Home » coruna » Recent Articles:

Díaz Grandío esixe “responsabilidade” á Xunta e pide ao Goberno galego “que defina de inmediato as competencias concretas da Comisión de Seguimento”

Junio 10, 2017 coruna No Comments

O concelleiro de Mobilidade Sostible, Daniel Díaz Grandío, esixiu á dirección xeral de Mobilidade da Xunta de Galicia que defina, “de inmediato”, as competencias da Comisión de Seguimento do Plan de Accesibilidade do Transporte Interurbano ao centro urbano da Coruña. “Este Goberno entende que este órgano é o marco fundamental para seguir traballando desde as dúas administracións na implementación do proxecto”, sinalou o edil. “Mentres non se definan as súas competencias e funcións concretas, non haberá Plan de Accesibilidade”, sentenciou Grandío. “É unha cuestión de responsabilidade. A día de hoxe, a Xunta aínda non ten unha resposta firme e realista á pregunta formulada por este Concello, de que pasaría se na praza de Ourense xorden problemas polo acceso de interurbano ao centro, que provoquen interferencias graves co transporte público urbano e o tráfico, e se sería posible dar marcha atrás ao plan retirando autobuses interurbanos aos que xa se lles deu a confirmación á entrada na primeira fase do plan. ”, explicou o responsable municipal.

“O Goberno local da Coruña quere garantir e asegurar o desenvolvemento sostible e integrado do sistema de transporte público urbano a través da creación dunha Comisión que poida avaliar e reformular o plan, durante a súa implantación”, sinalou o concelleiro, quen engadiu: “a veciñanza non pode nin debe sufrir as consecuencias dun proxecto aprobado unilateralmente pola Xunta e que non ten a suficiente visión de futuro como para poder evitar, á maior brevidade posible, calquera problema que poida xurdir durante a súa posta en marcha”.

O titular de Mobilidade Sostible tamén solicitou á Xunta de Galicia “lealdade institucional cos concellos da área metropolitana coruñesa”, que pediron unha xuntanza coa conselleira de Infraestruturas, Ethel Vázquez –a través dunha misiva enviada o 22 de febreiro de 2017–, para expoñer a súa visión e requirimentos sobre o Plan. “Esiximos diálogo e lealdade institucional para abordar o futuro do transporte da comarca. Queremos garantir que se teña presente a voz dos distintos municipios da área metropolitana, na que conviven máis de 400.000 persoas”. “Mentres a conselleira non se sente cos 10 alcaldes e alcaldesa non haberá Plan de Accesibilidade”, afirmou o concelleiro, quen lembrou que a actitude de Vázquez foi reprobada polo Pleno da Coruña na sesión ordinaria do pasado luns 5 de xuño.

Neste sentido, o edil tamén se referiu á concesión XG-529 A Coruña-Canzobre, “que demostra o nulo interese da Xunta, de novo, por avanzar cara a unha coordinación integral do transporte urbano co metropolitano”. “Esta concesión está dentro do ámbito de correspondencia de interese para a futura área metropolitana da Coruña, polo que solicitamos, unha vez máis, que todas as concesións de transporte metropolitano dentro da coroa formada polos concellos de A Coruña, Oleiros, Cambre, Culleredo, Arteixo, Sada, Bergondo, Betanzos, Abegondo e Carral, se traten dun xeito integral, para avanzar así na posta en marcha e coordinación dun sistema coordinado, eficiente e sostible de transporte, coa finalidade de formalizar unha autoridade única que xestione o transporte na área metropolitana da Coruña”, aseverou o responsable municipal.

O Concello asina con Iberia e a Cámara un protocolo para promocionar a cidade como destino de investimentos empresariais, turismo e congresos nos enlaces aéreos

Junio 9, 2017 coruna No Comments

O concelleiro de Emprego e Economía Social, Alberto Lema, subscribiu un protocolo de colaboración entre o Consorcio de Turismo da Coruña –do que é presidente–, a Cámara de Comercio da Coruña e Iberia para a promoción da Coruña como destino de investimentos empresariais, de turismo e congresos, a través dos medios de comunicación escrita e audiovisuais da compañía aérea, como son as revistas Ronda e Excelente ou dun concurso nas súas redes sociais. O acordo pon en valor o “medio excepcional” que compoñen as canles de comunicación, publicidade e marketing dos que se vale Iberia “como base e soporte de diversas accións, subseguintes e complementarias e accións destinadas á promoción e difusión turística, cultural, industrial e comercial da cidade da Coruña como destino de investimentos”. “Este convenio é especialmente destacable e vén a consolidar unha relación da que tamén forma parte a operatividade das conexións da Coruña con Madrid”, indicou o responsable municipal en referencia ao compromiso por parte de Iberia de manter os voos cos que a compañía enlaza A Coruña con múltiples destinos, “tanto de forma directa como en conexión”.

