Home » Uncategorised » Recent Articles:

A Concellería de Rexeneración Urbana tramitou entre o 26 de xullo e o 8 de agosto un total de 87 expedientes de obras e 57 de inicio de actividade

agosto 12, 2017 Uncategorised No Comments

O concelleiro de Rexeneración Urbana e Dereito á Vivenda, Xiao Varela, trasladou este venres á Xunta de Goberno local ordinaria o informe relativo ás licenzas e outros títulos habilitantes tramitados desde a súa área entre o 26 de xullo e o pasado martes, 8 de agosto, un período no que este departamento resolveu un total de 144 expedientes. Deles, 9 corresponden a licenzas urbanísticas e outros 78, a comunicacións previas ao inicio de obras tramitadas. Os 57 expedientes restantes son comunicacións previas ao inicio de actividades ou apertura de establecementos. Como recorda o concelleiro, esta información é trasladada á Xunta de Goberno de forma periódica atendendo ao compromiso adquirido polo equipo de Goberno tras a entrada en vigor, o pasado mes de abril, da delegación no titular de Rexeneración Urbana da resolución das solicitudes de licenza cuxo orzamento de execución material sexa inferior a 1,2 millóns de euros, “e dentro da aposta pola transparencia na xestión”.

Como fai notar Varela, os grupos da oposición no Concello contan, logo da remisión do informe á Xunta de Goberno, co informe dos títulos habilitantes tramitados neste período de tempo, así como a información detallada da resolución de cada un dos expedientes.

O Concello pon en marcha un novo sistema para facilitar o acceso a Torre de Hércules, ante a afluencia de visitantes deste verán

agosto 10, 2017 Uncategorised No Comments

O persoal municipal que traballa na Torre de Hércules ten en marcha, dende o principio desta semana, un novo sistema de cara a facilitar o acceso ao monumento, patrimonio da humanidade. O obxectivo é minimizar as colas que se producen todos os veráns debido ao gran atractivo que o faro ten para os e as visitantes. En concreto, e segundo os datos recollidos, no que vai de verán a Torre recibe, de media, unhas 800 visitas diarias, se ben só pode ser visitada á vez por grupos dunhas 30 persoas.

Dende esta semana, as persoas que se achegan ao monumento reciben unha tarxeta que especifica o tramo horario no que o ou a interesada debe acudir para poder acceder á Torre. Con este sinxelo mecanismo, os e as visitantes evitan as colas de máis dunha hora que se estaban a formar en torno ao histórico faro. Os e as traballadoras do recinto recordan que, mentres tanto, as persoas que así o desexen poden visitar tanto o rico entorno natural da Torre, como o Centro de Interpretación ou o Parque das Esculturas. Os tempos de espera, desta forma, estánse a reducir en máis de 45 minutos.

Recepción rapazas saharauís que participan no programa ‘Vacacións en Paz’

agosto 9, 2017 Uncategorised No Comments

O alcalde, Xulio Ferreiro, recibiu no Pazo de María Pita aos e ás rapazas saharauís que participan no programa ‘Vacacións en Paz’, así como as súas familias de acollida, nun acto no que tamén estivo presente a concelleira de Participación, Claudia Delso, representantes da Asociación Solidariedade Galega co Pobo Saharauí e o delegado en Galicia da Fronte Polisaria, Saad El Mami. Na recepción, o rexedor manifestou a condición da Coruña como Cidade Acolledora e recordou a importancia de que as administracións con competencias cumpran os seus compromisos en materia de refuxio e asilamento. “Temos que alzar a voz, tamén dende os concellos, para facer un chamado á comunidade internacional e recordarlles os dereitos do pobo saharauí, así como o necesario compromiso para que estes sexan respectados”, dixo.

O concelleiro de Emprego e Economía Social salienta os datos positivos de Alvedro, “que confirman o desenvolvemento sostido do aeroporto durante todo o ano”

julio 14, 2017 Uncategorised No Comments

O concelleiro de Emprego e Economía Social, Alberto Lema, valorou este xoves os “bos datos” rexistrados polo aeroporto de Alvedro no primeiro semestre deste 2017, no que a terminal aumenta nun 9,2% o número de pasaxeiros ata alcanzar 545.122 viaxeiros e viaxeiras, 104.905 no mes de xuño (un 6,1% de crecemento), segundo as cifras de AENA; un balance que, como indica o responsable municipal, confirma que a terminal coruñesa “segue mantendo un desenvolvemento sostido durante estes meses, e avanza un crecemento moi positivo, que se verá ao remate do ano”.

