Home » Deportes » Recent Articles:

A piscina municipal de Riazor acolle este domingo unha nova edición dos Xogos Autonómicos de Natación Special Olympics Galicia

octubre 17, 2018 Deportes Comentarios desactivados en A piscina municipal de Riazor acolle este domingo unha nova edición dos Xogos Autonómicos de Natación Special Olympics Galicia

O concelleiro de Culturas, Deporte e Coñecemento, José Manuel Sande, presentou a 22a edición dos Xogos Autonómicos de Natación Special Olympics Galicia, que se celebrarán este domingo, 21 de outubro, na piscina municipal do Pazo dos Deportes de Riazor. A competición, que reunirá a máis de 300 persoas deportistas, adestradoras voluntarias e integrantes da organización, abrangue numerosas probas con distintos niveis e estilos de natación adaptada “para que as e os participantes poidan formar parte desta actividade en igualdade de condicións”, explicou Sande. Neste sentido, o responsable municipal salientou “a vontade de integración e o fomento da práctica deportiva desde a súa vinculación á saúde destes Xogos, que priman por riba doutras consideracións e que inciden no que debe ser un dos obxectivos fundamentais do deporte”.

A xornada, organizada por Special Olympics Galicia e na que colaboran Fademga Plena inclusión Galicia e Aspronaga, comezará ás 10.45 horas, cun desfile inaugural no que estarán presentes as e os máis de 200 deportistas de 22 asociacións galegas que participarán nestes xogos así como as súas adestradoras e adestradores. A competición, que ten por lema ​Quero gañar, mais se non o consigo, deixádeme ser valente no intento​, desenvolverase a partires das doce da mañá, con probas de distintos estilos –costas, braza, bolboreta e crol– e distancias –25, 50, e 100 metros–, ademais dunha proba de relevos. Cada deportista, tal e como explicou o presidente de Special Olympics Galicia, Eladio Fernández, poderá participar en até un máximo de 3 probas.

A competición, na que Aspronaga exercerá de anfitrioa, desenvolverase até as 19.00 horas, momento no que se celebrará o acto de clausura dos Xogos, así como a entrega dos trofeos e medallas ás e aos participantes. Entre os premios, recoñecerase co galardón Boas Prácticas do Deporte á entidade que destaque polo comportamento, cumprimento das normas, o xogo limpo e o compañeirismo das e dos membros.

O concelleiro José Manuel Sande reivindica a cidade “como epicentro das carreiras urbanas de Galicia” durante a presentación da XII Coruña10, que se celebrará este domingo

octubre 2, 2018 Deportes Comentarios desactivados en O concelleiro José Manuel Sande reivindica a cidade “como epicentro das carreiras urbanas de Galicia” durante a presentación da XII Coruña10, que se celebrará este domingo

O Paseo Marítimo acollerá, o vindeiro domingo 7, a XII edición da Carreira Popular Coruña10. O concelleiro de Culturas, Deporte e Coñecemento, José Manuel Sande, presentou esta mañá a proba, que percorrerá a enseada do Orzán desde as 10.30 horas, e na que participarán 4.183 atletas nas distintas categorías. “Coruña10 é unha das citas destacadas da tempada nun ano moi relevante para a cidade a nivel deportivo grazas á renovación das pistas de atletismo do Campus de Elviña, pero tamén pola celebración do Campionato Estatal de Tríatlon, do Europeo de Hóckey Masculino ou as series mundiais de Roller Derby, entre outras propostas”, destacou José Manuel Sande, entre as que incluíu tamén as series de deportes urbanos do Festival Street Stunts, que se celebrou o pasado mes de xullo na Mariña.

“A Coruña é un cúmulo de constante actividade e demostra, coa celebración da C10, C21, C42, o circuíto de carreiras populares Coruña Corre, o Gran Premio de Marcha dos Cantóns, ou mesmo as numerosas probas de carácter solidario que apoia o Concello, que é o epicentro das carreiras urbanas en Galicia”, apuntou o edil, quen destacou a colaboración da Federación Galega de Atletismo na organización da Coruña10, “e que garante o seu bo desenvolvemento”.

A carreira absoluta de Coruña10 partirá ás 10.00 horas do Paseo da Habana. O circuíto, de 10.000 metros e homologado pola Real Federación Española de Atletismo (RFEA), discorre sobre o asfalto na súa totalidade, e percorrerá o Paseo de Ronda, Manuel Murguía, San Roque de Fóra e a avenida Gerardo Porto até o Millennium, onde o grupo dará a volta para continuar cara ás avenidas Buenos Aires e Pedro Barrié de la Maza, a través das cales avanzarán até chegar á rotonda situada ao pé da Torre de Hércules. Neste punto, as e os participantes regresarán sobre o Paseo Marítimo para chegar á meta, situada á altura do Pazo dos Deportes de Riazor. Nesta proba, na que tamén participarán atletas en cadeiras de rodas homologadas por IPC Athletics, destaca a participación de figuras como Paula Mayobre, Esther Navarrete ou Joselyn Brea, ademais de Alejandro Fernández Rivera ou Lolo Penas, gañadores de anteriores edicións.

… Leer más

A Concellería de Mobilidade Sostible celebrará este domingo a Festa da Bicicleta, unha iniciativa lúdica e participativa para fomentar os desprazamentos neste medio de transporte

septiembre 28, 2018 Deportes Comentarios desactivados en A Concellería de Mobilidade Sostible celebrará este domingo a Festa da Bicicleta, unha iniciativa lúdica e participativa para fomentar os desprazamentos neste medio de transporte

A Coruña celebrará o vindeiro domingo 30 pola mañá a Festa da Bicicleta, unha iniciativa impulsada pola Concellería de Mobilidade Sostible e que porá o broche á programación municipal de actividades ​Combina e móvete​, posta en marcha polo Concello co gallo da Semana Europea da Mobilidade. O acto, aberto á veciñanza, consistirá nunha serie de roteiros que partirán ás 12.00 horas da mañá da Praza de María Pita, nos que se ofertarán dúas modalidades en función da lonxitude do percorrido “para adaptarse así aos diferentes niveis de uso deste medio de transporte”, tal e como explica o edil Daniel Díaz Grandío.

