Coruña Infantil – CLICK AQUI

Para acceder a la mejor web que te puede informar de los eventos y noticias para los mas peques solo tienes que hacer CLICK AQUI

Coruña Atrapa – CLICK AQUI

Para acceder a la mejor web que te puede informar de los mejores locales y sitios que visitar en Coruña haz CLICK AQUI

O Concello levará a 50 estudantes de ciclos medios a facer prácticas laborais en empresas de varios países de Europa durante tres meses

O Concello da Coruña convocará no mes de novembro as primeiras 30 prazas do programa Bolsas Europa FP­Proxecto Acoreuropa IV, que permitirá que 50 titulados de ciclos medios de FP poidan facer prácticas de tres meses de duración en empresas de Reino Unido, Irlanda, Italia, Austria, Portugal e Polonia. A …

OFERTA TODOCONSOLAS: 3X2 EN JUEGOS PS4 (SEGUNDA MANO)

OFERTA TODOCONSOLAS: 3X2 EN JUEGOS PS4 (SEGUNDA MANO)

Recent Articles:

O Concello acomete, dende o vindeiro martes, obras de mellora da rede de saneamento na avenida de Hércules

agosto 25, 2018 coruna Comentarios desactivados en O Concello acomete, dende o vindeiro martes, obras de mellora da rede de saneamento na avenida de Hércules

​A Concellería de Rexeneración Urbana comezará o vindeiro martes 28 unha actuación para substituír dous tramos da rede de saneamento na avenida de Hércules, unha obra imprescindible para o correcto funcionamento do sistema e que suporá unha limitación no tráfico de vehículos, así como modificacións temporais na ruta de seis liñas de autobús. A actuación que se realizará nas canalizacións da rede de saneamento servirán para repoñer 60 metros de tubaxes que presentaban mal estado en dous puntos da rúa, á altura das vías Xerión e Washington e se realizan ao mesmo tempo para causar a menor das afeccións posibles ao tráfico.

A Concellería de Mobilidade Sostible, dirixida por Daniel Díaz Grandío, indica que, durante as seis semanas que duren as obras, só poderán circular pola avenida de Hércules vehículos de menos de 8 metros de longo debido ao espazo que quedará libre na vía durante a realización das actuacións. Isto afectará ao percorrido das liñas 4, 6, 6A, 7, 11 e 17, que modificarán tamén varias das súas paradas habituais.

As obras afectarán a dous puntos da avenida de Hércules, á altura das rúas Washington e Xerión. No primeiro dos casos se habilitará un carril estreito para o paso de vehículos de menos de oito metros de longo, pero no segundo dos puntos de obra será preciso o corte total da rúa, polo que se habilitarán dúas saídas alternativas para a circulación: os vehículos poderán continuar de fronte pola avenida de Hércules a través un desvío provisional de obra na praza de San José ou poderán xirar á dereita na rúa Xerión. Dende o martes haberá avisos das limitacións do tráfico na glorieta da Rolda de Monte Alto, así como para o resto dos cambios previstos para a circulación.

No caso do transporte público, as liñas 4, 7 e 17 circularán desde Santo Tomás pola rúa Pai Rosendo Salvado ata a parada de Hércules-Mercado. Así, non se realizará durante as obras a parada da rúa Alcalde Sanjurjo e avenida de Hércules 115. As liñas 6 e 6A transitarán desde San Amaro por Santo Tomás e Pai Rosendo Salvado ata Hércules-Mercado. Non estarán operativas para esta liña, por tanto, a parada da avenida de Navarra á altura do número 568, as dúas de Rolda de Monte Alto e a da avenida de Hércules, 115. Pola súa banda, a liña 11 desviarase, desde a glorieta da avenida de Hércules, pola Rolda de Monte Alto, avenida de Navarra, Santo Tomás e Pai Rosendo Salvado para retomar o seu itinerario en Hércules-Mercado.

