Home » Trafico » Recent Articles:

O Concello activa o domingo 16 un dispositivo especial de tráfico pola celebración da III Carreira pola Integración Enki

octubre 14, 2016 Trafico No Comments

A Concellería de Mobilidade Sostible, área que dirixe Daniel Díaz Grandío, informa que o próximo domingo, 16 de outubro, establecerase un dispositivo especial de tráfico no Paseo Marítimo co gallo da celebración da III Carreira pola Intergración Enki, unha iniciativa deportiva de carácter non competivo coa que o Concello colabora co obxectivo de visualizar as distintas diversidades funcionales e avanzar na inclusión e participación de todas as persoas. A proposta, que inclúe actividades deportivas, lúdicas e educativas dirixidas a todo tipo de públicos, desenvolverase na contorna da cidade deportiva de Riazor, provocando unha afección ao tráfico ao longo de toda a mañá.

Así, desde as 08.00 ata as 14.30 horas, producirase un corte total do Paseo Marítimo no tramo situado fronte ao Pazo dos Deportes de Riazor e o Playa Club –avenida de Buenos Aires, desde a praza de Portugal, ata a glorieta das Esclavas–, polo que se desviará o tráfico cara a avenida da Habana e Manuel Murguía, manténdose operativa a glorieta para a circulación. Ademais, desde as 08.30 horas, e tamén ata as 14.30 horas da tarde, cortarase o carril dereito do Paseo máis próximo ao mar –no sentido Torre de Hércules cara o Millennium–, desde a rúa Pondal ata a avenida da Habana, para habilitalo como beirarrúa supletoria e permitir así o paseo peonil, sen ter que desviar o tráfico en ningún momento ao manter libres os carrís que se atopan no mesmo sentido de circulación.

Ademais da proba, na explanada de Riazor terá lugar a Feira da Solidariedade, que servirá para dar a coñecer o labor de máis de vinte entidades sociais e colectivos da que agrupan a persoas con diversidade funcional. Co gallo desta celebración, non estará permitido o estacionamento desde as 08.00 horas do día 15 na praza do pavillón.

O Concello e a Xunta constituirán unha mesa técnica de traballo para consensuar a penetración e itinerarios do transporte metropolitano na Coruña “salvagardando os intereses da cidadanía”

septiembre 23, 2016 Trafico No Comments

O concelleiro de Mobilidade Sostible, Daniel Díaz Grandío, saudou o “novo marco de colaboración” que se abre coa Xunta para a coordinación e planificación da penetración do transporte metropolitano, así como os itinerarios dos buses, tras a xuntanza mantida esta mañá polo responsable municipal co subdirector xeral de Mobilidade e outros membros da Consellería de Infraestruturas. “Ábrese unha nova etapa na que o Concello e a Xunta traballarán de forma coordinada, de modo que a Xunta recúa na súa intención inicial de implantar o seu plan de transporte interurbano tal e como o tiña formulado, onde non contaba co Concello”, salientou ao remate do encontro Díaz Grandío, quen avanzou que o primeiro paso nesta nova liña de traballo será a constitución dunha mesa técnica, integrada por persoal municipal e da Administración autonómica, que analizará as posibilidades de implantación e unha nova estrutura de penetración do transporte interurbano na Coruña. A primeira xuntanza será, segundo adianta o concelleiro, a próxima semana.

“O Concello acudiu á reunión remarcando as eivas das que adoecía o Plan de Xunta, como o feito de non contemplar a estación Intermodal como nodo e punto clave da mobilidade urbana e interurbana para os próximos anos en toda a comarca coruñesa”, indica Díaz Grandío, quen sinala que a prioridade do Concello é “salvagardar os intereses da cidadanía e asegurar que a calidade do servizo de transporte público urbano non se ve ameazada”. “As nosas alegacións eran contudentes porque entendíamos que existen erros graves no plan inicial da Xunta que poderían ter consecuencias negativas para os e as usuarias do transporte, non só da cidade senón de toda a área metropolitana”, subliña o concelleiro, quen destaca que o fin último “debe ser buscar a coordinación entre as dúas redes de transporte, para que presten un bo servizo á cidadanía”. Nese sentido, valorou o “clima de diálogo” e o novo “marco de traballo” aberto hoxe.

Nesa mesma liña, o alcalde da Coruña reafirmou este mércores o obxectivo común de “mellorar as vidas dos nosos veciños e veciñas, da Coruña e de toda a área metropolitana, e facer do transporte metropolitano un servizo o máis seductor posible para a xente, para que use transporte público e non o coche privado”. A este respecto, o rexedor urxía esta mañá á Xunta a “intentar consensuar o proxecto cos concellos, particularmente co da Coruña, por ser o máis afectado”. “Temos que ver os problemas que pode acarrear este plan e falar deles, porque se na cidade hai zonas sensibles de tráfico, ampliar o número de buses neses puntos pode ter inconvenientes –exemplificou–. Antes de que a Xunta presentase o seu Plan terían sido bo manter reunións como a de hoxe para intentar consensuar as actuacións. Trátase de facer agora no que non se fixo no seu tempo”.

O Goberno local amplía o horario das liñas de autobús urbano durante a celebración da Feira das Marabillas, que comeza mañá

julio 19, 2016 Trafico No Comments

A Concellería de Mobilidade Sostible lembra que, co gallo da celebración da Feira das Marabillas, que se celebrará desde mañá día 20 ata o luns 25 de xullo na Cidade Vella, e á fin de dar cobertura á veciñanza dos distintos barrios da Coruña que queiran achegarse á festa, o Goberno local ampliará por vez primeira e ata despois de media noite o servizo de transporte público urbano. Á xa anunciada prolongación do horario de liñas que circulan por Porta Real, súmanse novas con parada na praza de España. Deste xeito, doce liñas de autobús circularán polas rúas da Coruña ata as 00.30 horas conectando o centro co resto do municipio, nunha aposta por unha mobilidade máis sustentable durante as festividades locais.