“Esta iniciativa lúdica segue a liña de traballo posta en marcha pola Concellería de fomentar o uso e o coñecemento modalidades de transporte alternativas ao vehículo privado para desprazarse no termo municipal”, sinala, ao lembrar que, durante a programación de Combina e móvete “puxéronse en marcha distintas propostas neste sentido”, como a Feira da Bicicleta, na que se organizaron talleres de ergonomía e autorreparación, ademais dunha Escola da Bici “para dar a coñecer entre toda a veciñanza este medio de transporte, así como indicar os primeiros pasos que se deben dar para o seu correcto uso”.

Así, a Festa da Bicicleta, organizada en colaboración con Decathlon A Coruña, contará cun percorrido curto que contará cun circuíto de 2,55 quilómetros e que transitará polos treitos, postos recentemente en funcionamento, do carril bici metropolitano que transcorren entre a Praza de María Pita e a Praza de Ourense, ademais das rúas Compostela e Padre Feijoo. “Debido ao carácter participativo e lúdico da proposta, establecerase un punto de reagrupamento na metade do percorrido, á altura do quilómetro 1,3, en Padre Feijoo, para chegar todas e todos xuntos de volta á María Pita”, explica Grandío. Este reagrupamento terá lugar contra as 12.15 horas, para saír do punto de encontro ás 12.25 horas.

… Leer más

O Pazo dos Deportes de Riazor acollerá hoxe a celebración do XXXII Trofeo Teresa Herrera de Baloncesto Masculino

septiembre 26, 2018 Deportes Comentarios desactivados en O Pazo dos Deportes de Riazor acollerá hoxe a celebración do XXXII Trofeo Teresa Herrera de Baloncesto Masculino

​O Pazo de María Pita acolleu a presentación da XXXII edición do Trofeo Teresa Herrera de Baloncesto Masculino. A competición, da que o Concello da Coruña é unha das entidades organizadoras, será a partido único e enfrontará, hoxe 26, a partires das 20.45 horas, ao Basquet Coruña e ao Río Ourense Termal. O encontro celebrarase no Pazo dos Deportes de Riazor e a entrada será gratuíta até completar a capacidade do recinto municipal. Nesta ocasión, e baixo o lema ​Por unha cidade para todas as persoas​, o torneo terá ademais un carácter solidario, xa que se instalarán urnas para a recadación de achegas que se destinarán a dúas entidades sociais da cidade que traballan con persoas que se atopan en situación de vulnerabilidade, como son a Fundación Juan Soñador e SOS Racismo.

Basquet Coruña Comunicacion 18-19 Cartel Trofeo Teresa Herrera 01-04

A iniciativa, segundo expuxo a responsable municipal de Igualdade e Diversidade, Rocío Fraga, parte da discriminación que sufriu Larry Abia, xogador do Básquet Coruña, na procura de aluguer na cidade, e que o ​alero denunciou publicamente. “Estamos a constatar, a través de entidades sociais, situacións problemáticas para a poboación estranxeira á hora de atopar piso na cidade pola súa condición, precisamente, de migrantes, ou simplemente pola cor da súa pel ou polo seu aspecto racializado. O goberno da Coruña está a traballar da man de distintas institucións da cidade para tratar de erradicar o racismo. Por iso, cando o Basquet Coruña propuxo esta liña solidaria para o torneo, pareceunos interesante visibilizar o labor de entidades como Juan Soñador ou SOS Racismo, que realizan un traballo fundamental e imprescindible coa veciñanza racializada e ou estranxeira a través tamén do convenio que puxemos en marcha para desenvolver o Observatorio de Racismo e Xenofobia”, explicou a concelleira durante a presentación, na que tamén participou o edil de Culturas, Deporte e Coñecemento, José Manuel Sande. “Este trofeo, xa consolidado, presenta unha mestura de elementos necesarios nunha cidade aberta e solidaria, ademais de deportiva”, apuntou o concelleiro. Ao fío, o responsable municipal destacou que a iniciativa supón tamén “o inicio dunha tempada de celebración en Riazor, con cambios no Basquet Coruña, nun ano marcado pola ambición e que estará acompañado do anhelo de ACB da veciñanza”, expresou.

Durante a presentación do Teresa Herrera tamén estivo presente o propio Larry Abia como o xerente do club, Miguel García, quen asegurou que o partido de hoxe “será un derbi interesante, xa que tanto o Leyma como o Río Ourense Termal pelexarán esta tempada por obxectivos semellantes, como é meterse nos play-offs de ascenso para achegármonos ao soño da ACB”.

A Deputación sinaliza 630 km de estradas provinciais para mellorar a seguridade viaria dos ciclistas

septiembre 13, 2018 Deportes Comentarios desactivados en A Deputación sinaliza 630 km de estradas provinciais para mellorar a seguridade viaria dos ciclistas

Mais de 630 quilómetros de 57 estradas provinciais contarán a partir das vindeiras semanas cunha nova sinalización específica para advertir aos condutores da presenza frecuente de ciclistas na vía e lembrarlles a obrigatoriedade de deixar 1,5 metros nos adiantamentos.

A sede da institución acolleu a sinatura do contrato deste plan de seguridade ciclista, adxudicado á empresa Díez e Cía. por importe de 101.359,28 euros. … Leer más