Home » Sucesos » Recent Articles:

UN DETIDO POR PRESUNTO HOMICIDIO EN CORUÑA

noviembre 10, 2017 Sucesos No Comments

Ás 05:38 horas deste día 10, ás dotacións policiais de servizo recibiron unha alerta a través da Sala Operativa do 092, para que se trasladasen urxentemente á rúa Antonio Pedreira Rios onde, ao parecer, se producira un apuñalamento. Ao momento saíron para o lugar tres dotacións policiais que se atopaban na contorna.

En concreto, unha das dotacións se atopaba nese intre patrullando pola Avenida da Habana, de forma que os axentes se atopaban moi preto do lugar onde foran requiridos. Cando se aproximaban ao mesmo, á altura da Ronda de Outeiro coa rúa Luís de Camoes, un veciño comunicoulles que, instantes antes, vira pasar correndo a un home que, cría, acababa de cometer un apuñalamento. Así, indicou que o home escapara á carreira cara a rúa Almirante Mourelle. O cidadán indicou tamén que o home á fuga portaba unha peza de roupa fluorescente. Un dos axentes baixou do vehículo e saíu correndo cara a zona sinalada polo cidadán, mentres que o seu compañeiro o seguía no coche. Se ben non atoparon a ninguén en Almirante Mourelle, dirixíronse cara a un subterráneo existente no lugar. Ao descender as escaleiras do devandito lugar, puideron ver, no reflexo dun cristal, a un individuo que se atopaba agachado e escondido tras dun alicerce. Así mesmo, os axentes tamén atoparon no lugar gran cantidade de sangue. Tras identificarse como policías, procederon á neutralización do individuo, que foi cacheado de forma superficial.

Os axentes preguntáronlle que pasara. Mentres o home aseguraba que non fixera “nada”, intentaba taparse a cara cunha peza de roupa. Os membros da Policía Local pediron ao home que se descubrise, de forma que puideron comprobar que tiña un corte no queixo polo que sangraba de forma abundante. O home asegurou que o corte se debía a que caera mentres facía deporte, negando ter mantido ningún contacto con outra persoa. No cacheo superficial ao que foi sometido, detectóuselle un cordón atado á cintura do que penduraba, na parte interior do pantalón, na zona das costas, unha sorte de funda de coitelo construída con follas superpostas de xornal.

Mentres tanto, outra dotación policial de apoio que estaba nas inmediacións, localizou dentro dun contedor baleiro un coitelo con restos de sangue, así como unha chaqueta reflectante, como a que fora identificada pola testemuña cidadá. Estes obxectos foron custodiados até a chegada do persoal especializado da Policía Nacional.

Por outro lado, unha terceira dotación policial, persoada no lugar dos feitos, puido localizar a un home gravemente ferido que se atopaba tirado na estrada, á beira dunha furgoneta. De inmediato solicitaron a presenza dunha ambulancia, sendo os sanitarios da mesma os que certificaron a morte do home, que foi identificado como un veciño da Coruña de 50 anos. Diversas persoas da veciñanza, alarmadas polos gritos que se produciron, saíron ás fiestras e foron as que alertaron, nun primeiro momento, á Policía Local.

Por todo o exposto, procedeuse á detención da persoa atopada nas inmediacións de Almirante Mourelle. Este foi identificado como un veciño da cidade de 54 anos. O mesmo quedou custodiado nos calabozos policiais a disposición xudicial, sendo denunciado de oficio por un delito de homicidio. É a Policía Nacional a que continúa neste momento coa investigación, tratando de esclarecer os feitos e o posible móbil do delito.

DETIDOS CATRO MOZOS COMO COAUTORES OU PARTÍCIPES DUN DELITO DE LESIÓNS CON ARMA BRANCA

marzo 19, 2017 Sucesos No Comments

Ás 08:50 horas desta mañá, axentes do dispositivo de control de acceso na avenida da Mariña son informados por un taxista de que acaba de cruzarse na rúa Nova/San Andrés cun grupo de 4 mozos que ían correndo e, un deles, portaba un coitelo na man. A través do equipo de transmisións, os axentes comunican ás unidades operativas que inician unha batida pola zona, desprazándose así desde a avenida da Mariña cara a onde lles indicaba o taxista. No cruzamento de rúa Nova/San Andrés, son requiridos por outro taxista, quen lles indica que facía uns minutos foi requirido o seu servizo por un cliente e, no momento que este se estaba a introducir no taxi, apareceron catros mozos correndo que comezaron a agredilo e saen á carreira. Cando o taxista baixa para auxiliar ao cliente, este manifesta que lle acaban de apuñalar nun costado, comprobando que sangraba abundantemente. Nese mesmo momento o taxista observa a presenza do vehículo policial, e informa aos axentes dos feitos e do lugar cara onde saíron correndo os mozos. Os axentes policiais fanse cargo do lesionado, solicitando o apoio dunha ambulancia a través da sala do 092 (e quedan con el á espera dos sanitarios), mentres que pasan a descrición dos mozos ás demais unidades policiais de apoio operativas. Posteriormente unha ambulancia do 061 traslada ao mozo, de 20 anos e veciño de Oleiros, ao servizo de urxencias do CHUAC, en principio nunha primeira avaliación médica en estado grave.