O protocolo, que o concelleiro de Emprego e Economía Social asinou esta mañá co presidente da Cámara da Coruña, Antonio Couceiro, o director de Ventas España de Iberia, Víctor Moneo, e o director de Comunicación e Relacións Institucionais de Iberia, Juan Cierco, explicita a oportunidade de establecer accións de colaboración, “que reforcen a imaxe da Coruña, usando como medio tanto a publicidade como as rutas e frecuencias e colaborando todas as partes en mellorar o atractivo da cidade como destino turístico, comercial, industrial ou cultural en diferentes mercados”, así como a potenciación de determinadas actividades, eventos ou oportunidades empresariais relacionadas coa Coruña, “especialmente aqueles cos que a cidade estea directamente conectada, ou con destinos ou puntos de orixe nacional ou internacional, por vía aérea”.

No marco da rolda de prensa, posterior á firma do convenio, –na que, ademais dos asinantes, tamén estaba presente Gonzalo Ortiz, director xeral da Cámara– o concelleiro de Emprego destacou a necesidade de que AENA dote ao aeroporto de Alvedro “dos investimentos necesarios”. “Entendemos que o noso aeroporto conta cunha serie de desvantaxes competitivas respecto ás terminais da súa contorna que radica nas dificultades de aterraxe nunha das súas pistas, e iso debería plasmarse nun maior investimento no aeroporto”. “Non obstante, o investimento que recibimos é comparativamente máis baixo”, destacou. “Tanto o Concello, como neste caso a Cámara de Comercio debemos ter unha soa voz para reclamarlle a AENA que estimule e impulse as ferramentas necesarias para que A Coruña teña o aeroporto que se merece”, dixo, á vez que salientou o crecemento que está experimentar Alvedro “a pesar das dificultades”. “Levamos 13 meses de crecemento e seguiremos medrando nos resultados do mes de maio, polo que cremos que a nosa aposta por reforzar as conexións con Barcelona e manter a operatividade con Madrid está a dar resultado”, salientou.

Máis de 200 alumnos e alumnas da cidade solicitaron participar nos cursos de inmersión lingüística Idiomas do Mundo, que terán lugar este verán en cinco destinos de Europa

Junio 8, 2017 coruna No Comments

Máis de 200 estudantes de toda A Coruña solicitaron participar este ano no programa municipal de inmersión lingüística, Idiomas do Mundo, destinado a rapaces a rapazas que cursan 4o de ESO ou Primeiro de Bacharelato. Trátase da segunda edición dun programa posto en marcha pola Concellería de Xustiza Social e Coidados que ofrece 80 bolsas para que o alumnado da cidade poida pasar unha estadía de catro semanas durante os meses estivais en Irlanda e Reino Unido, Portugal, Francia, e Alemaña e Austria co obxectivo de afondar no estudo dos idiomas inglés, portugués, francés e alemán. En concreto, das 203 inscricións realizadas, 174 foron as que pasaron a criba inicial, cumprindo todas as persoas solicitantes os requisitos requiridos nas bases de participación. “A nosa previsión é poder facer público ao longo da próxima semana a listaxe definitiva de rapaces e rapazas que se beneficiarán destes cursos lingüísticos”, explicou Cameán, que recordou que “os criterios de progresividade serán fundamentais á hora de escoller as persoas beneficiarias”.

A titular de Xustiza Social salientou ademais que este ano o Concello percibiu moitas máis solicitudes de participación que o pasado, cando se levou a cabo a primeira edición deste programa. “As solicitudes admitidas este ano son 174, fronte ás 116 do ano pasado”, destacou, á vez que recordou que “á marxe de Idiomas do Mundo, o Concello ten outros programas que buscan que a nosa veciñanza teña a posibilidade de poder aprender idiomas estranxeiros nos países de orixe”, dixo, en alusión ás bolsas Junior Year ou aos programas Acore Europa, para prácticas de Formación Profesional do estranxeiro.

A Concellería de Xustiza Social repartirá bolsas de carácter total –destinadas a aqueles e aquelas participantes seleccionadas cuxas familias non superen os 9.000 euros de renda per cápita–, así como bolsas parciais. Nestas, o Concello asumirá un máximo do 95% e un mínimo do 5% do custo total das prazas do alumnado subvencionado que supere os 9.000 euros anuais de renda. As porcentaxes variarán en función da renda per cápita. Á hora de escoller, de entre todas as persoas solicitantes, aos e ás beneficiarias das bolsas de Idiomas do Mundo, o departamento de Xustiza Social insistiu na necesidade de primar “non só o expediente académico, senón tamén a situación de renda das familias”, de forma que “dende as institucións públicas se prime, realmente, o acceso de toda a poboación a unha educación pública de calidade”.

