O alcalde da Coruña, Xulio Ferreiro, presidiu e o acto de entrega de galardóns da XXXI edición dos premios Prismas Casa das Ciencias á Divulgación Científica, unha iniciativa dos Museos Científicos Coruñeses que pretende potenciar a difusión da cultura científica, así como apoiar a todos os e as profesionais que traballan neste eido. Nesta edición, os Prismas de bronce foron a parar a distintos proxectos como un vídeo que falar sobre os ritmos cardíacos e as súas implicacións na vida cotiá, un blog sobre matemáticas, un libro que explica o funcionamento das vacinas e a súa seguridade, un artigo sobre o emerxente e non regulado mercado de venda de fósiles, así como una peza radiofónica que recrea o debate de dous astrónomos con teorías opostas sobre a orixe do universo. O Prisma especial do xurado foi recaer na matemática e divulgadora Clara Grima “polo seu compromiso e versatilidade á hora de transmitir coñecemento”.

No acto, no que tamén participaron o concelleiro de Culturas, José Manuel Sande, así como o director dos Museos Científicos, Marcos Pérez Maldonado, o reitor da Universidade da Coruña, Julio Abalde, e compoñentes do xurado, o rexedor quixo destacar o labor das persoas que se dedican á divulgación científica, con especial atención ao papel das mulleres dedicadas á investigación e a difusión de coñecemento, para o que puxo como exemplo os e as traballadoras dos propios museos da cidade: Casa das Ciencias, Domus e Aquarium Finisterrae.“Con esta entrega de Premios Prismas, o Concello da Coruña e o seu goberno local queren referendar o seu compromiso coa divulgación científica e a democratización do coñecemento a través dos grandes museos da nosa cidade. Seguiremos ampliando a súa oferta xa que, de feito, en poucas semanas acolleremos tres novas exposicións, así como continuaremos ampliando e mellorando os seus equipamentos, como fixemos este mandato coa creación da sala Maker na Domus ou como faremos nas obras de mellora previstas na Casa dos Peixes ou nas propias escalinatas da Domus”, salientou o primeiro edil.

O Concello da Coruña vén de publicar a proposta de resolución definitiva da convocatoria de subvencións en réxime de concorrencia competitiva para o fomento da práctica deportiva no termo municipal durante o presente exercicio. En total, a área de Culturas, Deporte e Coñecemento outorgará axudas a 42 entidades sen ánimo de lucro da cidade para a realización de 77 actividades relacionadas coa promoción do deporte en sectores sociais especiais así como do fomento de deportes tradicionais e autóctonos, ademais da organización de actividades deportivas de carácter extraordinario.

En total, o Concello destinará 119.972 euros aos proxectos seleccionados, nunha edición na que se recuperou o tope máximo de subvención por entidade de 4.000 euros. A convocatoria estivo aberta a todas aquelas entidades deportivas sen ánimo de lucro con sede na cidade e que non conten cun convenio nominativo de asignación directa –agás no caso de participar en fases finais de campionatos oficiais–. As beneficiarias este ano son: 5 Coruña Fútbol Sala, Asociación Deportiva e Cultural Alquimia Inline, BM Linea21, Círculo Colombofílico Herculino, Club Asociación de Antiguos Alumnos Colegio Santo Domingo, Club Compañía de María, Club Deportivo Galicia Rollers, Club Deportivo Los Rosales, Club Deportivo Seguridade Galega, Club Deportivo Xerión, Club Hércules XTRM, Club Ximnasia Rítmica María Barbeito, Clube de Iniciativas Deportivas Universitarias, Dobok Escuela de Taekwondo, Filloa Jazz, Hóckey Club Borbolla, Judo Club Coruña, Judo Club Universidade da Coruña, Real Club Náutico de A Coruña, Ximnasia Coruña, Club Atletismo Riazor Coruña, Club Halterofilia A Coruña, Club Marineda Atlético, Club Natación Coruña, Club Natación Liceo, Asociación Cultural Deportiva Policía Local de A Coruña, Asociación Cultural y Deportiva Cuerpo Policía Nacional – Policía Galicia, Asociación veciñal Os Rosales, Club Coruña de Entrenamiento Táctico Policial, Federación Galega de Natación, Sociedad Deportiva Club Torre, Asociación de Bulimina y Anorexia de A Coruña, Asociación Gallega contra la Fibrosis Quística, Asociación Síndrome de Down de A Coruña, Confederación Galega de Persoas con Discapacidade, Grumico Sociedad Deportiva, Asociación Deportivo Cultural Liga de Peñas de A Coruña, Club Deportivo Auténtico, Fundación Galega contra o Narcotráfico, Orillamar Sociedad Deportiva, Victoria Club de Fútbol e Ximnasio Estudio Garrapucho.

Para máis información sobre os proxectos que forman parte da convocatoria, pódese consultar a proposta de resolución no web ​www.coruna.gal/deportes

A ​​Concellería de Xustiza Social e Coidados, en colaboración coa Facultade de Socioloxía da Universidade da Coruña, organiza a vindeira semana a primeira edición das xornadas ​A Coruña coidadora. Novas formas de atención entre o público e o común, unha iniciativa aberta a toda a cidadanía que pretende abordar os retos, posibilidades e oportunidades que se enmarcan no ámbito dos coidados e da dependencia e que se presentan tanto desde a perspectiva institucional como o privado e comunitario. Tal e como expón a edil, o obxectivo principal desta proposta “é resaltar o papel da sociedade civil e da cidadanía para o sostemento da vida e poñer o foco sobre novas prácticas e experiencias de coidado da comunidade que se están a dar no territorio, e a relación que manteñen coas administracións municipais”.

“Habitualmente a provisión de coidados centrouse nos transvases que se realizan desde as institucións públicas, a familia e o mercado, pero nos últimos anos comezaron a xurdir iniciativas que teñen como base o coidado na comunidade, a activación dos vínculos sociais do barrio e a reformulación da rede veciñal e da amizade. Estas xornadas pretenden, precisamente, analizar esas experiencias de coidados que sentan os seus alicerces na contorna máis próxima e que van máis alá do núcleo familiar, ademais de reflexionar sobre a construción social e política de coidados que se asuman de maneira colectiva e comunitaria”, explica Cameán.