ESPECTACULOS 30 septiembre, 2020

Benestar Social impulsa a primeira edición da mostra CINEMABEIRO na Domus

by Victor Lamela

A concelleira de Benestar Social, Igualdade e Participación, Yoya Neira, presentou no consistorio a primeira edición de CINEMABEIRO, a Mostra Internacional de Cinema pola Paz e a Non Violencia, organizada pola asociación Mundo Sen Guerras, co patrocinio da Fundación Emalcsa e colaboración do Concello da Coruña. Na presentación tamén participaron a programadora do evento, María Núñez, e a presidenta de Mundo Sen Guerras, Marisa Fernández.

Yoya Neira augurou “unha longa traxectoria ao CINEMABEIRO”, que será un valor máis para animar “o debate e reflexión crítica sobre a importancia dos dereitos humanos no noso país e loxicamente no ámbito global”.

A mostra, que será de balde e terá lugar na Domus os días 2, 3 e 4 de outubro, promove a concienciación social do público a través de distintas proxeccións, todas elas na Domus, defendendo os Dereitos Humanos, a democracia, a paz, a ecoloxía e a solidariedade a favor dos colectivos máis desfavorecidos. “Haberá 5 mesas de debate ás que poder acudir virtualmente tratando temas como a emigración, feminismo, ecoloxía, o dereito á educación ou a discriminación por sexo como elemento de exclusión social”, sinalou a programadora do CINEMABEIRO, que tamén explicou que serán un total de 20 proxeccións audiovisuais: 4 longametraxes e 16 curtametraxes. A programación poderá consultarse na páxina web cinemabeiro.gal e as entradas, sen custo, deberán reservarse en Eventbrite.