A Coruña acolle durante todo xuño actividades con motivo do Orgullo LGTBQI, “na aposta por dar visibilidade e voz ás diversidades que historicamente foron silenciadas”

Junio 7, 2017 coruna No Comments

Durante todo este mes de xuño a cidade da Coruña encherase de actividades e accións que teñen como principal obxectivo reivindicar os dereitos e visibilizar ao colectivo LGTBQI. Baixo o lema Vive a túa Cor. Sexualidades Diversas, Identidades Libres,o Concello, a través do departamento de Igualdade e Diversidade, en colaboración co de Culturas, programará distintas accións ao longo de toda a cidade e en distintos escenarios. En rolda de prensa, a titular desta concellería, Rocío Fraga, destacou que a programación “foi totalmente consensuada cos colectivos LGTBQI da cidade por medio dun proceso participativo”. “A nosa intención en todo momento foi que as propias persoas que integran os colectivos e os movementos sociais a prol das diversidades puideran escoller as accións a desenvolver. Eles máis que ninguén son conscientes da necesidade de visibilización, polo que cremos que tampouco había persoas mellores á hora de escoller e programar as actividades”, indicou Fraga. En concreto, o proceso participativo de definición dos actos con motivo do Día do Orgullo contou con colectivos como 7 Cores, Alas Coruña ou a Marea LGBTI+. “Tamén temos que destacar a cooperación de outras asociacións como Casco, Agasex ou Quérote que estarán presentes nas carpas que se montarán o sábado 17 de xuño no Campo da Leña, con motivos da festa polos dereitos LGTBQI”, dixo a concelleira.

“Historicamente, esta cidade contou sempre con colectivos e persoas vinculadas aos movementos sociais que loitaron de forma incansable para ser un referente na visibilización e defensa dos dereitos LGTBQI. Non obstante, tamén historicamente, esa loita non tivo a súa correspondencia nas institucións públicas. Hoxe podemos dicir que isto cambiou. Este Concello é plenamente consciente dos desafíos dunha sociedade plural e repleta de diversidades. A nosa obriga e encomenda é facer desta unha cidade máis igualitaria e máis xusta polo que entendemos como fundamental organizar todo un mes de actividades ligadas ao Orgullo. Estamos dando voz e poñendo o foco sobre colectivos que historicamente foron silenciados neste país, tanto en períodos de represión como na propia etapa democrática”, comentou a concelleira de Igualdade e Diversidade. … Leer más

O Goberno local pon en marcha o novo programa A Pé de Barrio, “un plan intensivo de mellora do espazo público que dará a volta á cidade cada ano para saldar unha débeda histórica coidando por igual as distintas zonas”

Junio 7, 2017 coruna No Comments

O alcalde da Coruña, Xulio Ferreiro, xunto coas concelleiras de Participación e Innovación Democrática, Claudia Delso, e de Medio Ambiente, María García, e o titular de Rexeneración Urbana e Dereito á Vivenda, Xiao Varela, presentou este martes no Campo de Marte o novo programa municipal A Pé de Barrio, “un plan intensivo de mellora do espazo público que busca saldar unha débeda histórica cos barrios da cidade, que son eses lugares de proximidade onde facemos a vida” e que se porá en marcha o vindeiro día 19 no distrito 10, que abrangue Monte Alto, Atochas, Cidade Vella, Orillamar, As Lagoas, Pelamios, Zalaeta, Orzán, Maestranza, Peixería, Durmideiras, A Torre e Agra de San Amaro. “O espazo público é a cidade común, o lugar que compartimos, onde convivimos e onde nos atopamos. Nesa cidade dos barrios, coidar o espazo público é esencial”, salientou Ferreiro, quen sinalou que o programa sumarase ao mantemento diario que se realiza a través da limpeza das beirarrúas e da reparación das calzadas, a recollida do lixo ou o mantemento do mobiliario urbano e dos parques e xardíns.

O programa “coordina e optimiza” os distintos servizos de Rexeneración Urbana e de Medio Ambiente, que van desde desde a limpeza viaria e o mantemento dos firmes, mantemento de contedores, retirada de herbas das beirarrúas, coidado de parques, xardíns e espazos biosaudables, limpeza e repintado de semáforos e de sinalización horizontal e pasos de peóns, e coidado do alumeado público ou as fontes ornamentais, entre outras. “Queremos construír unha cidade cun espazo público de calidade, e por iso lanzamos este programa, que dará a volta á cidade cada ano: 10 distritos en 12 meses, barrio a barrio e en igualdade de condicións, porque coidaremos por igual do barrio de Eirís e Monte Alto, que de Juan Flórez, e A Silva que a praza de Lugo”, indicou. Nese sentido sentido, o alcalde salientou a articulación do mapa de distritos “como instrumento de gobernanza e proximidade e de igualdade entre os barrios da cidade”. … Leer más

ENCUESTA SEMANAL

¿Te gusta la nueva web?

Cargando ... Cargando ...