“O Concello fixo unha aposta por incrementar as conexións con Barcelona e tomou unhas decisións que hoxe se están a demostrar correctas, á vista da ratio entre os investimentos que realiza e os resultados que está a experimentar o aeroporto”, salientou Lema, quen lembra que Alvedro leva 14 meses seguidos medrando, unha progresión “máis que relevante e que sitúa o aeroporto coruñés en cifras de pasaxe ao nivel do período previo á crise”. A este respecto, o responsable municipal mantén a aposta por completar a oferta de Alvedro cun hub que asegure a conectividade internacional.

A Concellería de Medio Ambiente iniciou onte o reforzo de limpeza con auga nos barrios con actuacións en sete espazos da cidade

julio 12, 2017 Uncategorised No Comments

A Concellería de Medio Ambiente puxo en marcha o plan de reforzo de limpeza con auga nos barrios da cidade, unha medida que se prolongará durante xullo e agosto e que comezou en sete prazas da cidade e a súa contorna, como son a praza de San Andrés, os Xardíns de Méndez Núñez, a praza da Tolerancia, a de Indalecio Prieto, a do mercado de Monte Alto e avenida de Hércules, a praza de Pontevedra e a rúa Pablo Picasso e a zona de aparcadoiros. A medida, que vai na liña do programa integral de mellora do espazo público A Pé de Barrio, vai dirixida a intensificar as actuacións de limpeza no verán, unha época que, como recorda a concelleira desta área, María García, precisa dun esforzo maior por ser cando máis visitantes recibe a cidade e maior produción de residuos se xera, polo maior emprego do espazo público, e busca redobrar o mantemento desas prazas e puntos dos barrios que congregan a maior número de veciños e veciñas, así como preparar os barrios para as súas festas. Estas tarefas súmanse a outras actuacións de reforzo de limpeza iniciadas este mes, como son a brigada encargada da retirada das herbas espontáneas e o reforzo de recollida de residuos na zona centro, ademais do plan de roza en fincas e viais de titularidade municipal.

O reforzo con auga, que se bota a andar por segundo verán consecutivo, supón a posta en servizo de dous camións cisterna e catro profesionais, que traballarán os sete días da semana en horario nocturno para realizar, de forma semanal e cíclica, esta limpeza en preto de medio cento de prazas de toda a cidade e as rúas do redor, así como noutros puntos nos que se detecte a necesidade de actuar, co obxectivo de que os servizos municipais cheguen de forma equitativa a todas as áreas da cidade. En concreto, as prazas son: San Andrés, Campo de Marte, Indalecio Prieto, praza do Parque, Campo da Leña, praza de Santa María, mercado de Monte Alto con avenida de Hércules, praza de Azcárraga, praza da Constitución, praza da Cidade Vella, xardíns de Méndez Núñez, praza de Pontevedra, praza de Galicia, praza de Recife, praza de Vigo, Mestre Mateo, Parque de Santa Margarita, praza de Monforte, a rúa Ángel Senra, a rúa Barcelona, a praza das Conchiñas, a praza e a rúa Gaiteira, a rúa Claudio San Martín, o parque San Diego, a praza da Cubela, a praza do Tebeo, a de Benito Blanco Rajoy, a praza de Catro Camiños, a de Padre Rubinos, a praza da Sagrada Familia, o parque de Vioño, a praza de Alfonso XII, a praza Elíptica e a da Tolerancia, a praza Torrente Ballester a de Salvador de Madariaga, a de Pucho Boedo, a praza de San Cristóbal, a praza da Concordia, as rúas Pablo Picasso e Salvador de Madariaga e os aparcadoiros, a praza Esteban Lareo, a de Pablo Iglesias e a rúa Alejandro Barreiro Noy.

Na noite deste martes, os servizos de limpeza actuarán na praza do Parque, Mestre Mateo, Santa Margarita, praza de Monforte e retomarán a limpeza da rúa Pablo Picasso e os aparcadoiros, para continuar co resto de emprazamentos ao longo das noites da semana, e reiniciar a limpeza o vindeiro luns.

ENCUESTA SEMANAL

¿Te gusta la nueva web?

Cargando ... Cargando ...