Home » Noticias » Recent Articles:

O Concello acomete a mellora dos servizos e das condicións de seguridade do parque infantil de Matogrande

octubre 4, 2018 Noticias Comentarios desactivados en O Concello acomete a mellora dos servizos e das condicións de seguridade do parque infantil de Matogrande

A Concellería de Rexeneración Urbana iniciou esta semana as obras para o acondicionamento do parque infantil de Matogrande, un proxecto escollido pola cidadanía mediante os Orzamentos Participativos e que consiste no remate e a mellora do cerrado da área de xogos e a dotación de novos puntos de auga e papeleiras. “O parque está nunha zona con moito tráfico, polo que o valo cumpre unha función de seguridade que agora se ve incrementada. O cerrado de madeira será completo, chegará ao chan para evitar que saian elementos de xogo fóra do recinto e contará tamén cunha nova entrada”, explica o responsable da concellería, Xiao Varela.

Esta reforma do parque infantil, que reuniu os apoios necesarios para ser seleccionada nos Orzamentos Participativos do pasado ano, incluirá tamén a dotación dun punto de auga, cunha fonte adaptada, e dúas novas papeleiras. Ademais, levaranse a cabo outras melloras para lograr un mellor acondicionamento da área de xogos, como son a instalación de céspede debaixo dos cinco bancos existentes e a plantación de arbustos, resistentes e de folla perenne, como reforzo na protección do perímetro e tamén como illamento natural da zona ante a súa contorna. Tal e como destaca o edil, a obra servirá así mesmo para levar a cabo a certificación do parque segundo a normativa. A actuación ten un orzamento de 14.143,63 euros.

A Deputación da Coruña convida aos centros educativos a participar no programa de turismo escolar

septiembre 10, 2018 Noticias Comentarios desactivados en A Deputación da Coruña convida aos centros educativos a participar no programa de turismo escolar

Nun novo inicio de curso, a área de Turismod a Deputación da Coruña convida aos centros educativos e aos propios concellos a participar nas actividades do programa de Turismo Escolar, encamiñado a que nenas e nenos coñezan o patrimonio natural, histórico e artístico da Coruña.

A Área de Turismo da Deputación convida a participar no programa dirixido a escolares de entre 4 e 16 anos, nas visitas para coñecer o patrimonio cultural e natural cunha oferta de cinco rutas que van da pegada romana no Mandeo ás testemuñas de pedra no Castelo de Vimianzo, pasando polo achegamento á tradición da olería en Buño. A esta oferta deseñada pola deputación incorporáronse recentemente os recursos ofertados polos concellos. … Leer más

O Goberno local asina un convenio coa Fundación Educo para fomentar e promocionar a participación infantil na cidade

agosto 31, 2018 Noticias Comentarios desactivados en O Goberno local asina un convenio coa Fundación Educo para fomentar e promocionar a participación infantil na cidade

A concelleira de Participación e Innovación Democrática, Claudia Delso, asinou esta mañá un convenio coa Fundación Educación e Cooperación Educo para “colaborar no fomento e a promoción da participación dos nenos e das nenas da cidade”. Unha acción que se concretará no traballo con alumnos e alumnas de quinto e sexto curso de Primaria de centro escolares da Coruña. “Un dos obxectivos deste Goberno local é garantir e arraigar na nosa sociedade un sistema de participación democrática no que a cidadanía poida ter impacto nas accións do seu Concello e neste sentido temos posto en marcha moitas iniciativas, dende os Orzamentos Participativos ata o proxecto do “O noso Patio” onde a comunidade escolar do San Xurxo de Carricarte deseñou o patio da súa escola, proxecto que por certo foi premiado recentemente en ​Ludantia, ​Bienal Internacional de Educación en arquitectura para la infancia​”, apuntou. Pos iso, a edil destacou que “​ten especial relevancia afondar no traballo coas nenas e os nenos que inician na escola un período de traballo colaborativo diario e no que incorporar dentro da súa aprendizaxe dinámicas de participación democrática”. O convenio recolle unha subvención nominativa de 6.000 euros para a realización da actividade.

A iniciativa, que se celebra este ano por primeira vez e terá lugar neste 2018, implicará o un máximo de 100 alumnas e alumnos dos centros que queiran formar parte así como aos profesores e profesoras, que recibirán formación específica en metodoloxías de participación. Os nenos e as nenas crearán, ao longo de catro sesións nas que recibirán formación e apoio, un evento de participación que presentarán no Concello. Como salienta Delso, este convenio “vén a reforzar o noso compromiso por garantir os dereitos á participación cidadá dos nosos veciños e veciñas, tamén dos e das nosas cativas que tomarán no futuro as decisións da cidade”.

Xustiza Social abre o prazo de matrícula para o curso que vén nas escolas infantís municipais, nas que o ano pasado o 15% do alumnado obtivo a tarifa gratuíta

junio 1, 2018 Noticias Comentarios desactivados en Xustiza Social abre o prazo de matrícula para o curso que vén nas escolas infantís municipais, nas que o ano pasado o 15% do alumnado obtivo a tarifa gratuíta

A Concellería de Xustiza Social e Coidados vén de publicar a lista definitiva de nenos e nenas admitidos e en lista de agarda na Rede de Escolas Infantís Municipais (REIM) para o curso 2018-2019, que se pode consultar no web ​www.edu.coruna.es/ga/reim​. Tras a finalización do prazo de alegacións á lista provisional de adxudicacións, esta mañá abriuse o prazo de matrícula, que se pechará o vindeiro 14 de xuño.

