 ao 13 de agosto, máis de 100 artistas e bandas actuarán na cidade, das que “practicamente a metade son locais ou galegas”, destacou o alcalde, que estivo acompañado polo concelleiro de Culturas, Deporte e Coñecemento no acto. “Esta iniciativa confirma de novo o compromiso deste Executivo polo tecido creativo local. O Noroeste debe ser unha plataforma que tamén proxecte o talento coruñés e galego”, sinalou Ferreiro. Esta asociación co sector cultural materializarase tamén este ano a través da colaboración de cinco axentes locais galegos na confección da programación do evento, como son Clubtura, Cuac FM, Desconcierto Cultural, Músicos ao Vivo e Nave 1839. Así mesmo, o alcalde, agradeceu a Estrella Galicia –e ao seu marketing manager, Santiago Miguélez, quen tamén participou na presentación–, o apoio da compañía ao evento “para situar o festival como unha cita imprescindible”.

A edición de 2017 do Festival Noroeste manterá o seu carácter aberto á cidadanía e desenvolverase en distintos horarios ao longo da xornada, desde a mañá e até a noite, introducindo deste xeito as sesións matinais –nas que participarán artistas e bandas da escena musical independente galega e estatal — e o nomeado Noroeste+ –sesións con DJ’s locais e visitantes nos locais da cidade–, “contribuíndo á dinamización da cidade e do sector hostaleiro durante esta cita, que abrangue novos públicos”, lembrou Ferreiro. Como é habitual, durante todo o día o Noroeste celebrarase en numerosos espazos públicos, como son o Campo da Leña, Casa Museo Casares Quiroga, Castelo de San Antón, Fundación Luis Seoane, Paseo das Pontes, Praia de Riazor, as prazas das Bárbaras, Galera, José Sellier e San Nicolás, ou as rúas Torreiro, Capitán Troncoso. Praza das Bárbaras, praza da Galera, entre outros. Ademais, este ano ofrecerá un complemento de pago a través da Selección Noroeste, que terá lugar en dous espazos singulares da cidade e de xestión pública, como son o Teatro Rosalía de Castro e o Teatro Colón, nos que actuarán Swans e Rodrigo Leao, respectivamente. As entradas para estes dous concertos sairán á venda nas próximas datas.

Para coñecer toda a programación e horarios do Festival Noroeste Estrella Galicia 2017, pode visitarse a páxina web www.festivalnoroeste.com .

ENCUESTA SEMANAL

¿Te gusta la nueva web?

Cargando ... Cargando ...