Home » coruna » Recent Articles:

Os servizos de seguridade do Concello atenderon 35 incidencias en locais e vivendas de particulares a causa da tromba de auga

julio 2, 2018 coruna Comentarios desactivados en Os servizos de seguridade do Concello atenderon 35 incidencias en locais e vivendas de particulares a causa da tromba de auga

As intensas choivas caídas no día de onte provocaron incidencias en distintos puntos da cidade, ademais de cortes de tráfico que se foron solventando ao longo da tarde. No momento no que se comezaron a producir os incidentes, o Concello puxo en marcha un dispositivo especial cuxo posto de mando se situou no parque de Bombeiros, composto por este corpo, así como por responsables da Policía Local e de Protección Civil. Ademais de solventar as incidencias de tráfico producidas pola choiva, os servizos de seguridade atenderon entre as 17.00 horas e o peche do operativo, na madrugada do sábado ao domingo, 35 intervencións tanto en locais como en vivendas de particulares, das cales, 27, se acometeron entre as 17.00 e as 20.00

horas, o tramo máis conflitivo. ​A intensidade da choiva foi tal que se rexistrou un acumulado de até 40 litros por metros cadrado ao longo da xornada. En tan só media hora, entre as 17.00 e as 17.30 horas contabilizáronse choivas que deron lugar a unha caída de 20 litros por metro cadrado.

“As consecuencias máis inmediatas da tromba de auga foron inundacións en distintos puntos da cidade, sobre todo, na zona centro, dende a avenida do Exército con Ramón y Cajal até a Mariña”, comentou a concelleira coas competencias de Seguridade Cidadá, Rocío Fraga, quen indicou que contra as 19.30 horas a situación “foise normalizando, quedando o operativo de tráfico restablecido contra as 20.30 horas”. O túnel da Mariña rexistrou tamén incidencias debido ao desborde dunha tubaxe.

A intensa caída de auga coincidiu coa preamar, o que derivou en que, ademais dos problemas de tráfico, se rexistraron inundacións en aparcadoiros subterráneos de praza de Vigo e Cantóns, así como noutros de persoas particulares da zona. Tamén entrou auga en locais comerciais e de hostalería na zona da Mariña, así como en Juana de Vega, Linares Rivas e Paseo Marítimo, principalmente. A auga tamén afectou a transformadores subterráneos, o que provocou afeccións na luz en vivendas e tamén no propio servizo público, especialmente na zona entre Linares Rivas e o Paseo Marítimo.

… Leer más

A Deputación achega 1.500.000 euros para financiar a Orquestra Sinfónica de Galicia

julio 1, 2018 coruna Comentarios desactivados en A Deputación achega 1.500.000 euros para financiar a Orquestra Sinfónica de Galicia

A Deputación da Coruña achega 1.500.000 euros ao programa de actividades da Orquestra Sinfónica de Galicia e promove que haxa actuacións en distintos concellos da provincia. Este investimento supón o 70,75% do total, que ascende a 2.120.000 euros.

Ademais da Coruña, onde ten a súa sede, as distintas agrupacións da Orquestra Sinfónica de Galicia visitarán con concellos como Santiago de Compostela, Ferrol, Sada, Betanzos, Carballo, Melide, Rianxo, Culleredo, Arteixo e Vimianzo. Que a programación da OSG chegue a distintos concellos e contribúa á difusión da música clásica no territorio é un dos puntos recollidos no convenio aprobado por unanimidade no pleno deste venres. … Leer más

O Concello reforza o servizo de recollida de residuos no centro durante o verán, que suma unha quenda diúrna e máis contedores

junio 30, 2018 coruna Comentarios desactivados en O Concello reforza o servizo de recollida de residuos no centro durante o verán, que suma unha quenda diúrna e máis contedores

A Concellería de Medio Ambiente pon en marcha o domingo o reforzo do servizo de recollida de residuos na zona centro da cidade, que estará activo ata finais de agosto “manter a limpeza da vía na zona de maior concentración hostaleira da cidade durante unha das épocas de maior consumo do ano”. A edil María García explica que durante xullo e agosto se introduce unha segunda quenda de recollida do lixo ao día, na que os e as hostaleiras poderán depositar os residuos entre as 15.00 e as 17.00 horas, que se suma á que se fai habitualmente de a partir das 22.00 horas. O reforzo inclúe tamén a colocación de 20 contedores estacionais máis –que se habilitarán só nas horas nas que está autorizado o depósito do lixo– na zona centro, dos cales 12 están destinados a materiais inorgánicos e 8 para orgánicos, e o uso de dos camións de recollida a maiores.