Este será o segundo curso no que a REIM, que dispón de 829 prazas, conte con oito tramos de tarificación, unha medida impulsada polo goberno local e que axustan o importe da tarifa correspondente a cada tramo á capacidade económica familiar que se deriva da súa inclusión nun determinado tramo da renda. Tal e como apunta a titular da área de Xustiza Social, Silvia Cameán, esta modificación “favorece que familias nunha situación de maior vulnerabilidade poidan contar con tarifas que se axustan a súa situación vital”. Así, o curso pasado, 126 alumnas e alumnos foron beneficiarias da tarifa gratuíta, o que supuxo un 15% do alumnado da Rede, que conta con nove centros –A Caracola, Arela, Agra do Orzán, Carricanta, Os Rosais, Luís Seoane, Monte Alto, Os Cativos, Carmen Cervigón–. Ademais deste treito gratuíto, o resto de tarifas das escolas infantís van dende os 5 euros ao mes para nos casos de ingresos per cápita inferiores ao 50% do IPREM ate un máximo de 105 euros para unidades familiares con ganancias superiores nun 200% ao IPREM.

“Este goberno entende a educación pública como unha ferramenta fundamental para acadar unha sociedade máis xusta e igualitaria, por iso traballa para xerar igualdade de oportunidades desde o propio acceso á educación infantil, para non deixar atrás a ningunha nena ou neno desta cidade, independentemente da súa situación económica”, apunta a concelleira.

O goberno local amplía o Servizo Municipal de Canguraxe coa apertura dun novo espazo de atención á infancia en Palavea, “para favorecer a conciliación e a mellora da calidade de vida da veciñanza”

mayo 29, 2018 Noticias Comentarios desactivados en O goberno local amplía o Servizo Municipal de Canguraxe coa apertura dun novo espazo de atención á infancia en Palavea, “para favorecer a conciliación e a mellora da calidade de vida da veciñanza”

O Concello da Coruña conta, desde esta semana, cun novo Espazo de Atención á Infancia (EAI). O novo lugar, localizado no centro cívico de Palavea proporcionará ás e aos menores de entre 4 e 12 anos acollemento e permitirá o desenvolvemento de actividades de carácter lúdico-educativas. A proposta forma parte do Servizo Municipal de Canguraxe, que vén de renovar os contratos tanto dos EAI e as Ludotecas Coeducativas, como da modalidade de Atención á Infancia a domicilio, por un total de ​263.445,63€ euros. O programa, que conta cunha maior dotación orzamentaria, favorece, ademais da creación do novo espazo en Palavea, a ampliación do horario de atención nos centros cívicos. A nova proposta da Concellería de Igualdade e Diversidade, área dirixida por Rocío Fraga, tamén aposta pola renovación de materiais ou o incremento de 400 horas para a atención de necesidades específicas de conciliación que precisen as mulleres vítimas de violencias machistas, ou que se atopen en risco de exclusión social.

Así, co EAI de Palavea, a área de Igualdade afonda na expansión do servizo de canguraxe en novos barrios da cidade, xa que se suma á rede de EAI e ludotecas municipais que se atopan nos centros cívicos de Labañou, Castrillón, Sagrada Familia, Mesoiro e Monte Alto. “Estes espazos, que presentan a actividade lúdica como un recurso educativo, de socialización e creativo no tempo de lecer das nenas e dos nenos, contribúen á conciliación da vida laboral e persoal das nosas veciñas, tanto as empadroadas no Concello como todas aquelas que teñan o seu posto de traballo, sexa por conta propia ou allea, no termo municipal”, apunta Fraga, quen engade que o alumnado que estea cursando estudos nun centro de ensino coruñés “tamén poderá participar das actividades do EAI”. “Estamos a falar dun servizo municipal que avoga por defender unha igualdade efectiva e que mellora a calidade de vida da veciñanza, á vez que ofrece un servizo cun destacado carácter metropolitano, xa que se amplía en Palavea nunha aposta por chegar tamén á cidadanía residente na contorna e que traballa acotío na Coruña”, engade a concelleira.

O novo EAI de Palavea abrirá, en período lectivo segundo indique o calendario escolar, entre as 16.00 e as 20.30 horas, mentres que no período non lectivo –vacacións de Nadal, Entroido, Semana Santa e o verán, ademais dos festivos autonómicos e locais– poderase utilizar entre as 08.00 e as 15.00 horas. As actividades que se ofertarán, ao igual que nos outros espazos municipais, organízanse en distintos bloques, como xogo libre, xogo dirixido –obradoiros e actividades de animación socio-cultural– e apoio ao estudo, que inclúe a realización de tarefas escolares ou a aprendizaxe de técnicas de estudo. “Os EAI achegan un conxunto organizado e integrado de actividades que promoven a educación para a igualdade, ben con carácter específico ou de xeito transversal, evitando a transmisión e reprodución de estereotipos de xénero”, lembra Rocío Fraga.

Cada menor poderá facer uso dos diferentes Espazos de Atención á Infancia ou ludotecas –ou combinación de ambos– até un máximo de 40 horas totais ao mes, coa finalidade de fomentar, na medida do posible, un tempo compartido entre as persoas responsables do ou da menor e as nenas e nenos. “En todo caso, as circunstancias persoais e familiares das distintas unidades familiares serán valoradas polo equipo do Servizo Municipal de Canguraxe”, apunta a concelleira. Durante o período non lectivo, non haberá un número máximo de horas de uso do servizo. ​Para poder acceder ao mesmo –así como a outros programas de canguraxe, como Ludotecas Coeducativas ou Atención á Infancia a domicilio–, as persoas interesadas deberán presentar a súa solicitude por rexistro. O Centro de Información ás Mulleres (CIM) tramitará o acceso ao servizo municipal e verificará que as solicitantes cumpren os requisitos básicos para poder participar no programa.