O concelleiro de Emprego e Economía Social, Alberto Lema, presentou as Xornadas Gastronómicas do Bacallau, o evento que pecha as actividades de homenaxe a Manuel María Puga y Parga, Picadillo, no centenario do seu pasamento e nas que participarán, entre o 1 e o 18 de novembro, 15 restaurantes da cidade que ofrecerán un menú baseado en receitas do exalcalde. O tamén presidente do Consorcio de Turismo presentou tamén a guía titulada ​Picadillo: Descubre o auténtico sabor dunha cidade única. Seis Rutas para coñecer A Coruña,​ que recolle as diferentes facetas de Manuel María Puga y Parga como alcalde, gastrónomo e escritor “para relacionar a A Coruña actual coa de hai 100 anos, a de Picadillo”. Esta publicación, que está editada en galego, castelán e inglés, formará parte do material promocional sobre a cidade do Consorcio de Turismo.

“Picadillo baseaba os seus libros na cociña tradicional e nos produtos populares e hai un século, e aínda hoxe, un deles era o bacallau, un prato que merece ser tratado e recuperado polos nosos cociñeiros e cociñeiras tanto nas fórmulas tradicionais como nunha cociña de vangarda”, explicou Lema, que lembrou o valor estratéxico que ten a gastronomía dentro do impulso ao turismo na cidade, que acolle eventos xa consolidados como o Boucatise ou o propio concurso de tapas Picadillo e que este ano se ampliou coa celebración do Festival SAL. Con motivo do centenario do exalcalde, Turismo reforzou tamén as actividades gastronómicas relacionadas coa súa figura. A xerenta do Consorcio de Turismo, Lanzada Calatayud, indicou que a XV edición do Concurso de Tapas Picadillo veu acompañada por toda unha serie de actividades adicionais para lembrar ao exalcalde, gastrónomo e escritor, como un premio especial no concurso de tapas, un ciclo de cine e gastronomía ou o concurso realizado a través de redes sociais ​A miña mellor receita galega de culler.​ “Desde Turismo estamos orgullosos de levar a cabo esta homenaxe a Picadillo por ser unha figura que en todas as súas facetas merecía unha posta en valor e máis cando estamos a facer unha aposta forte polo segmento de turismo gastronómico autóctono”, apuntou. Neste sentido, Calatayud defendeu que “Picadillo foi un pioneiro na posta en valor da gastronomía de calidade e da cociña autóctona polo que esperamos ter contribuído non só a homenaxear a súa figura e o seu legado senón tamén a difundir a súa figura entre os visitantes xa que é unha parte fundamental da cultura gastronómica coruñesa”.

O concelleiro de Rexeneración Urbana e Dereito á Vivenda, Xiao Varela, salientou que o goberno local “segue a dar pasos firmes de cara a axilizar á entrada da veciñanza ao Ofimático”. Dentro dese obxectivo enmarcou a reunión celebrada esta mañá no pazo de María Pita por iniciativa do goberno municipal, na que o responsable de Rexeneración Urbana actuou como mediador entre a empresa distribuidora de electricidade UFD, de Naturgy, e representantes de distintas cooperativas do polígono, co obxectivo de resolver dúbidas sobre a tramitación, por parte da compañía do subministro eléctrico aos edificios destes veciños e veciñas, de cara a axilizar este proceso. O responsable municipal cualificou a xuntanza de “ produtiva” e salientou que “cada día estamos máis preto de ter a familias vivindo no Ofimático”.

“O goberno local xa recibiu todas as obras incluídas na separata do proxecto modificado número 1 do sector 10, que se remataron no mes de agosto e que son necesarias para poder outorgar as licenzas de primeira ocupación”, recordou. “Non obstante, ademais de ter listas estas actuacións, para entregar estas licenzas tamén é necesario que os edificios das cooperativas conten con subministro eléctrico”, apuntou o concelleiro. “Neste momento semella que hai vontade por todas as partes. Estamos xa moi cerca de ver veciños e veciñas dentro do Ofimático, un fito histórico, xa que estamos poñendo os vimbios para resolver un conflito que leva case 3 décadas enquistado”, manifestou.