As liñas que ampliarán o seu servizo serán as máis próximas ao espazo onde se celebrará a 22a edición desta tradicional feira. Así, as liñas 1, 1A, 2, 2A, 3, 3A, 23 e 23A, que circulan por Porta Real, e agora tamén as liñas 6, 6A, 7 e 11, que transitan pola praza de España, estarán dispoñibles para a veciñanza ata as 00.30 horas da noite, ofrecendo así a posibilidade empregar o transporte público para os desprazamentos durante a Feira.

A Concellería lembra tamén que desde hoxe, día 19, e ata as 15.00 horas do día 25, estará prohibido o estacionamento en toda a Cidade Vella. Non obstante, como noutras edicións, habilitaranse unha serie de zonas especialmente reservadas para os e as residentes. Os veciños e veciñas que dispoñan de acreditación de garaxe poderán acceder a eles todos os días a partir do peche do mercado, ás 00.00 e ata as 11.00 horas do día seguinte, e, pola tarde, entre as 14.00 e as 17.00 horas.

A nova glorieta da Mariña entrará en servizo a primeira hora deste xoves, no que tamén se habilitará o cambio de sentido da rúa Manuel Casas para facer máis fluída a saída da zona

junio 23, 2016 Trafico No Comments

A Concellería de Mobilidade Sostible prevé que a primeira hora de hoxe, xoves 23, entre en funcionamento a glorieta que o Concello habilitou na zona da Mariña comprendida entre o Teatro Colón e o edificio de Correos. Esta medida irá unida ao cambio de sentido na rúa Alcalde Manuel Casas cara a Avenida do Porto. Estas actuacións favorecerán a diferenciación da zona urbana da Mariña­Parrote, na que agora está restrinxido o tráfico en superficie, e farán máis flúida a saída de vehículos da zona.

O departamento de Mobilidade indica que só estará permitido o paso no tramo fronte ao edificio de Correos, onde se habilita a glorieta, aos vehículos autorizados para circular na superficie da Mariña (transporte público, buses turísticos, residentes con vado autorizados e vehículos de carga e descarga entre as 06.00 e as 11.00 horas), así como, neste caso, para os vehículos que teñan que acceder aos aparcamentos dos Cantóns, da Autoridade Portuaria, do Real Club Náutico e do Palexco, e aqueles turismos que vaian estacionar nas zonas reservadas do edificio de Correos ou que vaian levar a cabo algunha actividade no entorno da zona do Palexco. Tamén se permitirá o paso ás motocicletas con destino á zona especialmente acotada para elas.

Ademais, a posta en marcha da glorieta complementarase, tamén a partir de mañá, coa habilitación dunha rotonda entre o edificio de Correos e a Autoridade Portuaria que será de carácter rebasable (estará pintada no chan) e terá como obxectivo dotar de sentido á entrada ao aparcadoiro soterrado que existe nese punto. Por outra banda, a rúa Ambrosio Feijóo, situada tamén entre Correos e a Autoridade Portuaria, manterá o seu sentido de circulación actual.

O dispositivo especial de San Xoán desviará o tráfico desde as sete da tarde polas rúas aledañas ao Paseo Marítimo e afectará ao percorrido de sete liñas de bus

junio 22, 2016 Trafico No Comments

O Concello vén de establecer para a xornada do día 23 un dispositivo de tráfico, co obxectivo de facilitar o tránsito de vehículos pola contorna das praias unha vez que se corte o Paseo Marítimo, entre a rúa do Sol e a praza de Portugal, para as celebracións do San Xoán, ás 19.00 horas. A partir desa hora, os vehículos procedentes da zona da Torre que vaian saír da cidade serán desviados a través da rúa Hospital, para chegar á praza de España e coller alí o túnel da Mariña. No sentido contrario, os vehículos que queiran dirixirse á zona de Monte Alto poderán acceder desde a Terceira Ronda ata a praza de Portugal, e alí circularán cara a Calvo Sotelo e Alfredo Vicenti para chegar á praza de Pontevedra, onde poderán coller a rúa San Andrés. Os cortes poderían ampliarse, en función de afluencia de xente á zona da enseada, ata a fonte dos Surfistas e a avenida de Manuel Murguía. Nese caso, os vehículos que circulen desde Monte Alto poderán desviarse na rúa Curros Enriquez ata a praza de España para acceder ao túnel da Mariña, mentres que os que pretendan dirixirse cara ao centro, desviaranse por Paseo de Ronda e a avenida da Habana.

As restricións de tráfico do Paseo Marítimo afectarán tamén aos itinerarios de sete liñas de bus, como son a 3, 3A, 4, 6, 6A 7 e 11. Os autobuses que fagan o traxecto en sentido Riazor­Matadorio recuperarán o itinerario polas rúas Habana, Alfredo Vicenti, praza de Pontevedra e San Andrés, mentres que aqueles que transitan en sentido inverso (Matadoiro­Riazor) farano pola avenida de Hércules, rúa da Torre, praza de España, Panaderas, rúa Orzán, San Andrés e praza de Pontevedra. … Leer más

ENCUESTA SEMANAL

¿Te gusta la nueva web?

Cargando ... Cargando ...