A través das cámaras de tráfico, desde a Sala do 092 localizan a un grupo de mozos entrando cara á rúa Duran Loriga desde a rúa Santa Catalina, grupo cuxas características coincidían coas facilitadas. Ata alí se trasladada un vehículo policial que estaba á beira, e a dotación comproba que as características coincidían, así como que un dos mozos sangraba pola man dereita e tiña ensanguentada a cazadora. O grupo foi interceptado inmediatamente e neutralizado no lugar, recoñecendo que acababan de ter unha discusión con outro mozo pero negan a agresión con arma branca. Apoiados por outras dotacións policiais, a dotación inspecciona a contorna, localizando a uns 5 metros de distancia, baixo dun vehículo estacionado, unha navalla tipo bolboreta. Ademais, nun cacheo superficial, a un dos mozos atopóuselle nun peto interior do pantalón unha coitela de afeitar e a outro unha navalla multiusos con restos de sangue no fío.

Os mozos detidos son de 20, 20, 18 e 17 anos, quedando detidos todos eles a disposición xudicial, e sendo denunciados de oficio por un delito de lesións, á espera de que o lesionado, unha vez sexa atendido das lesións, presente a correspondente denuncia.

O Concello pechará o acceso as praias desde hoxe e até o mércores ante a alerta laranxa decretada no litoral

febrero 27, 2017 Sucesos No Comments

O Concello da Coruña estableceu, a partir das 14.00 horas desta tarde e até o mércores, un dispositivo especial de vixilancia, conformado polos servizos de emerxencia municipais, nas praias da Enseada do Orzán ante a previsión meteorolóxica, que alerta durante as próximas horas de fenómenos costeiros con fortes ondas. Desde modo, desde hoxe, e até o día 1 de marzo, permanecerán pechados os accesos aos areais urbanos de Matadero, Orzán, Riazor e San Roque, así como na zona das Esclavas.

Os episodios máis adversos desta alerta laranxa terán lugar na preamar, ás 17.00 horas de hoxe e ás 05.00 am de mañá, martes 28. A área de Seguridade do Concello ten preparados dispositivos especiais que implican á totalidade dos servizos de prevención municipais –Policía, Bombeiros e Protección Civil– para estas franxas, pero non prevé que se teñan que realizar cortes de tráfico no Paseo Marítimo debido ao temporal durante a xornada.

Debido aos fortes ventos, non se poderá acceder á Torre de Hércules e ao Centro de Interpretación e atención ao Visitante (CIAV) durante o día de hoxe e mañá. O Goberno local pide á veciñanza que extreme a precaución ante as condicións meteorolóxicas adversas, e recomenda evitar achegarse a zonas onde puideran producirse golpes de mar. Os servizos municipais de emerxencias lembran tamén do alto risco que pode entrañar achegarse a zonas costeiras, peiraos ou espigóns para tomar fotografías ou vídeos.

O dispositivo especial de seguridade posto en marcha polo Concello atendeu dende a noite de onte máis de medio cento de incidencias por causa do temporal

febrero 3, 2017 Sucesos No Comments

Os servizos de seguridade municipais atenderon dende o día onte e até as seis desta tarde máis de medio cento de incidencias causadas polo temporal que azouta o litoral coruñés. Así, dende o dispositivo especial de seguridade posto en marcha polo Concello recordan á poboación a importancia de extremar a precaución, non achegarse a zonas próximas á costa, ante os posibles golpes de mar, nin a espazos onde poida producirse desprendementos por mor da potencia do vento. De feito, até ás 03.00 horas da próxima madrugada manterase a alerta laranxa por ventos, con refachos que poderán superar os 100 quilómetros por hora. Igualmente, até as 12.00 horas do sábado tamén se manterá a alerta do mesmo nivel no mar, onde poden darse ondas de entre seis e oito metros.

