coruna 20/02/2021

A Marea Atlántica denuncia que o Estado baixe os brazos e acepte pagarlle á familia Franco pola súa “boa fe” no roubo de Meirás

by Victor Lamela

A Marea Atlántica critica que o Estado renuncie a recorrer a sentenza do Pazo de Meirás e acepte indemnizar á familia Franco pola súa “boa fe” no roubo do edificio. A sentenza da Audiencia Provincial da Coruña, que lle recoñece ao Estado a titularidade do Pazo, obriga tamén a pagarlle aos familiares do ditador unha compensación por apropiarse do pazo un xeito ilegal desde 1975. Ante esta situación, “reclamámoslle ao presidente do Goberno, Pedro Sánchez, que rectifique e dea a batalla ante o Tribunal Supremo”, en palabras do noso vicevoceiro, Iago Martínez.

Desde A Coruña, tamén lle pedimos a Inés Rey que se implique que convide ao seu compañeiro de partido, Pedro Sánchez. E que leve ao goberno municipal da Coruña a recorre a sentenza, como xa anunciou o Concello de Sada, e como está a considerar a Deputación. A alcaldesa anunciou por todo o alto que o seu goberno se persoaba como acusación na causa de Meirás, é o momento de manter a coherencia e impedir que a familia do ditador siga a beneficiarse do roubado.

Un pésimo precedente para a Casa Cornide

Iago Martínez advirte de que “asumir que a familia Franco actuou de boa fe no saqueo sistemático do patrimonio público non só é inxusto, senón un penoso precedente que pode dificultar a demanda civil para recuperar a Casa Cornide na Coruña”.

O informe do Instituto Cornide e o historiador Emilio Grandío, xunto aos documentos que proban que houbo fraude de lei na súa venda, son unha base sólida para recuperar o inmoble roubado polo ditador na Cidade Vella, pero asumir a sentenza da Audiencia Provincial pode complicar o camiño.

A %d blogueros les gusta esto: