A Concellería de Mobilidade Sostible inicia esta semana a construción dun novo tramo do carril bici metropolitano, que conectará por Linares Rivas o treito xa executado no parque de San Diego ata o cruce na rúa Ramón y Cajal. Ao tempo, tamén se levará a cabo unha actuación na praza de Ourense para permitir o paso do carril diferenciado para bicicletas por detrás da parada do autobús alí situada (a número 5), e que será trasladada a Linares Rivas de maneira temporal.

Como explica o edil responsable de Mobilidade Sostible, Daniel Díaz Grandío, as obras, que darán continuidade a un carril bici bidireccional na marxe do bordo litoral, abordan, en primeiro lugar, a ampliación da beirarrúa no espazo reservado para aparcamento entre os pasos peonís anterior e posterior á rotonda no cruce da avenida do Exército coa Rolda de Outeiro. O paso segregado para bicicletas construirase no lateral do muro, contará cos dous sentidos de circulación e con pavimentos diferenciado na beirarrúa para aumentar a seguridade tanto peonil como dos e das ciclistas. “Con este trazado búscase que os e as peóns e as persoas que opten pola bicicleta só se crucen nun punto, no que a presenza peonil é mínima e, polo tanto, se incrementa a seguridade”, manifesta Díaz Grandío. Tras os traballos neste punto, a prolongación do carril bici que conectará A Coruña coa súa área metropolitana a través da ponte da Pasaxe continuará ata o cruce con Ramón y Cajal co sinalización horizontal e balizamento na calzada. O prazo estimado de execución para este tramo, no que se iniciaron onte as obras, é de tres semanas.

O Centro Ágora acolle, durante a primeira edición da Xornada Cultura Accesible e Inclusiva, unha iniciativa promovida polo Concello da Coruña e a Fundación Emalcsa que nace, no marco do Festival de Artes Pola Inclusión Cultural Festi=, co obxectivo de ofrecer un espazo de encontro e intercambio de experiencias entre profesionais de distintos ámbitos que teñen interese na creación cultural como ferramenta da inclusión social. A concelleira de Igualdade e Diversidade, Rocío Fraga, acompañada polo edil de Culturas, Deporte e Coñecemento, José Manuel Sande, foi a responsable de inaugurar o evento, que “desborda a programación do Festigual, convidando á cidadanía a un novo espazo dende o que xerar conexións entre entidades culturais e sociais, así como conversas ao redor da cultura como ferramenta de inclusión social”, explicou.

Fraga salientou a aposta do goberno local “pola apertura da accesibilidade da cultura para o conxunto da poboación, así como o fomento das artes protagonizadas por persoas diversas”, a través do programa Cultura Accesible e Inclusiva. Precisamente a responsable municipal deu a coñecer os 13 proxectos que resultaron da segunda convocatoria do programa, no que se investiron 100.000 euros e cuxas actividades chegaron a máis de 10.000 persoas. Tal e como apuntou a edil, estas iniciativas tamén forman parte da programación da segunda edición do FESTI=. O festival continuará coa súa actividade expandida até o vindeiro 2 de decembro, data na que se celebrará unha xornada festiva no Centro Ágora que contará coa participación das entidades culturais e sociais beneficiarias da II convocatoria do programa Cultura Accesible.

A xornada, que conta coa colaboración de Naturgy, Repsol, Fundación Sabadell, Vegalsa e a Fundación Maria José Jove, deu a coñececer esta mañá diferentes iniciativas e organizacións que traballan a inclusión social desde o ámbito da cultura, tanto a nivel local como doutras localidades, e que abranguen disciplinas como a fotografía, a literatura ou a música. Pola tarde, desde as 16.00 horas, continuará cunha sesión denominada ​Promoción cultural desde o sector público e privado, ​na que estarán presentes a directora do Teatro Colón, Bettina Kohlhaas, o director do Grupo AMAS, Sergio Aguinaga, e a adestradora de actrices e actores con diversidade funcional da película Campeones, Allende López. De seguido, a partires das 17.15 horas, abordarase o traballo de proxectos que ofrecen perspectivas innovadoras de inclusión desde a cultura. É o caso de Dididai Nepal, unha ONG para o desenvolvemento que traballa con persoas con diversidade funcional, o programa Arte no Territorio​, do departamento de danza e música da Fundación Jicoteca, ou a iniciativa ​Sen etiqueta​. A xornada pecharase ás 18.15 horas cun acto denominado Clownferencia, no que participan as actrices Vanessa Rivas e Teresa Babío.

Para máis información sobre o festival así como toda a súa programación, tanto expandida como do día 2 de decembro, pódese visitar ​www.coruna.gal/igualdade/festigual​.