O goberno local solicita ao Estado que non obrigue a cidadanía coruñesa a pagar co seu patrimonio as débedas da Autoridade Portuaria, mentres si condona as de Valencia

agosto 24, 2018 coruna Comentarios desactivados en O goberno local solicita ao Estado que non obrigue a cidadanía coruñesa a pagar co seu patrimonio as débedas da Autoridade Portuaria, mentres si condona as de Valencia

​O goberno local lamentou que o executivo estatal non teña en conta “os lexítimos intereses da cidadanía coruñesa, cando si semella que é consciente dos dereitos da veciñanza noutras partes do Estado”. Así rexeitou que, de momento, o Estado non aportase ningunha alternativa que posibilite que a débeda contraída pola Autoridade Portuaria da Coruña non teña que ser pagada a costa da venda da fachada litoral, patrimonio de toda a cidade, mentres que, por contra, vén de acordar a asunción de débeda do Consorcio de Valencia 2007, de 350 millóns de euros. “Non ten sentido que o executivo central condone en Valencia unha débeda de 350 millóns de euros e aquí non impulse unha medida similar, cando o crédito do porto coruñés, neste caso, é de 200 millóns. A situación do noso porto debería ter consideración de asunto de Estado”, manifestou o concelleiro de Rexeneración Urbana e Dereito á Vivenda, Xiao Varela.

“O Estado asumiu a condonación da débeda co Consorcio de Valencia no marco das negociacións para a aprobación da nova senda de estabilidade orzamentaria. O goberno da Coruña leva denunciando esta situación dende que chegou a María Pita. Neste momento, non só lle pedimos compromiso ao executivo estatal, tamén ao resto de forzas políticas e administracións, como a propia Xunta”, reflexionou Varela. “Con independencia das diferencias que poidan existir entre a situación da Autoridade Portuaria da Coruña e o Consorcio de Valencia, a realidade é que o Instituto de Crédito Oficial (ICO) condonará 350 millóns de euros a esta última, mentres que co porto coruñés non se tivo nin ten previsto equivalente tratamento, seguindo a mesma liña que o anterior goberno central do Partido Popular”, explicou.

Ao fío, Varela recordou que o Pleno da Coruña aprobou por unanimidade unha moción plenaria, xa en xullo do ano pasado, no que a Cámara demandaba ao Estado a conexión ferroviaria con Langosteira. Esta iniciativa tamén evidenciaba a necesidade de “demandar ao Goberno do Estado e Portos do Estado o alixeiramento da carga financeira que soporta a Autoridade Portuaria da Coruña co ente público, derivada dos préstamos de financiamento para a construción do Porto Exterior, así como a inclusión de medidas de flexibilización de pagamento, estudándose a posibilidade dunha quita sobre a débeda”. “Aprobada esa moción, o presidente da APAC, Enrique Losada, manifestou que non poría inconvenientes a que se condonase a débeda total ou parcialmente. Evidentemente, para conseguir isto, é necesario actuar”, comentou o concelleiro Varela. “Neste momento, e vendo que si é posible, como nós defendiamos, solicitamos a súa condonación, tal e como vai a ocorrer en Valencia. Se se condona a débeda xerada en Valencia pola Copa América de Vela, con moita mais razón na Coruña, pola construción dun porto de interese xeral do Estado”, salientou o responsable municipal.

Por outro lado, o titular de Rexeneración Urbana manifestou que “o goberno local segue a súa folla de ruta, de cara a conseguir garantir o uso e xestión pública da fachada atlántica da cidade”. Así, recordou que, este agosto, o goberno local deu luz verde a un concurso de ideas sobre o futuro da fachada atlántica da cidade, dende o Dique de Abrigo até o peirao de Oza. O concurso, baseado nas conclusións obtidas no proceso de investigación previo que concluíu coa celebración do foro ​Tecendo Litoral,​ ten como obxectivo fundamental “promover o debate e a participación de toda a cidadanía sobre o futuro dos peiraos interiores da cidade, así como crear un espazo para a colaboración e o concurso entre as distintas administracións involucradas na súa transformación”.