A maioría das incidencias atendidas polo dispositivo especial posto en marcha polo Concello por mor deste temporal, e composto por máis dun cento de profesionais, derivan de desperfectos causados pola forza do vento. Así, entre a pasada noite e estar tarde atendéronse desprendementos en 11 valados publicitarios (dez só durante a noite), ademais de 6 árbores que caeron. Entre as 7 actuacións da pasada noite e as dúas rexistradas esta xornada, atendéronse tamén 9 desprendementos de cubertas en toda a cidade, houbo unha intervención debido a caída de cascotes dunha fachada, así como dúas actuacións en cornisas, ademais de dúas intervencións nas calzadas, para facilitar o tránsito. Os corpos de seguridade tamén tiveron que intervir no túnel de Juana de Vega debido a que, de mañá, un camión quedou atascado no seu interior.

O dispositivo especial de seguridade continuará activo durante a xornada de mañá. Ao igual que este venres os parques, xardíns e zonas infantís da cidade permanecerán pechadas ao público, como é o caso de Santa Margarita, praza do Libro, praza Torrente Ballester, paseo das Pontes, San Pedro de Mezonzo, xardíns de Sagrada Familia e do depósito de auga de Emalcsa (no Ventorrillo), Barrio das Flores, Ponte da Pedra, Casares Quiroga, xardíns de Méndez Núñez, Campo da Leña, Campo de Marte, Xardíns do Cemiterio Inglés (Orillamar), a zona verde e o parque infantil das Xubias, a praza de Concepción Arenal, praza de Azcárraga e xardíns de San Carlos. Tamén permanecerán pechadas ao público as instalacións da Torre de Hércules e o seu centro de interpretación, a Casa das Ciencias e as instalacións exteriores da Casa dos Peixes, así como os accesos ás distintas praias da cidade que quedarán restrinxidos ao público para evitar situacións de perigo. Así mesmo, as instalacións deportivas ao aire libre, como as da cidade deportiva da Torre, quedarán pechadas ao público.

A forza do vento levou ao Concello, tras unha valoración compartida dos servizos municipais co Real Club Deportivo, a Liga Profesional de Fútbol e o resto de axentes implicados, de suspender a actividade fixada para esta tarde nas instalacións de Riazor, como son o estadio e o pavillón –onde ían ter lugar o partido do Deportivo co Betis, e o do Básquet Coruña co Barcelona B–, ademais do resto de espazos, á vista da previsións meteorolóxicas para esta tarde e que recomendaban evitar as grandes aglomeracións de persoas.

O Concello da Coruña condena o asasinato machista perpetrado no Carballiño

enero 31, 2017 Sucesos No Comments

O Concello da Coruña quere amosar a súa máis enérxica condena ante o asasinato machista perpetrado na localidade ourensá do Carballiño, así como traslada as súas condolencias a familiares e amizades da vítima. Do mesmo xeito, en cumprimento do protocolo aprobado por unanimidade dos grupos municipais no Pleno en setembro de 2015, convoca á Corporación Municipal e aos e ás traballadoras a concentrarse este martes, 31 de xaneiro, ás 12.00 horas, ás portas do Pazo de María Pita ou do centro de traballo municipal correspondente para gardar un minuto de silencio.

A concelleira de Igualdade e Diversidade, Rocío Fraga, insiste na importancia de que este ano se revise a lexislación vixente en relación coas violencias machistas. “A violencia non entende de datas nin de estatísticas, pero os datos fríos dinnos que no conxunto do Estado español se perpetraron sete asasinatos por violencias machistas dende inicio de ano”, recordou. “Debemos seguir reclamando que este tema sexa tratado como un asunto de Estado, e que as administracións con competencias na materia se comprometan de verdade coa prevención e protección das mulleres”, dixo a responsable municipal. “Todas as administracións teñen que asumir a necesidade de abordar dun xeito integral e con compromiso político e económico a prevención dos feminicidios”, insistiu. Fraga destacou tamén a “cada vez maior implicación da veciñanza nesta loita”. “Hai que destacar a importancia do compromiso cidadán, con ferramentas tales como o Pacto Social por unha cidade Libre de Violencias Machistas, no que está a traballar o Concello coa veciñanza”, engadiu.

Por outro lado, a concelleira convidou á cidadanía a participar non só do minuto de silencio convocado para este martes polo Concello, senón das concentracións que terán lugar ás 20.00 horas a mesma xornada, e que no seu caso, están organizadas polos movementos feministas.

ENCUESTA SEMANAL

¿Te gusta la nueva web?

Cargando ... Cargando ...