“Un ano máis mantemos este dispositivo, que vén suplir, por unha banda, as carencias de contedores nas rúas que máis locais de hostalaría concentran, e onde non se poden instalar máis colectores por falta de espazo, e, pola outra, a falta dun plan especial no actual contrato de recollida de residuos para a zona centro que axude a diminuír o seu impacto no espazo público”, explica García, que apunta que a nova licitación do contrato xa contempla medidas que dean solución “á pouca capacidade de recollida” na Pescaría. Mentres, o plan de reforzo, que ten un custe de 58.338 euros, duplica, nunha “época onde coinciden a maior afluencia de público, cun aumento do consumo e, polo tanto, dos residuos”, o sistema de recollida “co obxectivo de manter a limpeza do espazo público e dar solución tamén aos locais que non poden gardar un alto volume de residuos durante todo o día”.

A concelleira fai un chamamento tanto a cidadanía como ao sector hostaleiro para que respecten os novos horarios de recollida, que, como advirte, “se farán cumprir estritamente”, e convida a todos e todas a colaborar na xestión do lixo facendo unha correcta separación do mesmo.

O goberno local mellora e amplía o sistema de bocas de rego con 931 dispositivos en toda a cidade, “que contribuirán a unha maior limpeza viaria e ao coidado de parques e xardíns”

junio 30, 2018 coruna Comentarios desactivados en O goberno local mellora e amplía o sistema de bocas de rego con 931 dispositivos en toda a cidade, “que contribuirán a unha maior limpeza viaria e ao coidado de parques e xardíns”

A Xunta de goberno local deu luz verde este venres á adxudicación do contrato para o subministro e montaxe de bocas de rego en toda a cidade, o que facilitará e mellora as tarefas tanto de limpeza viaria como de mantemento e coidado de parques, xardíns e zonas verdes. Cun orzamento de 289.000 euros e un prazo de execución de 7 meses, forma parte dos proxectos que o executivo local aborda dentro dos denominados investimentos financeiramente sostibles (IFS), que foron aprobados a finais do pasado ano polo Pleno municipal e que se sosteñen sobre o remanente do ano 2016. Na súa comparecencia ante os medios, o alcalde da Coruña, Xulio Ferreiro, salientou que a reunión do goberno local aprobou esta adxudicación logo de que a semana pasada se dese o visto e prace a outra intervención moi demandada que forma parte do paquete de investimentos dos IFS, como é a renovación do firme dos Rosais. “Neste momento, tamén temos pendentes de impulsar de forma inminente outras intervencións para a mellora do espazo público que serán pagadas con ese remanente como é o caso das obras de mellora e modernización da iluminación pública nos Rosais, Labañou, San Roque de Fóra, Cidade Escolar e un tramo da Rolda de Outeiro, ademais da instalación de luminarias de alta eficiencia na Grela-Bens ou a ampliación da iluminación en Matogrande.

Coa aplicación deste contrato, A Coruña pasará a ter 931 bocas de rego, un 16% máis das que ten na actualidade. Ao fío, o alcalde salientou que este contrato, posto en marcha pola Concellería de Medio Ambiente, non só inclúe o incremento de dispositivos, senón que tamén contempla o cambio ou reparación daqueles que, na actualidade, presentan algún tipo de deficiencia. En concreto, das 931 bocas de rego que se repartirán por toda a cidade, 394 serán completamente novas. Desta cantidade, 324 estarán ubicadas na cidade, mentres que 41 se localizarán no polígono da Grela e 28 en Pocomaco. Ademais, 496 das actuais serán substituídas e 41 das mesmas serán reparadas.

Por outro lado, e sobre a actividade do goberno, o alcalde deu conta dos expedientes relativos a licenzas e comunicacións previas tramitadas entre o 13 e o 26 de xuño inferiores a 1,2 millóns de euros polo departamento de Rexeneración Urbana, que dirixe Xiao Varela. Neses 15 días, a administración local tramitou 230 expedientes, entre os que destacan 41 licenzas urbanísticas, 109 comunicacións previas ao inicio de obras e 61 comunicacións previas ao inicio de actividades ou apertura de establecementos.