A Concellería de Mobilidade Sostible incrementa en 88 as prazas de aparcamento en dúas rúas do polígono da Grela

agosto 24, 2018 coruna Comentarios desactivados en A Concellería de Mobilidade Sostible incrementa en 88 as prazas de aparcamento en dúas rúas do polígono da Grela

A Concellería de Mobilidade Sostible modifica o sentido de circulación de dúas rúas no polígono da Grela para crear 88 novas prazas de aparcamento e mellorar a seguridade no tránsito dos vehículos pesados. O departamento que dirixe Daniel Díaz Grandío atende así unha antiga reivindicación da asociación de empresarios da Grela, entidade coa que se consensuou a actuación. Así, as rúas Juan de la Cierva e Copérnico pasan de ter dous sentidos de circulación a ter un sentido único, co que se gaña o espazo preciso para a consolidación de 88 prazas en liña. “Con esta actuación conseguimos ampliar as prazas dispoñibles e regularizar unha situación de aparcamento fóra dos lugares habilitados que se estaba a dar de maneira recorrente, pero tamén mellora a seguridade viaria para as empresas da zona que traballan con transporte pesado e para o que é máis seguro moverse e manobrar en rúas dun único sentido”, explica o titular deste departamento municipal.

Os traballos para a creación das prazas, que se farán a través do pintado horizontal das rúas e a instalación de sinalización vertical, realizaranse esta fin de semana “para evitar o impacto sobre o día a día do polígono” e non suporán afeccións ao tráfico.

O Concello impulsa a reforma do complexo deportivo que dotará á veciñanza do Castrillón dunha piscina pública coa aprobación do anteproxecto de obra, para a que se reservan 2,5 millóns de euros

agosto 23, 2018 coruna Comentarios desactivados en O Concello impulsa a reforma do complexo deportivo que dotará á veciñanza do Castrillón dunha piscina pública coa aprobación do anteproxecto de obra, para a que se reservan 2,5 millóns de euros

O executivo municipal impulsará este venres a reforma do complexo deportivo do Castrillón, polo cal a cidadanía deste barrio da Coruña poderá ter acceso a unha piscina pública. Está previsto que a Xunta de goberno local dea luz verde ao anteproxecto da obra de reforma e adecuación do equipamento para o que, ademais, se reservarán 2,5 millóns de euros, aportacións que o Concello lle fará á Empresa Municipal de Vivenda (EMVSA), ente municipal encargado da construción e explotación deste espazo. Segundo destaca o concelleiro de Culturas, José Manuel Sande, “desta forma, queda completamente asegurado que estas instalacións deportivas serán 100% públicas”.

“Estamos a dar un paso especialmente significativo que posibilitará que sexa este goberno local o que poña a punto un complexo deportivo, dotado de piscina municipal, que leva máis dunha década sendo unha promesa de distintos executivos”, salienta Sande. Foi en 2012, cando a administración local coruñesa resolveu encomendarlle á EMVSA a xestión da construción e explotación deste complexo deportivo de servizos municipais. Posteriormente, en 2014, a xunta de goberno local aprobou un proxecto básico para a construción dun edificio de seis niveis que contemplaba usos de equipamentos deportivos e comerciais, así como aparcamentos. Este proxecto contaba cunha serie de deficiencias, polo que en 2016, e tras conversas coa veciñanza da zona, o actual goberno local sacou á luz un proxecto renovado, que introducía melloras substanciais, tanto arquitectónicas, como de equipamento. EMVSA estimou en 2,5 millóns de euros o gasto preciso para poder terminar de forma axeitada e mellorada a construción dos espazos deportivos no complexo público. Este montante económico servirá para financiar a posta en funcionamento da piscina climatizada, a pista polideportiva e o ximnasio.

“Así, ante a decisión política deste goberno local de xestionar directamente este espazo deportivo, descartando a colaboración privada pola que avogaba o PP, neste momento, é preciso reconsiderar o carácter gratuíto da encomenda de xestión que lle foi adxudicada a EMVSA en 2012”, indica Sande. “Este é o motivo polo que a xunta de goberno local deste venres, ademais de aprobar o anteproxecto de obra, tamén vai proceder a modificar a encomenda de xestión que se lle fixo á Empresa Municipal de Vivenda, incluíndo a obriga do Concello de aportar a este ente municipal a 2.554.257 euros, entre este exercicio e 2019, cantidade destinada a financiar as obras necesarias do proxecto de reforma e adecuación do interior do complexo deportivo”, subliña o responsable municipal.

Axustándose ás previsións municipais, esta partida económica distribuirase reservando 498.500 euros para este exercicio, quedando o resto consignado para tal fin nos orzamentos municipais do vindeiro ano. “Por esta razón, a Xunta de goberno local tamén aprobará esta semana a disposición de gasto necesaria para este exercicio”, di Sande, que explica que as previsións municipais pasan porque xa este ano se licite a parte da obra correspondente ao ximnasio e o polideportivo.

O Concello rexeita a instalación da planta de residuos industriais en Santa Icía polo seu impacto negativo na contorna, na que viven 10.000 persoas a menos dun quilómetro

agosto 23, 2018 coruna Comentarios desactivados en O Concello rexeita a instalación da planta de residuos industriais en Santa Icía polo seu impacto negativo na contorna, na que viven 10.000 persoas a menos dun quilómetro

​O Goberno local remitiu á Xunta de Galicia un informe de avaliación de impacto ambiental que rexeita a localización dunha planta de valorización e tratamento de residuos industriais en Teixoeira-Santa Icía, no concello de Arteixo, unha localización situada a menos dun quilómetro dos núcleos de Novo Mesoiro, Feáns e as urbanizacións Breogán e Obradoiro. As alegacións da Concellería de Medio Ambiente sosteñen que a actividade desta planta xunto a unha zona densamente poboada suporía que “o impacto da actividade afecte directamente” aos 10.000 habitantes dos núcleos máis próximos. O informe resalta tamén a transformación que ocasionaría a instalación da planta na zona, declarada como solo rústico de especial protección forestal, e a súa contorna, así como as afeccións negativas que causaría a nivel de ruído e calidade do aire. A iniciativa empresarial xa acadou, no pasado mes de setembro, a oposición do Pleno municipal, que aprobou por maioría solicitar a paralización do proxecto.

O Concello considera que, pese as modificacións introducidas pola empresa no proxecto, a situación da instalación nunha área sen conexións ao saneamento ou de accesos rodados axeitados suporá “unha marcada transformación” da zona de Santa Icía e condicionará tamén o seu futuro desenvolvemento. Así, o Goberno local alega que o proxecto non prevé ningún plan de seguimento para comprobar que se cumpran os obxectivos de calidade acústica nin tampouco ten en conta os niveis de inmisión da actividade, “que teñen que cumprirse a partir do perímetro da instalación” co obxectivo de non limitar os usos dos terreos. O Concello considera que, á vista do proxecto remitido, “non se garante o cumprimento” destes niveis “o que pode condicionar os usos futuros dos espazos lindeiros dentro do termo municipal de A Coruña” nunha zona tranquila, cos índices de poboación afectada polo ruído máis baixos de todo o concello. “A presenza dunha actividade desa natureza nesta contorna tranquila ten moitas posibilidades de xerar un conflito acústico incompatible coas previsións municipais para este sector”, afirma o informe. O Concello sostén que nesta área teñen cabida outras posibilidades de uso máis sostibles e respectuosas co medio natural, como exemplifica o anuncio do desenvolvemento nunha zona próxima do Bosque de Breogán, que prevé a recuperación ambiental dunha zona degradada.

A Concellería de Medio Ambiente sinala tamén que se debería esixir á empresa “o máximo confinamento” dos traballos e a “aplicación das medidas necesarias para a extracción e filtrado das emisións á contorna” que garantan a calidade do aire. Neste sentido, o informe resalta que os acopios de material estarán á intemperie no exterior, quedando expostos á acción do vento nunha zona elevada, así como a posible contaminación ambiental de metais ou outros residuos impropios que non estean ben separados en orixe. “É presumible que as medidas destinadas a evitar a dispersión de po e partículas sexan insuficientes”, sinala. Ademais, o Concello alega que non existe ningunha esixencia para o control da posible contaminación do chan e dos acuíferos.

O informe de Medio Ambiente estima tamén que a actividade da planta terá uns efectos colaterais no tránsito de vehículos pesados na zona que supón afectacións relacionadas coa emisión de ruído, liberación de po, contaminación ambiental e un incremento da inseguridade na vía, así como un impacto negativo para a flora e a fauna. Vista as afeccións expostas no informe, o departamento de Medio Ambiente afirma que a empresa non realiza unha análise axeitada as alternativas para a situación do proxecto que, como indica o Plan de Xestión de Residuos Industriais de Galicia da Administración autonómica, teñen como localización recomendada os polígonos industriais.