Ao respecto de actuacións impulsadas polo executivo municipal, Ferreiro salientou o traballo que está a desenvolver para a reparación do firme da calzada da Rolda de Outeiro, así como a mellora da accesibilidade e da seguridade, co tratamento tamén da sinalización e os pasos de peóns. O primeiro edil salientou que a Xunta de goberno local concedeu este venres unha prórroga de tres meses ao contrato para a renovación e rehabilitación dos firmes dos tramos comprendidos entre a avenida do Ferrocarril e a rúa Mercede “debido a que a situación meteorolóxica dos últimos meses impediu que se puidesen rematar no prazo estipulado”. Con todo, o alcalde destacou o importe traballo de rexeneración urbana que se está a acometer nesta arteria da cidade, xa que esta mesma semana se adxudicou o contrato para o derradeiro tramo no que se actuará dentro do proxecto en marcha, e que comprende o espazo entre as avenidas de Arteixo e do Ferrocarril. Por agora, o executivo municipal leva investido nesta vía preto de 830.000 euros repartidos en 2.130 metros de lonxitude.

As propostas dos Orzamentos Participativos reciben 24.075 apoios, o que supón un incremento do 83% respecto da pasada edición

junio 30, 2018 coruna Comentarios desactivados en As propostas dos Orzamentos Participativos reciben 24.075 apoios, o que supón un incremento do 83% respecto da pasada edición

A fase de apoios ás propostas dos Orzamentos Participativos rematou cun incremento do 83% no número de respaldos, que ascenderon a 24.075 este ano fronte aos 13.113 do anterior. A concelleira de Participación e Innovación Democrática, Claudia Delso, resaltou este venres que “ao longo de todas as fases do proceso se están mellorando este ano os resultados das edicións anteriores, tanto en número de propostas como de rexistros na plataforma, de persoas usuarias e participantes”. En total, foron 2.283 veciños e veciñas os que repartiron os seus apoios –foron 1.421 no pasado ano–, cunha media de 10,5 por persoa, entre as 696 propostas que foron consideradas viables inicialmente. As que recibiron máis de 80 apoios en toda a cidade e as 15 máis respaldadas de cada distrito comezaron o día 22 de xuño unha nova fase de avaliación técnica nos servizos municipais correspondentes, que determinarán a súa viabilidade, legalidade e custe económico. Esta fase rematará a mediados do mes de agosto, cando comezará a votación final.

Tal e como explicou Delso, os apoios tenderon a concentrarse en propostas que fan referencia a infraestruturas (14.148), que acaparan o 60%, e ás que seguen as de medio ambiente (8.162), urbanismo (2.186), deportes (1.777) e cultura (1.396). O proceso dos Orzamentos Participativos serve para que a cidadanía poida decidir o destino de tres millóns de euros de investimento, dos que un valerá para financiar propostas para toda a cidade e dous millóns se reparten, equitativamente, entre os dez distritos da cidade, “xa que se trata dunha ferramenta redistributiva”. As propostas de cidade que recibiron máis apoios nesta fase son a instalación de contedores de reciclaxe por incentivos, a creación dun gran bosque da Coruña e a posta en marcha dunha compañía pública de enerxía renovable. Entre as que acadaron máis respaldo nos distritos están, por exemplo, a instalación dunha cuberta para o patio central do CEIP María Pita, no distrito 7, a creación dun parque no Ventorrillo e Agra do Orzán ou a reurbanización da rúa Panadeiras. Toda a información pode consultarse dentro da plataforma dixital que dá soporte ao proceso,aportaaberta.coruna.es​. Os servizos técnicos municipais avaliarán un total de 183 propostas, das que 44 corresponde ao ámbito da cidade e 139 aos 10 distritos. Unha vez finalizado este proceso faranse públicas as propostas, tanto as aprobadas como as rexeitadas, xunto cos informes pertinentes.

… Leer más

ENCUESTA SEMANAL

¿Te gusta la nueva web?

Cargando ... Cargando ...